ကမ္ဘာကျော် ဖက်ရှင် အမှတ်တံဆိပ် Zaraရဲ့ မိခင် ကုမ္ပဏီဖြစ်တဲ့ Inditexက မြန်မာနိုင်ငံမှာ ချုပ်လုပ်တဲ့ အဝတ်အထည်တွေကိုဝယ်ယူတော့မှာ မဟုတ်ဘူးလို့ ကြေညာခဲ့ပါတယ်။
ကုမ္ပဏီရဲ့ မိတ်ဖက် ကမ္ဘာ့အလုပ်သမား သမဂ္ဂ တစ်ခုဖြစ်တဲ့ IndustriALLရဲ့ စည်းရုံး လှုံ့ဆော်မှုကို လက်ခံပြီး မြန်မာနိုင်ငံက အထည်ချုပ် စက်ရုံတွေမှာ ချုပ်လုပ်တဲ့ အဝတ်အထည်တွေကို မဝယ်ဖို့ ဆုံးဖြတ်လိုက်ပြီလို့ Inditexက ဆိုပါတယ်။
IndustriALLရဲ့ တောင်းဆိုမှုကိုလေးစားလိုက်နာပြီး မြန်မာနိုင်ငံကနေ တာဝန်ခံမှုရှိရှိ ထွက်ခွာဖို့ Inditex အနေနဲ့ တစ်ဆင့်ချင်းစီ စတင် လုပ်ဆောင်နေပြီဖြစ်ကြောင်း၊အဲဒီအတွက် မြန်မာနိုင်ငံက မိတ်ဖက် အထည်ချုပ် စက်ရုံတွေမှာ ကုမ္ပဏီအတွက် အလုပ်လုပ်ပေးနေတဲ့ ဝန်ထမ်းအင်အားကို စတင် လျှော့ချနေကြောင်း Inditexရဲ့ အခုသီတင်းပတ် ထုတ်ပြန်ချက်မှာ ဖော်ပြထားပါတယ်။
Inditexဟာ မြန်မာနိုင်ငံအထည်ချုပ်စျေးကွက်ကို အပြီးတိုင် စွန့်ခွာမယ့် အချိန်ကာလ သတ်မှတ်ချက်ကို အတည်မပြုခဲ့သလို ပြည်တွင်းမှာ ရှိနေတဲ့ မိတ်ဖက် ကုမ္ပဏီတွေရဲ့ နာမည်ကိုလည်း မထုတ်ပြန်ခဲ့ပါဘူး။ ဒါကြောင့် မြန်မာနိုင်ငံကအထည်ချုပ်စက်ရုံဘယ်နှရုံထိ Zaraနဲ့ Inditexအတွက်အဝတ်အထည်တွေ ချုပ်လုပ်ပေးနေသလဲ ဆိုတာကို တိတိကျကျ မသိရပါဘူး။
Public Service Announcement
မြန်မာနိုင်ငံက အထည်ချုပ် လုပ်ငန်းတွေဟာ အနောက်နိုင်ငံတွေရဲ့ နာမည်ကျော် ဖက်ရှင်နဲ့ အားကစား အမှတ်တံဆိပ်တွေအတွက် အဝတ်အထည်တွေ၊ ဖိနပ်တွေ အများအပြားကို တာဝန်ယူ ချုပ်လုပ်ပေးနေပါတယ်။ ၂၀၂၁ ခုနှစ်၊ နှစ်ဆန်းပိုင်းမှာ စစ်တပ်က အာဏာသိမ်းလိုက်တဲ့အခါ တခြား လုပ်ငန်းနယ်ပယ်တွေလိုပဲ မြန်မာ့ အထည်ချုပ် လုပ်ငန်းဟာလည်း နိုင်ငံရေးနဲ့ စီးပွားရေး အကျပ်အတည်းတွေရဲ့ ဂယက်ရိုက်ခတ်မှုကို အပြင်းအထန် ခံစားခဲ့ရပါတယ်။
အထည်ချုပ် လုပ်ငန်းတွေက ပေးဆောင်တဲ့ အခွန်အခတွေဟာ အာဏာသိမ်း စစ်တပ်အတွက် ဝင်ငွေရရှိစေတာကြောင့် မြန်မာနိုင်ငံမှာ ရင်းနှီးမြှုပ်နှံတာတွေကို စွန့်ခွာဖို့ အနောက်နိုင်ငံ အခြေစိုက် ဖက်ရှင်နဲ့ အားကစား ကုမ္ပဏီတွေကို လူ့အခွင့်အရေး အဖွဲ့အစည်းတွေ၊ နိုင်ငံတကာ အလုပ်သမား သမဂ္ဂတွေက အပြင်းအထန် ဖိအားပေးလာပါတယ်။ ဒါပေမဲ့ တစ်ဖက်မှာလည်း အဲဒီလို ကုမ္ပဏီကြီးတွေ အများအပြား မြန်မာနိုင်ငံကို စွန့်ခွာသွားရင် အထည်ချုပ်လုပ်သား အများအပြား အလုပ်လက်မဲ့ ဖြစ်သွားနိုင်တဲ့ နောက်ဆက်တွဲ ဆိုးကျိုးမျိုးကလည်း ခြိမ်းခြောက်နေပြန်ပါတယ်။
အစောပိုင်းမှာ စပိန်နိုင်ရဲ့ ဖက်ရှင် အမှတ်တံဆိပ် တစ်ခုဖြစ်တဲ့ Mango ကလည်း မြန်မာနိုင်ငံကနေ ထွက်ခွာတော့မယ်လို့ ကြေညာခဲ့ပါတယ်။
Inditexဟာ ကုမ္ပဏီရဲ့ အထည်ချုပ် လုပ်ငန်းကွန်ရက်တွေ ဖြန့်ကျက်ထားရာ မိတ်ဖက်နိုင်ငံတွေမှာရှိနေတဲ့အလုပ်သမား သမဂ္ဂတွေနဲ့ ချိတ်ဆက်ပေးဖို့၊ ဝန်ထမ်းတွေရဲ့လိုအပ်ချက်နဲ့ ကုန်စည်စီးဆင်းမှု လမ်းကြောင်းတွေကို စောင့်ကြည့် လေ့လာပေးဖို့အတွက် IndustriALLကို တာဝန်အပ်နှင်းထားတာ ဖြစ်ပါတယ်။ Inditexနဲ့ IndustriALLရဲ့ လက်တွဲမှုဟာ ၂၀၀၇ မှာ စတင်ခဲ့ပြီး ၂၀၂၂ ခုနှစ်မှာ ထပ်မံ သက်တမ်း တိုးမြှင့်ခဲ့ပါတယ်။
