စစ်ကိုင်းတိုင်း၊ ဆားလင်းကြီးမြို့နယ်၊ ညောင်ပင်ကြီးကျေးရွာတဝိုက်မှပြည်သူများ စစ်ရှောင်ကာလ နှစ်လ နီးပါးရှိလာ၍ စားနပ်ရိက္ခါများလိုအပ်လာကြောင်း ဒေသတွင်း စစ်ဘေးရှောင်များကိုကူညီနေသူများက ပြောသည်။
ညောင်ပင်ကြီးကျေးရွာကို စစ်ကောင်စီတပ်က ဇွန်လဆန်းပိုင်းမှစ၍ စစ်ကြောင်းထိုးမီးရှို့ခဲ့သောကြောင့် အနီးတဝိုက်ကျေးရွာများပါ ထွက်ပြေးတိမ်းရှောင်ခဲ့ကြရသည်။လက်တလောစစ်အုပ်စုက ညောင်ပင်ကြီး၌ ရှိနေပြီး နေအိမ်များကိုဆက်တိုက်မီးရှို့အကြမ်းဖက်နေသောကြောင့်ဒေသခံပြည်သူများမှာ ပြန်မဝင်နိုင်သေးကြောင်း စားနပ်ရိက္ခာအခက်အခဲတွေ့လာကြောင်း စစ်ရှောင်ကူညီနေသူများက ပြောသည်။
“ပြန်လို့မရတဲ့အခြေအနေတွေမှာရှိနေတာ။ ဆားလင်းကြီး ၆ရွာလောက်တော့ရှိမယ်။ နေရာအသီးသီးမှာရှောင်နေကြရတာ။”ဟု ချင်းတွင်းမြစ်ကမ်းဘေးကျေးရွာများသပိတ်စစ်ကြောင်းမှ ကိုအောင်ခန့်ဇော်က ပြောသည်။
ညောင်ပင်ကြီးတဝိုက်ရှိ စစ်ရှောင်နေရသော ပြည်သူများအနက် မီးဘေးသင့်အိမ်ထောင်စု ၇၀ ကျော်အတွက် ချင်းတွင်းမြစ်ကမ်းဘေးကျေးရွာများသပိတ်စစ်ကြောင်းမှ ဆန်နှင့်ငါးသေတ္တာများအားလည်းကောင်း၊ စစ်ရှောင်စခန်းနှစ်ခုအတွက် အညာပစ်တိုင်းထောင်လေးများအဖွဲ့က ဆန်၊ဆီနှင့် ကုန်စိမ်းများအားလည်းကောင်း လှူဒါန်းပေးခဲ့သည်။
“စစ်ရှောင်ရတာ နှစ်လနီးပါးကြာမြင့်ခဲ့ပြီဖြစ်တဲ့အတွက် စားနပ်ရိက္ခာနဲ့ အလှူရှင်များလည်း နည်းလာတယ်။”ဟု အညာပစ်တိုင်းထောင်လေးများအဖွဲ့က ပြောသည်။
Public Service Announcement
ထိုပြည်သူများအတွက် စားနပ်ရိက္ခါများ ကူညီလှူဒါန်းပေးကြရန် စစ်ရှောင်ကူညီနေသူများက မေတ္တာရပ်ခံသည်။
ဇွန်လ ၉ ရက်နေ့တွင် ညောင်ပင်ကြီးရွာရှိ စစ်ကောင်စီရဲစခန်းကို ဒေသတွင်းတော်လှန်ရေးအင်အားစုများတိုက်ခိုက်ခဲ့ရာ စစ်ကောင်စီတပ်မှ သေဆုံးထိခိုက်မှုများပြီးလက်နက်ခဲယမ်းများလည်း အသိမ်းခံခဲ့ရသည်။စစ်တပ်ကအထိနာ၍စစ်တပ်ဘက်က လေကြောင်းဖြင့်ပါ ပစ်ခတ်ခဲ့၍ ပြည်သူအချို့ ထိခိုက်သေဆုံးမှုများ ရှိခဲ့သည်။
ထို့နောက် စစ်အုပ်စုက မီးရှို့၍ ညောင်ပင်ကြီးရွာအပါအဝင်း အနီးဝန်းကျင်ရှိကျေးရွာများကိုဆက်တိုက်မီးရှို့ခဲ့သဖြင့် အိမ်ခြေ ၇၀၀ ကျော် မီးလောင်ပျက်စီးခဲ့ပြီး ညောင်ပင်ကြီးအပါအဝင် ကျေးရွာ ၆ ရွာက လူဦးရေ ထောင်ချီ ထွက်ပြေးတိမ်းရှောင်နေရသည်။
