နိုင်ငံခြားငွေကို လက်ဝယ်ထားရှိလျှင် စစ်ကောင်စီကဖမ်းဆီးမည့်ဟု ခြိမ်းခြောက်ပြီးနောက်တစ်ရက်တွင် အမျိုးသားညီညွတ်ရေးအစိုးရ (NUG)၏ နွေဦးဖွံဖြိုးရေးဘဏ်(SDB)က ပြည်သူများအနေဖြင့် ဒေါ်လာများဝယ်ယူပြီးအပ်နှံနိုင်ကြောင်း ယနေ့ထုတ်ပြန်ကြေညာလိုက်သည်။
နွေဦးဘဏ်တွင်ရင်းဖွင့်လှစ်ပြီး လိုအပ်သလောက် ဒေါ်လာများကို ဝယ်ယူပြီး လုံခြုံစိတ်ချစွာသိမ်းဆည်းထားနိုင်သလို ဆန္ဒရှိသည့်အချိန်တွင်ပြည်လည်ရောင်းချနိုင်သည်ဟု နွေဦးဖွံဖြိုးရေးဘဏ်၏ ထုတ်ပြန်ချက်တွင်ဖော်ပြထားသည်။
“USD (ဒေါ်လာ)လက်ဝယ် သိမ်းထားဖို့ စိတ်မချရဘူးလား။ USD ကို အလွယ်တကူ ဝယ်ယူဖို့ နေရာ မရှိဘူး ဖြစ်နေသလား။ နွေဦးဘဏ်တွင် စာရင်း ဖွင့်လှစ်ပြီး လိုသလောက် USD ဝယ်ယူ၍ လုံခြုံစိတ်ချစွာ သိမ်းဆည်းထားပြီး မိမိဆန္ဒရှိတဲ့ အချိန်မှာ လွယ်ကူစွာ ပြန်လည် ရောင်းချနိုင်ပါတယ်။”ဟု နွေဦးဖွံဖြိုးရေးဘဏ်၏ ထုတ်ပြန်ချက်တွင်ဖော်ပြထားသည်။
မြန်မာငွေမှ အခြားနိုင်ငံခြားငွေကြေးများနှင့် Gold Token (ရွှေလက်မှတ်)များကို အမှန်တကယ်ပေါက်ဈေးအတိုင်းလဲလှယ်နိုင်သည်ဟု နွေဦးဖွံဖြိုးရေးဘဏ်က ဆိုထားသည်။
“ကျပ်ငွေ အရည်ပျော်နေတဲ့ အချိန်မှာ ခိုင်မာတဲ့ငွေကြေး၊ ပိုင်ဆိုင်မှု အနေနဲ့ပြောင်းထားချင်သူများအတွက်”ဟု NUG၊ လျှပ်စစ်နှင့်စွမ်းအင်ဒုဝန်ကြီး ဦးမော်ထွန်းအောင်က နွေဦးဘဏ်တွင်ငွေစုရန်တိုက်တွန်းထားသည်။
Public Service Announcement
အမေရိကန်ဒေါ်လာငွေလိုအပ်ချက်ကြီးမားနေသည့်စစ်ကောင်စီကပြည်သူများကို ခွင့်ပြုချက်/လိုင်စင်မရှိဘဲအမေရီကန်ဒေါ်လာ ကိုင်ဆောင်ထားပါက အရေးယူမည်ဖြစ်ကြောင်း စစ်ကောင်စီဗဟိုဘဏ်ကဩဂုတ်၂၁ရက်က ထုတ်ပြန် ခြိမ်းခြောက်လိုက်သည်။
ခွင့်ပြုချက်/လိုင်စင်မရှိဘဲ နိုင်ငံခြားငွေကိုင်ဆောင်ထားပါက နိုင်ငံခြားသုံငွေစီမံခန့်ခွဲဥပဒေအရ ထောင်ဒဏ် ၃နှစ်ဖြစ်စေ၊ငွေဒဏ်ဖြစ်စေ သို့မဟုတ် ဒဏ်နှစ်ရပ်လုံးကိုဖြစ်စေ ချမှတ်မည်ဟု စစ်ကောင်စီဗဟိုဘဏ်က ခြိမ်းခြောက်ထားခြင်းသည်။
ပြည်တွင်းနေထိုင်သူများသည် ဒေါ်လာကိုင်ဆောင်လိုပါက နိုင်ငံခြားငွေများကို တရားဝင်နည်းလမ်းဖြင့်ရရှိထားရမည်ဖြစ်ပြီး အမေရိကန်ဒေါ်လာ တစ်သောင်းနှင့်ညီမျှသော နိုင်ငံခြားငွေများကို ခြောက်လသာ ကိုင်ဆောင်ခွင့်ရှိမည်ဟု စစ်ကောင်စီဗဟိုဘဏ်က ဆိုသည်။၆လကျော်လွန်ပါက နိုင်ငံခြားငွေကို သတ်မှတ်ဈေးနှုန်းများအတိုင်းရောင်းချရမည်ဖြစ်သည်။
“နွေဦးဘဏ်မှ ဘဏ်အကောင့်ဖွင့်ပြီးငွေသွင်းချင်ရင် ဘဏ်ဆက်ဆံရေးအရာရှိတွေက တဆင့်အသုံးပြုနိုင်ပါတယ်။”ဟု ဘဏ်အေဂျင့်တစ်ဦးကပြောသည်။
ထိုအပြင်Cryptocurrency တစ်မျိုးဖြစ်သည် USDTနှင့် ဆောင်ရွက်နိုင်ကြောင်း ၎င်းကဆိုသည်။
နွေဦးဘဏ်တွင် စာရင်းသေအပ်ငွေကို မြန်မာကျပ်၊ အမေရိကန်ဒေါ်လာ၊ စင်္ကာပူဒေါ်လာနှင့်ထိုင်းဘတ်ငွေများဖြင့် အပ်နိုင်ပြီး နှစ်စဉ်အမြင့်ဆုံး အတိုးနှုန်း ၁၁ ရာခိုင်နှုန်းပေးမည်ဟု ဆိုထားသည်။ စာရင်းသေအပ်ငွေကို ဒေါ်လာနှင့် ညီမျှသည့် ငွေပမာဏမှ စတင်ပြီး အပ်နှံနိုင်သည်ဟု နွေဦးဘဏ်ကဆိုထားသည်။
နွေဦးဘဏ်ဖွင့်လှစ်ခြင်းသည် စစ်ကောင်စီထံစီးဝင်နေသည့် နိုင်ငံခြားငွေကြေးများကို ဟန့်တားနိုင်ရန်နှင့် တော်လှန်ရေးရန်ပုံငွေထောက်ပံ့ပေးနိုင်ရန်ဖြစ်ပြီး စစ်ကောင်စီကို ဘဏ္ဍာရေးအရတိုက်စစ်ဖွင့်လှစ်ခြင်းဖြစ်သညဟု NUGကဆိုသည်။
အဆိုပါဘဏ်ကို ဇူလိုင် ၂၂ ရက်တွင် စတင်မိတ်ဆက်ပြီး ဩဂုတ်လကုန်ပိုင်းတွင် အပြည့်အဝသုံးဆွဲနိုင်မည်ဟု နွေဦးဖွံဖြိုးဘဏ်စီမံခန့်ခွဲမှု အလုပ်အမှုဆောင်အရာရှိ ဦးကယ်လ်ဗင်ကလည်းပြောသည်။
သို့သော်လက်တလောတွင် SDB ဘဏ်တွင် ငွေစာရင်းဖွင့်လှစ်လိုသူများပြားပြီး ဘဏ်ဘက်က နိုင်အောင်မဖွင့်လှစ်ပေးနိုင်သေးကြောင်းအကောင့်ဖွင့်ရန် စောင့်ဆိုင်းနေသူအချို့ကပြောသည်။
ဘဏ်ဖွင့်လှစ်ပြီး ၆လအတွင်း သုံးဆွဲသူ ၁ သိန်းရရှိရန်နှင့် နောက်ထပ် ၆လအတွင်း သုံးစွဲသူ ငါး သိန်းအထိ တိုးမြှင့်လာရန်လည်းရည်ရွယ်ထားသည်ဟု ဦးကယ်လ်ဗင်ကဆက်ပြောသည်။
