စစ်အစိုးရလက်ထက်ကတည်ဆောက်ခဲ့ပြီး စစ်တပ်က အစဉ်ထိန်းချုပ်ထားသည့် သံလွင်တံတား (တာပါးတံတား)ကို တိုက်ခိုက်သိမ်းပိုက်နိုင်ပြီဖြစ်ကြောင်း ကိုးကန့်တပ်မတော်(MNDAA)က အသိပေးထုတ်ပြန်သည်။
ကိုးကန့်ခရိုင် ရှီးရှမ်းဒေသ၊ မန်လော်အုပ်စု ရန်ခန့်ရွာရှိ သံလွင်တံတားကို နိုဝင်ဘာ ၆ရက်ညနေတွင် လက်နက်ကြီးဖြင့် စတင်တိုက်ခိုက်ခဲ့ပြီး နိုဝင်ဘာ ၇ရက် နံနက်တွင် သိမ်းပိုက်နိုင်ခြင်းဖြစ်ကြောင်း၊ စစ်ကောင်စီတပ်မှ နှစ်ဦးသေ၊ တစ်ဦး အရှင်ဖမ်းမိပြီး ကျန်တပ်ဖွဲ့ဝင်များ ထွက်ပြေးသွားကြောင်း အသိပေးထားသည်။
ယင်းတံတားသည် သံလွင်မြစ်၏ကမ်းနှစ်ဖက်ကိုဆက်သွယ်ထားပြီး ကိုးကန့်နှင့် မုံးကိုးခရိုင် ၊ မိုင်ကျက်ဒေသကို ဆက်သွယ်ထားသောအဓိက လမ်းကြောင်းလည်းဖြစ်သည်ဟု အသိပေးသည်။
အရှည်မီတာ(၁၀၀)ရှိ အဆိုပါရတံတားကို ၂၀၀၅ စစ်အစိုးရခေတ်က ဆောက်လုပ်ခဲ့ပြီး စစ်ကောင်စီဘက်မှတောက်လျှောက် ထိန်းချုပ်ခဲ့ကြောင်း၊ လက်ရှိအခြေအနေမှာ တာပါးတံတား(သံလွင်တံတား)မှ ရန်ခန့်ကျေးရွာနေရာကို မြောက်ပိုင်းမဟာမိတ်အဖွဲ့မှ အပြီးထိန်းချုပ်နိုင်ခဲ့ပြီဖြစ်ကြောင်း ထုတ်ပြန်သည်။
Public Service Announcement
နိုဝင်ဘာ ၈ရက် ညပိုင်းမှစတင်ပြီး ရန်ခန့်ကျေးရွာ အရှေ့ဘက်နေရာရှိ စစ်ကောင်စီတပ်စခန်းကို ထိုးစစ်ဆင်တိုက်ခိုက်လျက်ရှိကြောင်း အသိပေးသည်။
မြောက်ပိုင်းညီနောင်အဖွဲ့မှ ‘၁၀၂၇ စစ်ဆင်ရေး’ ဆောင်ရွက်လာသော အချိန်ကာလတလျှောက် တွင် စစ်ကောင်စီ၏ တပ်စခန်းအကြီး၊ အသေး များစွာကို သိမ်းပိုက်နိုင်ခဲ့ရာ ကွမ်းလုံတံတားနှင့် တာပါးတံတား(သံလွင်တံတား)စသည့်တံတားများနှင့် အသေးစားလှေဆိပ်ကမ်းလည်းပါဝင်ကြောင်း ထုတ်ပြန်သည်။
