စစ်ကိုင်းတိုင်း ဝက်လက်မြို့နယ်ရှိ ရွှေပန်းကုံးကျေးရွာရဲစခန်း စခန်းသိမ်းတိုက်ပွဲအတွင်း စစ်ကောင်စီတပ်ဖွဲ့ဝင် သုံးဦးသေဆုံးပြီး စခန်းမှူးနှင့် ဒုရဲအုပ်အဆင့် နှစ်ဦး အပါအဝင် ၁၆ဦး အရှင်ဖမ်းဆီးထားကြောင်း အမျိုးသားညီညွတ်ရေးအစိုးရ(NUG)၏ ကာကွယ်ရေးဝန်ကြီးဌာနက သတင်းထုတ်ပြန်သည်။
ပြီးခဲ့သည့် နိုဝင်ဘာ ၂၁ရက် နံနက် ၂ နာရီ ၁၅ မိနစ်မှ နံနက် ၃ နာရီ မိနစ် ၄၀ခန့်အထိ ရွှေပန်းကုံးကျေးရွာရဲစခန်းအား အမှတ် (၁)စစ်ဒေသ၊ အမှတ်(၂) ရွှေဘိုခရိုင်ကွပ်ကဲရေး၏ ကွပ်ကဲမှုဖြင့် ရွှေဘိုခရိုင်အမှတ် (၁/၂/၃/၅) တပ်ရင်း၊ မန္တလေးခရိုင် အမှတ် (၄)တပ်ရင်းနှင့် ဝက်လက်မြို့နယ်(ပကဖ)တို့က တိုက်ခိုက်သိမ်းပိုက်ရာ စစ်ကောင်စီဘက်က သုံးဦးသေဆုံးပြီး စခန်းမှူးနေအောင်ကျော်နှင့် ဒုရဲအုပ်အဆင့် နှစ်ဦး အပါအဝင် အခြားအဆင့် ၁၆ ဦး အရှင်ဖမ်းဆီးရမိခဲ့ကြောင်း NUG၏ ကာကွယ်ရေးဝန်ကြီးဌာနက ယနေ့ နိုဝင်ဘာလ ၂၈ ရက်နေ့တွင် အတည်ပြုထုတ်ပြန်သည်။
ထို့အပြင် စစ်ကောင်စီတပ်ထံမှ BA-94 – (၃)လက်၊ MA-13 – (၃) လက်၊ BA-63 – (၁၆) လက် (၃ လက် ပျက်စီး)၊ BA-64 – (၁) လက်၊ 79 ဗုံးပစ်လောင်ချာ – (၁)လက်၊ ၁၂ ဗို့ ပြောင်းချော – (၂) လက်၊ ၃၈ ဗို့ ပြောင်းချော – (၁) လက်၊ ၃၈ ဗို့ ၆ လုံးပြူး – (၄) လက်၊ 7.62 (G3) ကျည် – (၅,၅၈၇) တောင့်၊ ၉ မမ ကျည် – (၇၀၀) တောင့်၊ ၃၈၀ ကျည် – (၆) တောင့်၊
ကိုးလုံးကျည် – (၈၉) တောင့်၊ ၃၈ ဗို့ ရာဘာကျည် – (၆) တောင့်၊ ၃၈ ဗို့ ဓာတ်ငွေ့ကျည် – (၁၈) တောင့်၊ လက်ပစ်ဗုံးသီး (၁၂) လုံး၊ ရှေ့ထွက်မိုင်း – (၆) လုံး၊ စိန်ရောင်ခြည်လက်ပစ်ဗုံး (၂၀) လုံး၊ G3 ကျည်ဘောက် (၂၈) ခု၊ MA-13/BA-94 ကျည်ဘောက် (၁၀) ခု၊ ကပ်သီး (ရှေ့ထွက်မိုင်းဖြုစ်) (၆) ခု၊ လှံစွပ် (၁၁) ခု၊ ဓား (၂) လက်၊ လက်ထိပ် (၇) ခု၊ Icon အစုံ (၁၅) လုံး၊Jammer – (၁) ခု၊ 4 Scope ၁ ခု၊ ကျင်စက် (၂) ခု၊ ဖုန်းမျိုးစုံ (၁၂) လုံး၊ ကျပ် ၉၀၈,၀၀၀ ၊ ဆိုင်ကယ် ၉ စီး သိမ်းဆည်းရမိကြောင်း ထုတ်ပြန်ချက်တွင် ဖော်ပြသည်။
Public Service Announcement
တိုက်ပွဲအတွင်း ပြည်သူ့ကာကွယ်ရေး ရဲဘော်တစ်ဦး ကျဆုံးခဲ့ပြီး ၁၅ ဦး ထိခိုက်ဒဏ်ရာ ရရှိခဲ့ကြောင်း အသိပေးထားသည်။
တိုက်ပွဲဖြစ်ပွားချိန် ရဲစခန်းသို့ တံတားဦးမှ တက်လာသည့် တိုက်လေယာဥ်ဖြင့် ဗုံးကြဲ တိုက်ခိုက်ပြီး အနောက်မြောက်တိုင်းစစ်ဌာနချုပ်(နမခ)မှ တက်လာသည့် Mi-35 တစ်စီးဖြင့် တည်တောကျေးရွာသို့ပစ်ခတ် တိုက်ခိုက်ခဲ့ကြောင်း အမှတ် (၁)စစ်ဒေသရုံးက ထုတ်ပြန်ထားသည်။
“ရွှေပန်းကုံးရဲစခန်းက ပြာကျသွားတယ်။ ပြည်သူအထိအခိုက်တော့မရှိဘူးလို့သိရတယ်။”ဟု ဒေသခံတစ်ဦးက ပြောသည်။
ရွှေပန်းကုံးရွာရဲစခန်းကို ပြီးခဲသည့် ၂၀၂၁ စက်တင်ဘာနှင့် ၂၀၂၂ အောက်တိုဘာအတွင်းကလည်း PDF တပ်ဖွဲ့များ ဝင်ရောက် တိုက်ခိုက်ခဲ့ပြီး စစ်ကောင်စီ တပ်သားများ ထိခိုက်သေဆုံးမှုရှိခဲ့သည်။
