အင်ကြင်း/People’s Spring
မန္တလေးတိုင်း၊ မြင်းခြံမြို့နယ်တွင် စစ်ကောင်စီတပ်နှင့်ပျူစောထီးများက ကျေးရွာနှစ်ရွာအား မီးရှို့ဖျက်ဆီးရာ နေအိမ်ရာနှင့်ချီ ပျက်စီးပြီး သားအဖနှစ်ဦးအပါအဝင် သုံးဦးအား ပစ်ခတ်သတ်ဖြတ်သွားကြောင်း ဒေသခံများက ပြောသည်။
ယနေ့ (ဧပြီ ၈ရက်) နံနက် ၆နာရီခွဲခန့်က မြင်းခြံမြို့နယ်၊ ကျောက်ကန်ကျေးရွာ၌ တပ်စွဲထားသော စစ်ကောင်စီတပ်နှင့်ပျူစောထီးများသည် ကား သုံးစီးဖြင့်ထွက်လာပြီး ဖက်ရင်းကျေးရွာအား ပစ်ခတ်ဝင်ရောက်ချိန် သားအဖနှစ်ဦး ပစ်သတ်ခံရကြောင်း ဒေသခံများက ပြောသည်။
“သူတို့ဝင်လာတဲ့သတင်းရလို့ ဖက်ရင်းရွာက သားအဖနှစ်ယောက်က ဆိုင်ကယ်လေးနဲ့စီးပြီး ရသာရွာဘက်ဦးတည်ပြီးပြေးတာ။ကားကနောက်ကရောက်လာပြီး လမ်းမှာတင်အကြောင်းမဲ့ပစ်သတ်သွားတာ။”ဟု ဒေသခံတစ်ဦးက ပြောသည်။
Public Service Announcement
သတ်ဖြတ်ခံရသည့် သားဖြစ်သူမှာ အသက်(၂၀)အရွယ်သာရှိသေးပြီး ကိုရီးယားဘာသာစကားသင်တန်းတက်ရောက်နေသူဖြစ်ကြောင်း သိရသည်။
ထို့အပြင် စစ်အုပ်စုက အနီးရှိ ရသာကျေးရွာကိုပါ ဆက်လက်ဝင်ရောက်ပြီး အမျိုးသားတစ်ဦးအား ပစ်သတ်သွားကြောင်း ဒေသခံများက ပြောသည်။
ထို့နောက် စစ်ကောင်စီတပ်သည် ရသာရွာကို ဝင်ရောက်မီးရှို့ဖျက်ဆီးခဲ့ရာ နေအိမ် ၂၅၀ကျော် ပျက်စီးခဲ့သည်။
“ရသာရွာက အိမ်ခြေလေးရာကျော် ငါးရာနီးပါးလောက်ရှိတယ်။ တစ်ဝက်လောက်ပါသွားတယ်။”ဟု အဆိုပါဒေသခံက ပြောသည်။
“ပြည်သူတွေ ဆီက ဖုန်းတွေလဲ ယူသွားသေးတာ။မြင်းခြံ က စခတွေ ကျောက်ကန်ရွာ လယ်သစ်ရွာ ညောင်တိုရွာက ပျုတွေ နဲ့ ကားသုံးစီးနဲ့ လာရှို့သွားတာ။”ဟု ရွှေဂျိုးဖြူ ပြည်သူ့ကာကွယ်ရေးတပ်ဖွဲ့၏ ပြန်ကြားရေးတာဝန်ခံက ပြောသည်။
အလားတူ အိမ်ခြေ ၁,၃၀၀ကျော်ရှိ တောပုရွာကိုလည်း စစ်ကောင်စီတပ်က ဝင်ရောက်မီးရှို့ဖျက်ဆီးခဲ့ရာ သုံးပုံတစ်ပုံခန့် မီးလောင်ဆုံးရှုံးခဲ့ကြောင်း ဒေသခံများက ပြောသည်။
စစ်ကောင်စီတပ်သည် တိုက်ပွဲဖြစ်ပွားခြင်းမရှိဘဲ အကြောင်းမဲ့မီးဝင်ရှို့သွားခြင်းဖြစ်ကြောင်း၊ မီးရှို့ဖျက်ဆီးပြီးနောက် ၎င်းတို့တပ်စွဲရာနေရာများသို့ ပြန်လည်ဝင်ရောက်သွားကြောင်း သိရသည်။
တော်လှန်ရေးအားကောင်းသော မြင်းခြံခရိုင်တွင် မြင်းခြံ၊ နွားထိုးကြီး၊ တောင်သာမြို့နယ်များ၌ မတ်လအတွင်း စစ်တပ်က ပြည်သူ(၉)ဦးအား သတ်ဖြတ်ကာ နေအိမ် ၅၀၀ကျော် မီးရှို့ဖျက်ဆီးသွားခဲ့သည်။
