▪︎စစ်ကောင်စီတိုက်ခိုက်မှုကြောင့် ရခိုင်၌ ၃ရက်အတွင်း ဒေသခံပြည်သူ ၆ဦး သေဆုံး
ဇော်ရမ်း/People’s Spring
ရခိုင်ပြည် ကျောက်ဖြူမြို့နယ်အတွင်း နှစ်နေရာကို စစ်ကောင်စီက မေ ၈ ရက်တွင် ဒရုန်းဖြင့်ဗုံးကြဲတိုက်ခိုက်ခဲ့ရာ ဒေသခံပြညိသူနှစ်ဦးသေဆုံးခဲ့ပြီး စစ်ကောင်စီတိုက်ခိုက်မှုကြောင့် သုံးရက်အတွင်း အရပ်သား ၆ဦး သေဆုံးခဲ့သည်။
ကျောက်ဖြူမြို့နယ်၊ စနဲမြို့ ကားဂိတ်အနီးသို့ မေ ၈ ရက်နံနက် ၈နာရီခန့်၌ ဒရုန်းဖြင့်ဗုံးကြဲတိုက်ခိုက်ခဲ့ရာ အမျိုးသမီးတစ်ဦးသေဆုံးပြီး ၁၀ဦးထက်မနည်းဒဏ်ရာရရှိခဲ့သည်။ နေ့လယ်ပိုင်တွင်လည်း ကျောက်ဖြူမြို့၊ မြို့ချောင်းကျေးရွာအုပ်စုအတွင်း ဗုံးကြဲတိုက်ခိုက်ရာ လူငယ်အမျိုးသားတစ်ဦး သေဆုံးခဲ့ခြင်းဟု ဒေသခံများကပြောသည်။
“ဒီနေ့က ဒရုန်းနဲ့ တိုက်ခိုက်မှုနှစ်ကြိမ်ပြုလုပ်သွားတာပါ။ စနဲမြို့မှာက လူစည်ကားတဲ့နေရာကိုပစ်ချတာ။ မြို့ချောင်းကျေးရွာအုပ်စုမှာက ဘုန်းကြီးကျောင်းကိုပစ်တာ” ဟု ကျောက်ဖြူမြို့ခံတဦးကပြောသည်။
Public Service Announcement
ဒဏ်ရာရရှိသူဆယ်ဦးသည် ဆေးရုံ၌ သွားရောက်ကုသခဲ့ရသည်ဟု ဆိုသည်။ သေဆုံးသူနှစ်ဦး၏အမည်စာရင်းကို လတ်တလောအသေးစိပ်မသိရှိရသေးပေ။
စစ်ကောင်စီသည် ရခိုင်ပြည်နယ်၌ လေကြောင်းတိုက်ခိုက်မှုအပြင် ဒရုန်းအသုံးပြု၍ အရပ်သားများနေထိုင်သောနေရာများကို ဗုံးချတိုက်ခိုက်မှုများပိုမိုပြုလုပ်လာသည်ဟု ဒေသခံများကပြောသည်။
မေလ ၆ ရက်ကလည်း ကျောက်တော်မြို့နယ်၊ အလယ်ကျွန်းကျေးရွာကို စစ်ကောင်စီက တိုက်ပွဲဖြစ်ပွားခြင်းမရှိဘဲ လေကြောင်းဖြင့် ဗုံးကြဲတိုက်ခိုက်ခဲ့ရာ ဘုန်းကြီးကျောင်းနှင့် နေအိမ်တစ်လုံးပေါ်သို့ ကျရောက်ပေါက်ကွဲခဲ့ပြီး ဦးဇင်းဇာဂရ၊ဦးနီထွန်းဦး၊ဒေါ်မဒွေးနှင့်ကိုဟန်တို့ သေဆုံးခဲ့သည်။
အာရက္ခတပ်တော်(AA)သည် ယခုရက်ပိုင်း၌ ဘူးသီးတောင်၊ မောင်တော၊သံတွဲမြို့နယ်တို့မှ စစ်ကောင်စီစခန်းများကိုထိုးစစ်ဆင် တိုက်ခိုက်နေသည်။
ဘူသီးတောင်အခြေစိုက် စကခ (၁၅)အား မေလ ၅ရက်က တိုက်ခိုက်သိမ်းပိုက်ရာ ဒုတပ်မမှူးဦးဆောင်သည့် စစ်ကောင်စီတပ်ဖွဲ့ဝင်များ၊တပ်မိသားစုဝင်များစုစုပေါင်း ရာနှင့်ချီ၍ လက်နက်ချအညံ့ခံခဲ့ကြကြောင်း AA ကသတင်း ထုတ်ပြန်ထားသည်။ သိမ်းပိုက်ရယူရန်ကျန်ရှိနေသော လက်ကျန်စခန်းများကို တပြိုင်နက်တည်း ထိုးစစ်ဆင်တိုက်ခိုက်လျက်ရှိသည်ဟု AAက အသိပေးထားသည်။
(ကျောက်ဖြူ မြို့နယ် ၊စနဲမြို့ ကိုစစ်ကမေ ၈ ရက်တွင် ဒရုန်းဖြင့်ဗုံးသီးချတိုက်ခိုက်၍ အပျက်အစီးများကိုတွေ့ရစဥ်။ ဓါတ်ပုံ-CJ)
