စောနွေဦး/People’s Spring
ပြည်တွင်းရွှေဈေးကွက်တွင် အခေါက်ရွှေတစ်ကျပ်သားလျင် ယနေ့ (သြဂုတ် ၈) ကျပ် သိန်း ၇၀ကျော်အထိ မြင့်တက်လာကြောင်း ပြည်တွင်းဈေးကွက်အတွင်းမှာသိရသည်။
စစ်ကောင်စီတပ် စစ်ရှုံး၍ တော်လှန်ရေတပ်များကမြို့များဆက်တိုက်သိမ်းပိုက်နိုင်ခြင်း ၊ ကျပ်ငွေတန်ဖိုးကျဆင်းနေခြင်းကြောင့် နိုင်ငံခြားငွေဈေးများနှင့် ရွှေဈေးနှုန်းများပါ ယခုကဲ့သို့ဆက်တိုက်မြင့်တက်နေခြင်း ဖြစ်သည်ဟု ရွှေလုပ်ငန်းရှင်တစ်ဦးကဆိုသည်။
သြဂုတ် ၈ ရက်နေ ညနေပိုင်းတွင် အခေါင်ရွှေဈေးမှာ တစ်ကျပ်သားလျင် ကျပ်၇,၀၂၀,၀၀၀ ထိ ယနေ့ညနေပိုင်းတွင် မြင့်တက်လာခဲ့သည်။
Public Service Announcement
“ဒီဈေးနှုန်းက သမိုင်းတလျှောက်မှာ တက်နှုန်းအမြင့်ဆုံးလိုဆိုရမယ်။ တကယ်တော့ ကျပ်ငွေတန်ဖိုးထိုးကျနေတာလို့ပဲပြောရမယ်”ဟု ရွှေလုပ်ငန်းရှင်တစ်ဦးကပြောသည်။
ပြည်တွင်းရွှေဈေးသည် စစ်တပ်အာဏာမသိမ်းခင်က အခေါက်ရွှေတစ်ကျပ်သားကို ကျပ် ၁၃သိန်းကျော်သာရှိခဲ့ပြီး စစ်တပ်အာဏာသိမ်း ၃ နှစ်ကျော်အတွင်းမှာ ၅ဆကျော်မြင့်တက်လာခဲ့ခြင်းဖြစ်သည်။
ငွေကြေးဈေးကွက်တွင်လည်း ကျပ်ငွေတန်ဖိုးထိုးကျနေပြီ အမေရိကန် တစ်ဒေါ်လာကို ၅၆၀၀ ကျပ် ၊စင်ကာပူတစ်ဒေါ်လာကို ၄၁၀၀ ကျပ် နှင့် ထိုင်းဘဏ်ငွေ တစ်ဘတ်ကို ကျပ် ၁၅၆ ကျပ် အထိဈေးပေါက်နေကြောင်းပြင်ပ ငွေလဲဈေးကွက်အတွင်းမှာ သိရသည်။ ထိုနှုန်းများသည် စစ်တပ်အာဏာသိမ်းထားသည့် ၃ နှစ်အတွင်း ကျပ်ငွေတန်ဖိုး ၄ ဆကျော်မြင့်တက်လာခြင်းဖြစ်သည်။
နိုင်ငံခြားငွေဈေးနှင့်ရွှေဈေးမြင့်တက်လာခြင်းကို ဖြေရှင်းရန် စစ်ကောင်စီက ငွေလဲနှုန်းမတည်ငြိမ်အောင် လုပ်ဆောင်သူများဟုဆိုကာ လူပုဂ္ဂိုလ်၉၃ ဦးကို ဩဂုတ် ၁ ရက်က ဖမ်းဆီးအရေးယူခဲ့သေးသည်။သို့သော် စစ်ကောင်စီက ဘက်ဂျက်လိုငွေအတွက် ကျပ်ငွေစက္ကူများအများအပြားရိုက်ထုတ်နေပြီး ကုန်သွယ်ရေး ၊ရင်းနှီးမြှပ်နှံမှုများကျဆင်းကာ တိုင်းပြည်စီးပွားရေးပြိုလဲနေခြင်း ၊ စစ်ရေးပြင်းထန်လာခြင်းစသည်တို့ကြောင့် ကျပ်ငွေစက္ကူအပေါ် ပြည်သူလူထု ယုံကြည်မှု လျော့ကျပြီး ဆက်တိုက် ထိုးကျနေခြင်းဖြစ်သည်။
