မောင်တောရှိ ရိုဟင်ဂျာ ၈၀၀ခန့်အား ဘေးကင်းရာကို AA ထပ်မံကယ်ထုတ်ပေး

ရှိုင်း/People’s Spring

ရက္ခိုင်ပြည်၊ မောင်တောမြို့နယ်၊ ဗိုလ်မှူးရွာနှင့် မောင်တောမြို့ အမှတ်(၈)ရပ်ကွက်ရှိ ကညင်တန်းကျေးရွာမှ ရိုဟင်ဂျာ ၈၀၀ခန့်ကို ဘေးကင်းလုံခြုံရာသို့ ကယ်ထုတ်ပေးခဲ့ကြောင်း အာရက္ခတပ်တော် (AA)က ယနေ့ သတင်းထုတ်ပြန်သည်။

ရိုဟင်ဂျာ သက်ကြီးရွယ်အိုများ၊ အမျိုးသား၊ အမျိုးသမီးများနှင့် ကလေးသူငယ်များကို စစ်ကောင်စီနှင့် လက်နက်ကိုင် ရိုဟင်ဂျာများက လူသားဒိုင်းကာအဖြစ် ဖမ်းဆီးပိတ်လှောင်ထား၍ အချို့မှာ စားနပ်ရိက္ခာများပြတ်တောက်ကာ အစာရေစာပြတ်လပ်မှုဒဏ်ကို ခံစားခဲ့ရသောကြောင်း ၎င်းတို့အား AAက ဘေးကင်းရာသို့ ကယ်ထုတ်ပေးနေခြင်းဖြစ်သည်ဟု ဆိုသည်။

Public Service Announcement

ထိုသို့ ကယ်ထုတ်ရာတွင် ဩဂုတ် ၈ရက် နေ့လယ်ပိုင်းက ဗိုလ်မှူး(မူဆလင်)ရွာမှ ပြည်သူ ၃၀၀ခန့်အား ဘေးကင်းရာ ကယ်ထုတ်ပေးခဲ့ပြီး ယင်းနေ့ မွန်းလွဲ ၃နာရီခန့်တွင် ကညင်တန်းရွာမှ ရိုဟင်ဂျာ ၅၀၀ခန့်အား လုံခြုံရာသို့ ကယ်ထုတ်ခဲ့သည်ဟု အသိပေးသည်။

အာရက္ခတပ်တော်မှ မောင်တောမြို့ရှိ စစ်ကောင်စီ၏ လက်ကျန်စခန်းများကို ထိုးစစ်ဆင်တိုက်ခိုက်လျက်ရှိသည့်နည်းတူ မောင်တောမြို့သိမ်းတိုက်ပွဲကိုဆင်နွှဲလျက်ရှိကြောင်း၊ ထို့ကြောင့် မောင်တောမြို့နှင့် ၎င်းပတ်ဝန်းကျင် အနီးကျေးရွာများမှ ရွာသူရွာသားများကို တိုက်ပွဲနှင့်လွတ်ရာနေရာများသို့ တိမ်းရှောင်လာကြစေရန် ဇွန်လ ၁၆ရက် နှင့် ဩဂုတ် ၇ရက်တွင် အသိပေး ထုတ်ပြန်မှု လုပ်ဆောင်ခဲ့ဟု AAက ဆိုသည်။

ထို့နောက်တွင် စစ်ကောင်စီ၊ လက်နက်ကိုင် ရိုဟင်ဂျာများ၊ အကြမ်းဖက်ရိုဟင်ဂျာအဖွဲ့များသည် ကျေးရွာများမှ ရွာသူရွာသားများကို ထွက်ခွာခွင့်မပြုဘဲ လူသားဒိုင်းကာအဖြစ် အသုံးပြုရန်ခေါ်ဆောင်ထားခဲ့ကြောင်း၊ ထို့ကြောင့် AAက ကယ်ထုတ်ပေးခြင်းများ ပြုလုပ်လျက်ရှိကြောင်း အသိပေးသည်။