ရိုဟင်ဂျာများအပေါ် ကျူးလွန်သူများ ပြစ်ဒဏ်ကင်းလွတ်နေသည့်သံသရာ ကျိုးပျက်ရမည်ဟု ကုလသမဂ္ဂ IIMM ပြော

ထားအိ/People’s Spring

ရိုဟင်ဂျာ ရှင်းလင်းစစ်ဆင်ရေး ကြောက်မက်ဖွယ်ရာဇ၀တ်မှုများအတွက် မည်သူတစ်ဦးတစ်ယောက်မျှ ပြစ်ဒဏ်ပေးခံရခြင်း မရှိသေးဘဲ ကျူးလွန်သူများ ပြစ်ဒဏ်ကင်းလွတ်နေသည့်သံသရာမှာ ကျိုးပျက်ရန် လိုအပ်ကြောင်း ကုလသမဂ္ဂ၏ IIMM ယန္တရားက ထုတ်ပြန်သည်။

မြန်မာလုံခြုံရေးတပ်ဖွဲ့များ၏ ရက်စက်သည့် အကြမ်းဖက်မှုလှိုင်းများကြောင့် သိန်းနှင့်ချီသော ရိုဟင်ဂျာမိန်းမများ၊ ယောက်ျားများနှင့် ကလေးများသည် မြန်မာနိုင်ငံ ရခိုင်ပြည်နယ်ရှိ ၎င်းတို့၏ နေရပ်မှ စွန့်ခွာထွက်ပြေးခဲ့ရသည်မှာ ယခုသီတင်းပတ်တွင် ခုနစ်နှစ်ပြည့်ပြီဖြစ်သည်။

“အရင်ဖြစ်ပွားခဲ့တဲ့ ရာဇ၀တ်မှုကျူးလွန်သူများကို ပြစ်ဒဏ်ပေးမှုမလုပ်နိုင်မချင်း ရက်စက် ကြမ်းကြုတ်မှု သံသရာဟာ ဆက်လက်ရှိနေဦးမှာဖြစ်ပါတယ်” ဟု IIMM အကြီးအကဲ Nicholas Koumjian က ပြောသည်။

Public Service Announcement

မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးမှု ယန္တရား(IIMM)သည် အပြည်ပြည်ဆိုင်ရာ ရာဇ၀တ်မှုတရားရုံး(ICC)၊ အပြည်ပြည်ဆိုင်ရာတရားရုံး(ICJ)နှင့် အာဂျင်တီးနား နိုင်ငံရှိ ရိုဟင်ဂျာဆိုင်ရာအမှုများကို ဆောင်ရွက်နေသည့် တရားရေးအာဏာပိုင်များထံ အထောက်အထားနှင့် စိစစ်သုံးသပ်မှုများ မျှဝေမှုကို တိုးမြှင့်ဆောင်ရွက်လျက်ရှိပြီး ယနေ့အထိ အထောက်အထား အချက်အလက်နှင့် စိစစ်သုံးသပ်မှုပေါင်း တစ်သန်းကျော်ပါဝင်သည့် ဖိုင်တွဲ (၈၀) ကို မျှဝေပြီးဖြစ်ကြောင်း သိရသည်။

ယခုနှစ်အတွင်း မြန်မာနိုင်ငံတဝန်း။ လက်နက်ကိုင်ပဋိပက္ခ မြင့်တက်လာခဲ့ချိန်တွင် သတ်ဖြတ်မှု၊ ညှဉ်းပန်းနှိပ်စက်မှု၊ မုဒိမ်းမှုနှင့် ရွာများကို မီးရှို့ခြင်း စသည့် ထိတ်လန့်ဖွယ်ရာ သတင်းများနှင့်အတူ ရိုဟင်ဂျာများသည် အထူးထိခိုက်လွယ်သည့် အခြေအနေသို့ ကျရောက်နေကြောင်းနှင့် ယခုလ အစောပိုင်းတွင် အကြမ်းဖက်မှုမှ ထွက်ပြေးလာသည့် ရိုဟင်ဂျာများကို ဒရုန်းဖြင့် တိုက်ခိုက်မှုကြောင့် အရပ် သားအများအပြား သေဆုံးခဲ့ကြောင်း IIMM က ဆိုသည်။

IIMM သည် အထက်ပါရာဇ၀တ်မှုများအတွက် စုံစမ်းစစ်ဆေးမှုအသစ်များကို စတင်ပြီး မည်သူတစ်ဦးတစ်ယောက်နှင့် ဆက်စပ်သည်ဖြစ်စေ ကျူးလွန်သူအားလုံး၏ အထောက်အထားများကို စုဆောင်း လျက်ရှိကြောင်း အသိပေးသည်။

ရိုဟင်ဂျာများသည် ၎င်းတို့ ချစ်ခင်ရသူများနှင့် ပိုင်ဆိုင်မှုများကို ဆုံးရှုံးခဲ့ရပြီး အများအပြားမှာ ကြောက်မက်ဖွယ်ရာ လိင်ပိုင်းဆိုင်ရာ အကြမ်းဖက်မှုများ ခံခဲ့ရကာ အများစုမှာ အိမ်နီးချင်းဘင်္ဂလားဒေ့ရှ်နိုင်ငံတွင် ဆက်လက်ခိုလှုံနေကြပြီး ၎င်းတို့၏ နေရပ်သို့ လုံခြုံစွာ ပြန်လာနိုင်မည့်နေ့ကို စောင့်မျှော်နေကြဆဲဖြစ်ကြောင်း IIMM က ဖော်ပြသည်။