ဟန်နွေ/People’s Spring
စစ်ကိုင်းတိုင်း ထီးချိုင့်မြို့နယ်ရှိ မြတောင်ဗျူဟာ စခန်းအပါအဝင် ဒေသတွင်းရှိ စစ်ကောင်စီတပ်စခန်းအားလုံးကို ယနေ့ ဩဂုတ် ၂၃ရက်ညနေပိုင်း၌ အပြီးသတ် သိမ်းပိုက်နိုင်ပြီဖြစ်၍ ဒေသတွင်း စစ်ကောင်စီ ကင်းစင်သွားပြီဖြစ်ကြောင်း ကချင်စစ်ရေးသတင်းရင်းမြစ်က ပြောသည်။
ကချင်လွတ်လပ်ရေးတပ်မတော်(KIA) ဦးဆောင်သည့် ပူးပေါင်းတပ်သည် ပြီးခဲ့သည့် ရက်ပိုင်းကတည်းက မြတောင်စစ်ကောင်စီ ဗျူဟာစခန်းအပါအဝင် ထီးချိုင့်၊ အင်းတော် ၊ ပင်လည်ဘူး၊ နဘားမြို့နယ်စသည့် စစ်ကိုင်းတိုင်းရှိ နေရာ ၆နေရာထက်မနည်းကို ထိုးစစ်ဆင် တိုက်ခိုက်နေခြင်းဖြစ်သည်။
ယင်းအနက် မြတောင်ဗျူဟာရှိ ဗျူဟာစခန်းအပါအဝင် စခန်းအားလုံးကို ဩဂုတ် ၂၃ရက် ညနေ ၄နာရီတွင် KIA၊ KPDF၊ ABSDF ပူးပေါင်းတပ်ဖွဲ့က သိမ်းနိုင်ခဲ့ခြင်းဖြစ်သည်ဟု ဆိုသည်။
Public Service Announcement
“မြတောင် စခကင်းစင်သွားပါပြီ။ လက်နက်ခဲယမ်းများစွာ ရရှိတယ်။ မြတောင်ကို သိမ်းလိုက်နိုင်တာက အလွန်အရေးကြီးပါတယ်။ မြတောင်ရသွားရင် ထီးချိုင့်ကမခက်တော့ဘူး။ စခန်းအားလုံး ၇ခု ပါ။ အားလုံးရပြီ။ ဗျူဟာမှူးနဲ့ အဖွဲ့ ထွက်ပြေးသွားတယ်”ဟု ကချင်စစ်ရေးသတင်းရင်းမြစ်က ပြောသည်။
မြတောင်ဗျူဟာအား KIA လက်အောက်ကျရောက်ပြီဖြစ်ကြောင်း စစ်ကောင်စီ ဝါဒဖြန့်သူအချို့က လူမှုကွန်ရက်၌ ရေးသားအသိပေးထားပြီး ထီးချိုင့်မြို့သည့် ကချင်ပြည်နယ် ထိုးစစ်အတွက် မဟာဗျူဟာကျသည့် အခင်းအကျင်း ဆုံမှတ်ဖြစ်သည်ဟု အသိပေးထားသည်။
တချိန်တည်း ထိုးစစ်ဆင်နေသည့် အင်းတော် နှင့် ပင်လည်ဘူး မြို့သိမ်းတိုက်ပွဲသည်လည်း အောင်မြင်မှုရရန် အလားအလာကောင်းကြောင်း ကချင်သတင်းရင်းမြစ်က ပြောသည်။
KIA အနေဖြင့် ဩဂုတ် ၁၉ရက်က မိုးမောက် မြို့နယ် ခမရ(၄၃၇) တပ်ရင်းဌာနချုပ်ကို သိမ်းပိုက်နိုင်ခဲ့ရာ အဆိုပါ တပ်စခန်းမှ ထွက်ပြေးသွားသည့် စစ်ကောင်စီ ဆုတ်ခွာတပ်ဖွဲ့ကိုလည်း ဗန်းမော်မြို့နှင့် (၅)မိုင် စီအင်ကျေးရွာအနီး၌ တိုက်ခိုက်ရှင်းလင်းနိုင်ခဲ့ကြောင်းစစ်ရေးသတင်းရင်းမြစ်တစ်ဦးက အသိပေးထားည်။
