ထားအိ/People’s Spring
အရပ်သားပြည်သူများ ဘေးကင်းလုံခြုံရေးကို အလေးပေးဆောင်ရွက်ကြရန် သက်ဆိုင်သူအားလုံးကို အမေရိကန်ပြည်ထောင်စုက ဆက်လက်တောင်းဆိုကြောင်း နိုင်ငံခြားရေးဝန်ကြီး ဘလင်ကန်က ထုတ်ပြန်သည်။
ရိုဟင်ဂျာလူမျိုးတုံးသတ်ဖြတ်မှုကို အောက်မေ့သတိရခြင်း ထုတ်ပြန်ချက်တွင် ဖော်ပြခြင်းဖြစ်ပြီး ယခုသီတင်းပတ်သည် မြန်မာလုံခြုံရေးတပ်ဖွဲ့များ၏ သတ်ဖြတ်အကြမ်းဖက်မှုများကြောင့် ရိုဟင်ဂျာပြည်သူသိန်းနှင့်ချီကာ ရခိုင်ပြည်နယ်ရှိ ၎င်းတို့နေရပ်မှ စွန့်ခွာထွက်ပြေးခဲ့ရသည်မှာ ခုနစ်နှစ်ပြည့်ပြီဖြစ်သည်။
အမေရိကန်ပြည်ထောင်စုသည် ရိုဟင်ဂျာ လူမျိုးတုံးသတ်ဖြတ်မှုမှ အသက်ရှင်ကျန်ရစ်သူများနှင့် တစ်သားတည်း ရပ်တည်နေပြီး ရိုဟင်ဂျာအသိုက်အဝန်းများနှင့် မြန်မာ၊ ဘင်္ဂလားဒေ့ရှ်နှင့် ဒေသတွင်းတွင် အကျပ်အတည်းကြောင့် သက်ရောက်မှုရှိနေသူများအတွက် လိုအပ်သောကူညီမှုများပေးအပ်ရန် သန္နိဋ္ဌာန်ချထားကြောင်း ဖော်ပြသည်။
Public Service Announcement
မြန်မာနိုင်ငံတွင် ဆက်လက်ဖြစ်ပွားလျက်ရှိသော လူသားချင်းစာနာမှုဆိုင်ရာ အကျပ်အတည်းနှင့် လူ့အခွင့်အရေး ချိုးဖောက်မှုများသည် မြန်မာနိုင်ငံရှိ တိုင်းရင်းသားများနှင့် ဘာသာရေးဆိုင်ရာ လူနည်းစုအသိုက်အဝန်းများ၊ အထူးသဖြင့် ရိုဟင်ဂျာများ ရင်ဆိုင်တွေ့ကြုံနေကြရသည့် အခက်အခဲများကို ပိုမိုဆိုးရွားစေကြောင်း အမေရိကန်နိုင်ငံခြားရေးဝန်ကြီးက ထုတ်ပြန်သည်။
အမေရိကန်သည် ဒီမိုကရေစီနည်းကျ အားလုံးပါဝင်နိုင်သည့် ငြိမ်းချမ်းသောအနာဂတ်တစ်ခုကို ဆန္ဒပြင်းပြလျက်ရှိသည့် မြန်မာပြည်သူများအတွက် ၎င်းတို့၏ အားပေးထောက်ခံမှုမှာ မပြောင်းမလဲ တည်မြဲနေသည်ဟု နိုင်ငံခြားရေးဝန်ကြီး ဘလင်ကန်က ပြောသည်။
