ဟန်နွေ/People’s Spring
စစ်ကိုင်းတိုင်း ထီးချိုင့်မြို့နယ် မြတောင်ရွာစစ်ကောင်စီဗျူဟာကုန်းနှင့်ဒေသတွင်း တပ်စခန်းများ တိုက်ခိုက်သိမ်းပိုက်သည့် တိုက်ပွဲတွင် မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး(ABSDF) ရဲဘော်များ ပါဝင်တိုက်ခိုက်ခဲ့ကြောင်း ABSDFက ထုတ်ပြန်အသိပေးထားသည်။
ဩဂုတ် ၂၅ရက် ညပိုင်းတွင် ABSDFက တိုက်ပွဲဝင် ရုပ်သံမှတ်မ်း ဖော်ပြ အသိပေးခဲ့ခြင်းဖြစ်သည်။
Public Service Announcement
ကားတစ်စီးပေါ်တွင် စက်သေနတ်အကြီး တစ်လတ် တင်ပြီး ပစ်ခတ်တိုက်ခိုက်နေသည့် မှတ်တမ်းကို ဖော်ပြခဲ့ခြင်းဖြစ်သည်။
“မြတောင်၊ အင်းတော် ၊ ထီးချိုင့် နှင့် အညာ၊ မွန် ၊ ကရင် တခွင်မှာ တိုက်ပွဲဝင်နေကြတဲ့ ရဲဘော်တွေအားလုံး အတွက် ဂုဏ်ယူတယ်” ဟုလည်း ABSDF ပြောရေးဆိုခွင့်ရှိသူ ရဲဘော်ကျော်လင်းက လူမှုကွန်ရက်၌ ရေးသားကာ အဆိုပါ ရုပ်သံမှတ်တမ်းကို မျှဝေထားသည်။
ထီးချိုင့်မြို့ခံစစ်အတွက်အရေးပါသည့် မြတောင်ဒေသ စစ်ကောင်စီစခန်းများ တိုက်ခိုက်သိမ်းပိုက်မှုကို အမှတ်(၁)စစ်ဒေသ ကွပ်ကဲမှုဖြင့် PDF ရဲဘော်များ၊ KIA၊ ABSDF ရဲဘော်များ ပူးပေါင်းဆင်နွှဲခဲ့ခြင်းဖြစ်ပြီး ဗျူဟာစခန်း အပါအဝင် တပ်စခန်း ၇ခုကို ဩဂုတ် ၂၃ရက်တွင် အပြီးသတ် သိမ်းနိုင်ခဲ့သည်။
ABSDFသည် သပိတ်ကျင်းမြို့နယ် စစ်ဆင်ရေးတွင်လည်း တော်လှန်ရေးပူးပေါင်းတပ်ဖွဲ့များနှင့် ပါဝင် တိုက်ခိုက်လျက်ရှိသည်။
ABSDF ၏ ဩဂုတ် ၈ရက် ရှစ်လေးလုံး လူထုအရေးတော်ပုံ ထုတ်ပြန်ကြေညာချက်တွင် လူထုတိုက်ပွဲနှင့် လက်နက်ကိုင် တိုက်ပွဲ ပေါင်းစပ် အရှိန်အဟုန် မြှင့်တင်ရန် တိုက်တွန်းတောင်းဆိုထားသည်။
