ဟန်နွေ/People’s Spring
ချင်းဒေသကာကွယ်ရေးတပ်ဖွဲ့(CDF)-တွန်းဇံ ထံစစ်ကောင်စီတပ်သားတစ်ဦး အလင်းဝင်လာကြောင်း CDF တွန်းဇံက ချင်းဘာသာဖြင့် ထုတ်ပြန်သည်။
အလင်းဝင်လာသည့် စစ်ကောင်စီတပ်သားက လက်နက်နှင့် ကျည်များ ယူဆောင်လာကြောင်းလည်း ဓာတ်ပုံမှတ်တမ်း ဖော်ပြထားသည်။
Public Service Announcement
CDF တွန်းဇံ၏ ထုတ်ပြန်ချက်ကို ချင်းဂျာနယ်က ဗမာဘာသာဖြင့်ရေးသားဖော်ပြခဲ့ရာ ဩဂုတ် ၂၇ရက်တွင် လက်နက်နှင့်အလင်းဝင်လာသည့် စစ်ကောင်စီတပ်သားကို ဂုဏ်ပြုငွေ ကျပ်သိန်း ၅၀ ပေးအပ်ခဲ့သည်ဟု ဆိုသည်။
CDF တွန်းဇံအပါအဝင် ချင်းပြည်ကောင်စီ တပ်ပေါင်းစုသည် ဇူလိုင်လအတွင်းက တွန်းဇံမြို့ရှိ စစ်ကောင်စီတပ်များကိုတိုက်ခိုက်ပြီး မြို့ကို သိမ်းပိုက်ထားခြင်းဖြစ်သည်။ ယခု အလင်းဝင်လာသည့် စစ်ကောင်စီတပ်သားသည် မည်သည့်တပ်၊ မည်သည့်ဒေသက ဖြစ်သည်ကို ထုတ်ပြန်ချက်၌ ဖော်ပြမထားပေ။
ဩဂုတ် ၂၄ရက်ကလည်း CDF ဟားခါးတပ်ဖွဲ့ထံ ဟားခါး အခြေစိုက် စစ်ကောင်စီတပ်သားတစ်ဦး လက်နက်နှင့် အလင်းဝင်လာ၍ ၎င်းအား ဆုငွေပေးအပ်ပြီး လုံခြုံရာသို့ ပို့ဆောင်ပေးခဲ့ဟု CDFဟားခါးက အသိပေးထားသည်။
ဩဂုတ် ၇ရက်ကလည်း ထန်တလန်မြို့ အခြေစိုက် စစ်ကောင်စီတပ်မှ တပ်သား တစ်ဦးသည် လက်နက် ၁လက်၊ ကျည်နှင့် လက်ပစ်ဗုံးတို့ ယူဆောင်ကာ ချင်းပြည်ကောင်စီ ချင်းပြည်အစိုးရ တပ်ဖွဲ့ထံ အလင်းဝင်ခဲ့သည်။
