ပေတွန်တန် ရှီနာဝပ်ထရာက သူဟာ အစိုးရ အဖွဲ့ဝင် ဝန်ကြီးတွေ နေရာကို တိတိကျကျ ရွေးချယ် ခန့်အပ်ထားပြီး ဖြစ်သလို အခုသီတင်းပတ်ထဲမှာ ထိုင်းဘုရင်ဆီက တော်ဝင် အမိန့်စာနဲ့ အသိအမှတ်ပြု အပ်နှင်းမှုကို လက်ခံရရှိမယ်လို့ မျှော်လင့်ထားကြောင်း ဆိုပါတယ်။
ထိုင်းအခြေခံ ဥပဒေ ခုံရုံးရဲ့ ဆုံးဖြတ်ချက်အရ ဝန်ကြီးချုပ်ဟောင်း ဆရက်သာ သာဗီဆန်ဟာ ရာထူးကနေ ဖယ်ရှား ခံခဲ့ရတဲ့နောက် လက်ရှိ ညွန့်ပေါင်း အစိုးရကို ဦးဆောင်နေတဲ့ ဖျူထိုင်းပါတီ (PTP) အကြီးအကဲ ပေတွန်တန်ကို လွှတ်တော်မှာ ဝန်ကြီးချုပ်သစ်အဖြစ် အဆိုပြု တင်မြှောက်နိုင်ခဲ့ပါတယ်။ သူဟာ ထိုင်းနိုင်ငံ သမိုင်းမှာ အသက်အငယ်ဆုံး ဝန်ကြီးချုပ်၊ ဒုတိယမြောက် အမျိုးသမီး ဝန်ကြီးချုပ်အဖြစ် မှတ်တမ်းဝင်ခဲ့ပါတယ်။
Public Service Announcement
ဒါပေမဲ့ ပေတွန်တန်ဟာ တရားဝင် အစိုးရအဖွဲ့ကို မဖွဲ့စည်းနိုင်သေးတာကြောင့် သူ့ရဲ့ ဦးဆောင်မှုဟာ ယာယီ အစိုးရ အနေနဲ့သာ ရှိနေဆဲပါ။ ပေတွန်တန်နဲ့ နီးစပ်သူတွေက အစောပိုင်းမှာ အစိုးရသစ်ကို စက်တင်ဘာ လလယ်လောက်မှာ အတည်ပြု ကြေညာနိုင်မယ်လို့ မှတ်ချက် ပေးခဲ့ဖူးပါတယ်။ ဒါပေမဲ့ ပေတွန်တန်ရဲ့ အဆိုအရ အခုသီတင်းပတ်မှာတင် အစိုးရသစ်က ရုပ်လုံးပေါ်လာတော့မယ့် အဓိပ္ပါယ်ပါပဲ။
အတွင်းသတင်း တချို့ရဲ့ အဆိုအရ နိုင်ငံခြားရေးနဲ့ ဘဏ္ဍာရေး ဝန်ကြီးတွေဟာ ဆရက်သာ လက်ထက်က လူဟောင်းတွေ ဆက်ရှိနေနိုင်ပြီး ဝန်ကြီးနဲ့ ဒုတိယ ဝန်ကြီးနေရာ ၁၁ ယောက်လောက်ကိုတော့ အပြောင်းအလဲ လုပ်ထားတယ်လို့ သိရပါတယ်။
PTPရဲ့ အတွင်းရေးမှူးချုပ် ဆိုရာဝေါင် သိန်သောင်က ညွန့်ပေါင်းအစိုးရသစ်ဟာ ဆရက်သာ လက်ထက်တုန်းကထက်တောင် လွှတ်တော်ထဲမှာ အမတ်နေရာတချို့ ပိုမို ထိန်းချုပ်နိုင်မယ်လို့ မျှော်လင့်ကြောင်း မှတ်ချက်ပေးခဲ့ပေမယ့် အသေးစိတ် အချက်အလက်တွေကိုတော့ ထုတ်မပြောခဲ့ပါဘူး။
ထိုင်းဝန်ကြီးချုပ်ဟောင်း သက်ဆင်ရှီနာဝပ်ထရာရဲ့ သမီးလည်းဖြစ်တဲ့ ပေတွန်တန်ဟာ စစ်တပ်နဲ့ သဟဇာတဖြစ်တဲ့ ပါလန် ပရာချာရတ် ပါတီကို ညွန့်ပေါင်း အစိုးရ စုစည်းမှုကနေ လက်တွဲဖြုတ်ခဲ့ပြီး အဲဒီပါတီရဲ့ ခါးသီးပြိုင်ဘက် ဒီမိုကရက် ပါတီနဲ့ ပေါင်းစည်းခဲ့ကြောင်း သိရပါတယ်။
ကိုးကား: CNA
