ဟန်နွေ/People’s Spring
ထီးချိုင်မြို့နယ်မှ ဆုတ်ခွာလာသည့် စစ်ကောင်စီတပ် ၏ အင်အား ၆၀ ခန့်ရှိ စစ်ကြောင်းကို ပြည်သူ့ကာကွယ်ရေးတပ်(PDF) ပူးပေါင်းအဖွဲ့က ကြားဖြတ်တိုက်ခိုက်ခဲ့ရာ စစ်ကောင်စီတပ်သေဆုံးထိခိုက်များပြားခဲ့ကြောင်း အမှတ်(၁) စစ်ဒေသက သတင်းထုတ်ပြန်သည်။
ဗိုလ်မှူး စန်းယု ဦးစီးပြီး အင်အား ၅၈ ဦးပါ စစ်ကြေငာ်းကို ယနေ့ စက်တင်ဘာ ၁၇ရက်တွင် မန္တလေးတိုင်း၊ ပြင်ဦးလွင်ခရိုင်၊ သပိတ်ကျင်းမြို့နယ်၊ တွင်းငယ်တိုက်နယ်၊ နန်းစိန်တောင်နှင့် နန်းစိန်ချောင်းကြား၌ ပစ်ခတ်တိုက်ခိုက်ခဲ့ခြင်းဖြစ်သည်ဟုဆိုသည်။
အဆိုပါ တိုက်ခိုက်မှုအတွင်း စစ်ကောင်စီဘက်မှ (၂၀) ဦး သေဆုံးပြီး (၅) ဦး ထိခိုက်ဒဏ်ရာရခဲ့ကြောင်း ထုတ်ပြန်သည်။
Public Service Announcement
ထို့ပြင် လက်နက် (၂၁) လက် ရရှိခဲ့သည်ဟု အသိပေးပြီး လက်နက်အမျိုးအစား နှင့် အရေအတွက်ကို ဖော်ပြထားသည်။ ယင်းတို့မှာ ငါးကြင်းမြီး (MA-15) (၁) လက်၊ ၆၀ မမ ပြောင်းတို (MA-9) (၂) လက်၊ MA-1 (၆) လက်၊ MA-3 (၅) လက်၊ MA-11 (၄) လက်၊ G-3 (၃) လက် နှင့် ကျည် ၊ ခဲများများစွာတို့ ဖြစ်သည်ဟုသိရသည်။
အဆိုပါတိုက်ပွဲအတွင်းတော်လှန်ရေးရဲဘော်၁ ဦး ကျဆုံးခဲ့သည်ဟုလည်း အသိပေးသည်။
စစ်ကောင်စီတပ်ကို မန္တလေးတိုင်း PDF တာဝန်ခံရုံး ကွပ်ကဲမှုအောက်ရှိ တပ်ရင်း/တပ်ဖွဲ့များမှ အထူးလှုပ်ရှား တပ်ရင်း-၃၊ အမှတ် (၅၁၁) တပ်ရင်း၊ မန္တလေးခရိုင် တပ်ရင်း (၃၊ ၄၊ ၅)၊ မန္တလေးတိုင်း ဒရုန်းတပ်ဖွဲ့၊ ABSDF၊ ပြင်ဦးလွင်ခရိုင် ကွန်မန်ဒိုတပ်စိတ်နှင့် သပိတ်ကျင်းမြို့နယ် ပကဖ စသည့် ပူးပေါင်းတပ်ဖွဲ့မှ တိုက်ခိုက်ခဲ့ကြောင်း အမှတ်(၁) စစ်ဒေသက ထုတ်ပြန်သည်။အမှတ်(၁)စစ်ဒေသကို ကချင်လွတ်လပ်ရေးတပ်မတော်(KIA)စစ်ဦးစီးချုပ်က စစ်ဒေသမှူးအဖြစ် တာဝန်ယူကာ စစ်ရေးဖော်ဆောင်နေခြင်းဖြစ်သည်။
