မိထက်/People’s Spring
မန္တလေးတိုင်း၊ သပိတ်ကျင်းမြို့အနီးတွင် အင်အားအသင့်အတင့်ရှိမြေငလျင် ငလျင်လှုပ်ခတ်သွားကြောင်းဒေသခံများကပြောသည်။
ငလျင်ကြောင့် သပိတ်ကျင်းမြို့အပြင် အနီးပတ်ဝန်းကျင်မြို့များဖြစ်သော စဉ့်ကူးမြို့၊ မိုးကုတ်မြို့နှင့် မိုင် ၅၀ ကျော်အကွာရှိ မန္တလေးမြို့အထိ ငလျင်လှုပ်ရှားမှုရှိခဲ့ကြောင်း ဒေသခံများကပြောသည်။သို့သော် မြေငလျင်ကြောင့် ထိခိုက်ပျက်စီးမှုရှိ၊မရှိကိုမူ မသိရှိရသေးပေ။
Public Service Announcement
ငလျင်သည် အောက်တိုဘာ ၁၁ ရက် နံနက် ၁၁နာရီ ၁၁ မိနစ်ခန့်တွင် သပိတ်ကျင်းမြို့နယ်တစ်နေရာကိုဗဟိုပြု၍ မြေအောက်အနက် ၁၀ ကီလိုမီတာ ( ၆ ဒသမ ၂ မိုင်ကျော်) ရစ်ခ်တာစကေး ၅ဒဿမ ၈အဆင့် လှုပ်ရှားသွားခြင်းဖြစ်ကြောင်း ထိုင်းမိုးလေဝသက သတင်းထုတ်ပြန်သည်။
သို့သော် စစ်ကောင်စီ လက်အောက်ရှိ မိုးလေဝသနှင့် ဇလဗေဒ ညွန်ကြားမှူ ဦးစီးဌာနကမူ သပိတ်ကျင်းမြို့၏ အနောက်တောင်ဘက် (၅) မိုင်ခန့်အကွာ၊ မြေအနက်(၁၀)ကီလိုမီတာကို ဗဟိုပြု ၍ အင်အားရစ်(ခ်)တာစကေး (၅.၃)အဆင့်ရှိ အင်အားအသင့်အတင့်ရှိသော မြေငလျင်တစ်ခု လှုပ်ရှားသွားကြောင်း တိုင်းထွာရရှိကြောင်းထုတ်ပြန်သည်။
ကမ္ဘာတဝန်းရှိမြေငလျင်လှုပ်ရှားမှုများကိုစောင့်ကြည့်ဖော်ပြပေးနေသော USGS ကလည်းမြေငလျင်လှုပ်ခတ်သည်ကိုအတည်ပြုပြီး ရစ်ခ်တာစကေး ၄ ဒဿမ ၉ အဆင့်ရှိသည်ဟုဖော်ပြထားသည်။
ထိုကြောင့်မြေငလျင် လှုပ်ခတ်သည်ကို အတည်ပြုကြသော်လည်းပြင်းအားကိုတွက်ချက်ဖော်ပြရာတွင်မတူညီကြပေ။ သို့သော်မြေငလျင် ဗဟိုပြုရာမြေအနက်မှာ ၁၀ ကီလိုမီတာတွင်ဖြစ်ကြောင်းတူညီစွာထုတ်ပြန်ထားသည်။ထိုအပြင် ထိုင်းမိုးဇလကအဆိုပါမြေငလျင်မတိုင်ခင် သပိတ်ကျင်းမြို့နယ်မှာပင်ရစ်ခ်တာစကေး ၄ ဒဿမ ၅ အဆင့်ရှိ ငလျင်တစ်ခုလှုပ်ခတ်ခဲ့သေးကြောင်းဖော်ပြထားပြီး ၊စစ်ကောင်စီ မိုးဇလ နှင့် USGS တို့ကမူဖော်ပြထားခြင်းမရှိပေ။
အောက်တိုဘာလလ ၅ရက် နံနက်ပိုင်းကမန္တလေးတိုင်း မြစ်သားမြို့တွင်လည်း အင်အားရစ်ခ်တာစကေး ၃ဒဿမ၇အဆင့် ငလျင်လှုပ်ခဲ့သည်။
သပိတ်ကျင်းမြို့နယ်သည် စစ်ကိုင်းပြတ်ရွေ့ဖြတ်သွားသည့်မြို့ဖြစ်ပြီး ရစ်ခ်တာစကေး ၅ အထက်နှင့် ၆အထက် ငလျင်အချို့ လှုပ်ရှားလေ့ရှိသည်။ ၂၀၁၂ ခုနှစ် နိုဝင်ဘာလက ရစ်ခ်တာစကေး ၆ဒဿမ၈ အဆင့် ငလျင်လှုပ်ခဲ့ရာ ထိခိုက်ပျက်စီးမှု များပြားခဲ့သည်။ စစ်ကိုင်းပြတ်ရွေ့သည် မြန်မာနိုင်ငံမြောင်ပိုင်း ဟူကောင်းချိုင့်ဝှမ်းမှ တောင်ပိုင်း ကပ္ပလီပင်လယ်ပြင်ထဲအထိ တောင်မြောက် ဖြတ်သန်းသွားသောမြေငလျင်ကြော ၊ထိုမြေငလျင်ကြောတလျှောက် ငလျင်များမကြာခဏလှုပ်ခတ်လေ့ရှိသည်။
