တန့်ဆည်မြို့နယ်ကို စစ်တပ် လေကြောင်းတိုက်ခိုက်၊ စာသင်ကျောင်းနှင့် နေအိမ်များပျက်စီး

ဇေအောင်/People’s Spring

စစ်ကိုင်းတိုင်း၊ တန့်ဆည်မြို့နယ်ရှိ ဇီးပေါက်ကျေးရွာကို စစ်တပ်က တိုက်ပွဲမရှိဘဲ လေကြောင်းတိုက်ခိုက်ရာ စာသင်ကျောင်းနှင့်နေအိမ်များ ပျက်စီးခဲ့ကြောင်း သတင်းရရှိသည်။

နိုဝင်ဘာ ၄ရက် ည ၉နာရီခန့်က ဇီးပေါက် ကျေးရွာကို စစ်ကောင်စီ၏ မိတ္ထီလာမြို့ ရှမ်းတဲလေတပ်မှတက်လာသည့် ဂျက်ဖိုက်တာဖြင့် နှစ်ကြိမ်တိုင် ဗုံးကြဲတိုက်ခိုက်ခဲ့ရာ ကျေးရွာ စာသင်ကျောင်းဆောင် တစ်ဆောင်၊ သာသာနိက အဆောက်အအုံတစ်လုံးနှင့် လူနေအိမ် လေးလုံး ပျက်စီးပြီး နွား ၄ကောင်လည်း သေဆုံးခဲ့ကြောင်း ဒေသခံများက ပြောသည်။

“ပြည်သူတွေတော့ မထိဘူး။ စာသင်ကျောင်းက နှစ်ထပ်ဆောင်အာစီကိုမှ တော်တော်ပျက်စီးသွားတယ်။ ဘေးတစ်လုံး၊ အပေါ်တည့်တည့်တစ်လုံး။ စာသင်ကျောင်းကိုမှ နှစ်လုံးချတာ။ တိုက်ပွဲလည်းမရှိဘူး။ ဒီတိုင်းလာပစ်တာ။ Y12က ကင်းထောက် ပြီး ဂျက်ဖိုက်တာနဲ့ လာပစ်တာ။ တစ်စီးက ပြန်သွားပြီး နောက်တစ်စီးကလာကြဲတာ။”ဟု တန့်ဆည်မြို့နယ်အခြေစိုက် တော်လှန်ရေးရဲဘော်တစ်ဦးက ပြောသည်။

Public Service Announcement

ပထမတစ်ကြိမ် လေကြောင်းပစ်ခတ်ခံရပြီးနောက် ဒေသခံပြည်သူများထွက်ပြေးတိမ်းရှောင်ခဲ့၍ လူထိခိုက်မှုမရှိခဲ့ခြင်းဟု ဒေသခံများက ပြောသည်။

အဆိုပါစာသင်ကျောင်းသည် နေ့ဘက်တွင် ကလေးငယ်များအား စာသင်ကြားပေးနေသောကျောင်းဖြစ်ပြီး ညအချိန်ဖြစ်၍ ကလေးငယ်များ ထိခိုက်မှုမရှိခဲ့ခြင်းဖြစ်ကြောင်း ဒေသခံအချို့က ပြောသည်။

စစ်တပ်က ယနေ့(နိုဝင်ဘာ ၅ရက်)နံနက်အစောပိုင်းကပင် လားရှိုးနှင့် မင်းတပ်မြို့ကို လေကြောင်းမှ တိုက်ခိုက်ခဲ့သေးသည်။

စစ်ကောင်စီက လေကြောင်းတိုက်ခိုက်မှုများ ဆက်တိုက်ပြုလုပ်နေ၍ နိုဝင်ဘာ ၄ရက်က စစ်ကိုင်းတိုင်းနှင့် တနင်္သာရီတိုင်းတွင် စစ်ကောင်စီအား လေယာဥ်ဆီဖြတ်တောက်ရေးလှုပ်ရှားမှု ပြုလုပ်ခဲ့သည်။