ဇေအောင်/People’s Spring
စစ်ကိုင်းတိုင်း၊ ကနီမြို့နယ်၊ နတ်ကြီးကျေးရွာအား စစ်ကောင်စီတပ်က လေကြောင်းတိုက်ခိုက်ခဲ့၍ လူထိခိုက်မှုမရှိသော်လည်း ရွာလုံးကျွတ်ထွက်ပြေးခဲ့ရကြောင်း သတင်းရရှိသည်။
ကနီမြို့နယ်၊ နတ်ကြီးကျေးရွာအနီးကို စစ်ကောင်စီက ယမန်နေ့(ဒီဇင်ဘာ ၃ ရက်) ည၇ နာရီမှ ၁၁ နာရီအတွင်း သုံးကြိမ် လေကြောင်းတိုက်ခိုက်ခဲ့ရာ ကျေးရွာအပြင်ကျ၍ လူထိခိုက်မှုမရှိကြောင်း ဒေသခံများက ပြောသည်။
“ လမ်းဘေးက တဲလေး ပျက်စီးတယ်။ လူထိခိုက်တာ မရှိဘူး။ တိုက်ပွဲမရှိဘဲ အကြောင်းမဲ့ပစ်တာ။” ဟု ကနီမြို့နယ် နွေဦးတော်လှန်ရေးသပိတ်အင်အားစု ဦးဆောင်သူ ကိုပြည့်အောင်နိုင်က ပြောသည်။
Public Service Announcement
ပေါင် ၅၀၀ ဗုံး ခြောက်လုံး ကြဲချတိုက်ခိုက်ခဲ့ခြင်းဖြစ်ပြီး နှစ်လုံးမှာ မပေါက်ကွဲသေးဘဲ မြေကြီးအောက် နစ်မြုပ်နေကြောင်း ဒေသခံများက ပြောသည်။
လေကြောင်းတိုက်ခိုက်မှုကြောင့် ဒေသခံပြည်သူများမှာ ထွက်ပြေးတိမ်းရှောင်နေရပြီး ယနေ့ ဒီဇင်ဘာ ၄ရက်အထိ ပြန်လည်ဝင်ရောက်ခြင်းမရှိသေးကြောင်း သိရသည်။
နတ်ကြီးကျေးရွာတွင် အိမ်ခြေ ၂၀၀နီးပါးရှိပြီး စစ်ကောင်စီတပ်၏ မီးရှို့ဖျက်ဆီးမှုကြောင့် နေအိမ် ၁၅၀ကျော် ပျက်စီးခဲ့ဖူးသည်။
စစ်ရေးအပါအဝင် အဘက်ဘက်မှ ရှုံးနိမ့်နေသောစစ်ကောင်စီသည် တော်လှန်ရေးအားကောင်းသောဒေသများအား လေကြောင်းတိုက်ခိုက်မှု ဆက်တိုက်ပြုလုပ်နေသည်။
နိုဝင်ဘာ ၃၀ ရက်ကလည်း ရှမ်းပြည်နယ်မြောက်ပိုင်းရှိ တအာင်းတပ်မတော်(TNLA) ထိန်းချုပ်ထားသည့် ကျောက်မဲမြို့ကို စစ်တပ်က လေကြောင်းမှ ဗုံးကြဲတိုက်ခိုက်ခဲ့ရာ သီလရှင်အပါအဝင် သေဆုံးသူ၁၀ဦးထက်မနည်း ရှိခဲ့သည်။
ဒီဇင်ဘာ ၂ ရက်နှင့် ၃ ရက်ကလည်း နွားထိုးကြီးမြို့နယ်အတွင်း လေကြောင်းတိုက်ခိုက်မှုများကြောင့် ပြည်သူ ၄ ဦး သေဆုံးခဲ့သေးသည်။
