ဇေအောင်/People’s Spring
စစ်ကိုင်းတိုင်း၊ မုံရွာမြို့ပေါ်တွင် လူသတ်ပြီး ကားလုပြေးသူများ လိုက်လံဖမ်းဆီးခဲ့ရာ ကျူးလွန်သူများက ကားထား၍ ထွက်ပြေးသွားသည်ဟု မုံရွာမြို့နယ်ပြည်သူ့လုံခြုံရေးအဖွဲ့ (ပလဖ) တာဝန်ရှိသူတစ်ဦးက ပြောသည်။
ယနေ့(ဒီဇင်ဘာ ၂၆ရက်) နံနက်ပိုင်းက မုံရွာမြို့ပေါ်တနေရာ၌ လက်နက်ကိုင်လူငယ်အချို့ကအမျိုးသမီးကို သေနတ်ဖြင့်ပစ်သတ်ပြီး ကားအား ယူဆောင်သွားခဲ့သည်။
ထို့ကြောင့် သက်ဆိုင်ရာနယ်မြေခံတော်လှန်ရေး အဖွဲ့များက ကားအား လိုက်လံရှာဖွေခဲ့ကြောင်း၊ လုယက်သူ လူငယ်များက အက်တောရပ်ကွက်လမ်းပေါ်တွင် ကားထား၍ ထွက်ပြေးသွားကြောင်း မုံရွာမြို့နယ်ပြည်သူ့လုံခြုံရေးအဖွဲ့၏ တာဝန်ရှိသူတစ်ဦးက ပြောသည်။
Public Service Announcement
“ကျူးလွန်သူတရားခံများရဲ့ သတင်းအချက်အလက်များကိုရရှိပြီးဖြစ်လို့ ဒေသခံတော်လှန်ရေးအဖွဲ့စည်းများနဲ့ပူးပေါင်းပြီး အမြန်ဆုံးဖမ်းဆီးသွားမှာဖြစ်ပါတယ်။ ပြည်သူလူထုသိရှိစေဖို့ ပြန်လည်ထုတ်ပြန်ပေးမှာပါ။”ဟု မုံရွာပလအဖွဲ့၏ တာဝန်ရှိသူတစ်ဦးက ပြောသည်။
ထိုနောက် အဆိုပါကားအနီးသို့ စစ်ကောင်စီတပ်က အိမ်စီးကားများဖြင့်ရောက်လာ၍ ပလဖနှင့် စစ်ကောင်စီတပ်ဖွဲ့ဝင်များကြား ပစ်ခတ်မှုခေတ္တ ဖြစ်ပွားခဲ့ကြောင်း သိရသည်။
မုံရွာမြို့၊ ဗိုလ်တေဇလမ်းမြောက်ပိုင်းဘက်(မန်ကျည်းပင်စျေးအနီး)၌ ကားလုယူခံရခြင်းဖြစ်ပြီး ကားပိုင်ရှင်အမျိုးသမီးမှာ သေနတ်ဖြင့် ၄ချက်ပစ်ခတ်ခံရပြီးနောက် သေဆုံးခဲ့ကြောင်း၊လုယက်သူများမှာ လူငယ်အမျိုးသားနှစ်ဦးနှင့် အမျိုးသမီးတစ်ဦးဖြစ်ကြောင်း စစ်ကောင်စီ၏ ဝါဒဖြန့်တယ်လီဂရန်ချန်နယ်များတွင် ရေးသားထားသည်။
၂၀၂၃ သြဂုတ်က မုံရွာမြို့၊ ထန်းတောရပ်ကွက်၊ အင်းဖြတ်လမ်းရှိ နေအိမ် ဓါးပြတိုက်ခံရပြီး သေနတ်ဖြင့် ပစ်ခတ်မှုကြောင့် ကိုယ်ဝန်ဆောင် အမျိုးသမီးတစ်ဦးသေဆုံးခဲ့သည်။
၂၀၂၂ ဒီဇင်ဘာ ၂၀ရက်ကလည်း မုံရွာမြို့၊ ဗိုလ်ချုပ်လမ်းပေါ်ရှိ ရွှေမုံရွာ ရတနာရွှေဆိုင်ဓားပြတိုက်ခံရပြီး ဆိုင်ရှင်အမျိုးသား သေနတ်ဖြင့် ပစ်ခတ်ခံခဲ့ရသည်။
မုံရွာမြို့ပေါ်တွင် အာဏာသိမ်းကာလတလျှောက် ရွှေဆိုင်များ၊အခြားစီးပွားရေးလုပ်ငန်းများ မကြာခဏ ဓါးပြတိုက်ခံနေရပြီး လူသေဆုံးသည့်ဓါးပြမှုများပင် ရှိခဲ့သည်။
