ရဲခေါင်/People’s Spring
လှိုင်မြို့နယ်၊ ၁၄ ရပ်ကွက်၊ ဘုရင့်နောင်လမ်းရှိ အမှတ် (၁) စစ်ကြောရေး နှင့် တည်းခိုရေးစခန်းမှ စစ်မှုထမ်းအပတ်စဥ် (၆) သင်တန်းဆင်းသူများကို မကွေးတိုင်းသို့ အားဖြည့်ရန် ယနေ့(ဒီဇင်ဘာ ၂၉ ရက်)တွင် စတင်ပို့ဆောင်နေကြောင်း ရန်ကုန် တိုင်း တပ်တွင်းသတင်းရင်းမြစ်တစ်ဦးက လူထုနွေဦး သို့ပြောသည်။
အမှတ် (၁) စစ်ကြောရေးနှင့် တည်းခိုရေးစခန်းစစ်မှု ထမ်းအပတ်စဥ် (၆)သင်တန်းဆင်းပွဲကို ဒီဇင်ဘာ ၂၆ ရက်က ပြုလုပ်ခဲ့ပြီး သုံးရက်အကြာတွင် မကွေးတိုင်း သို့ စစ်ကူအဖြစ်စေလွှတ်လိုက်ခြင်းဟု သိရသည်။
“ဒီမနက် ၉ ရက်မှာ Sino Truck ၁၂ စီးနဲ့ စထွက်တယ်။ အင်အား ၁၅၀ ပါတယ်။အားလုံးမကွေး ကို ပို့မှာ”ဟု အထက်ပါသတင်းရင်းမြစ်က ပြောသည်။
Public Service Announcement
အမှတ် (၁) စစ်ကြောရေးနှင့် တည်းခိုရေးစခန်းတွင် မရမ်းကုန်း၊လှိုင်၊ကမာရွတ် နှင့် လှိုင်သာယာ မြို့နယ်တို့မှ စစ်မှုထမ်းဥပဒေဖြင့် အဓမ္မ စုဆောင်းခံရသည့် လူငယ် များ ဖြစ်သည်။
ရခိုင်ပြည်နယ် အမ်းမြို့၊ ချင်းပြည်နယ်တောင်ပိုင်းဒေသကို အာရက္ခတပ်တော် (AA) နှင့် ချင်းတော် လှန်ရေးအင်အားစုများက သိမ်းပိုက်လိုက်ပြီးနောက် စစ်တပ်က လက်နက်ခဲယမ်း စက်ရုံများရှိရာ မကွေး တိုင်းကို စစ်သားများထပ်မံစေလွှတ် စစ်အားဖြည့်နေသည်။
“မကွေးနောက်ခြမ်း တစ်ခုလုံးက အရင်ကတည်းက တော်လှန်ရေးအင်အားစုဖွဲ့မှုကောင်းတဲ့အတွက် အခု ဆို စစ်ရှိန်ကလည်း အလိုအလျောက်ပါလာတဲ့ အ ခြေအနေ မှာ မဖြစ်မနေ နှစ်ဖက်တိုက်ပွဲတွေ ပို ဖြစ်လာမှာပဲ။နောက်တစ်ခုက ဧရာဝတီတိုင်းကို လည်း စောင့်ကြည့်ရလိမ့်မယ်”ဟု ပြည်တွင်းစစ်ရေးအခြေအနေကို လေ့လာသူတစ်ဦးက လူထုနွေဦးသို့ ပြောသည်။
စစ်ကောင်စီ၏ ကာကွယ်ရေးပစ္စည်းစက်ရုံ ၂၅ ခုရှိသည့်အနက် ၁၅ ခုမှာ မကွေးတိုင်းတွင် ရှိပြီး စစ်ကောင်စီ၏ အာဏာသိမ်းဒုခေါင်းဆောင် ဒုတိယဗိုလ်ချုပ်မှူးကြီးစိုးဝင်း သည်လည်း ယခုရက်ပိုင်း အတွင်း ဧရာဝတီတိုင်းသို့သွားရောက်ကာ စစ်သားသစ်များကို စစ်တိုက်ပေးရန်စည်းရုံးခဲ့သည်။
