ဟန်နွေ/People’s Spring
ချင်းပြည်နယ် မင်းတပ်မြို့သိမ်းတိုက်ပွဲ အောင်မြင်မှုရရှိခဲ့သည့် ချင်းဒေသကာကွယ်ရေးတပ်(CDF)-မင်းတပ်နှင့် ပြည်သူ့ကာကွယ်ရေးတပ်မတော်(PDF)မုံရွာခရိုင် တပ်ရင်း(၃)တို့မှ ရဲဘော်များကို သက်ဆိုင်ရာဒေသရှိ ဒေသခံပြည်သူများက ကြိုဆိုဂုဏ်ပြုခဲ့ကြသည်။
မင်းတပ်မြို့ကို ချင်းညီနောင်နှင့် မဟာမိတ်များက ဒီဇင်ဘာ ၂၁ရက်တွင် အပြီးသတ်သိမ်းနိုင်ခဲ့ခြင်းဖြစ်သည်။
မြို့သိမ်းတိုက်ပွဲအပြီး တိုက်ပွဲဝင် တပ်ဖွဲ့များက မူရင်းဒေသများသို့ ပြန်လာခဲ့ရာ အောင်ပွဲရ ရဲဘော်များကို ဂုဏ်ပြုကြိုဆိုပွဲများပြုလုပ်ခဲ့ကြောင်း မင်းတပ်ဒေသ သတင်းရင်းမြစ်နှင့် မုံရွာခရိုင် တပ်ရင်း(၃)တို့က ဓာတ်ပုံနှင့် ရုပ်သံမှတ်တမ်းများ ဖော်ပြအသိပေးသည်။
Public Service Announcement
အောင်ပွဲရတပ်ဖွဲ့များအနက် CDF တပ်ရင်း(၃)ရဲဘော်များအား ပြည်သူများက ကြိုဆိုသည့် အခမ်းအနားကို ဇန်နဝါရီ ၂ရက်က ပြုလုပ်ခဲ့သည်ကို မင်းတပ်ဒေသ သတင်းရင်းမြစ်နှင့် CDF-မင်းတပ် စစ်ဦးစီးချုပ် ဆလိုင်းထန်းချွန်းဖေတို့က ဓာတ်ပုံမှတ်တမ်းများ ဖော်ပြသည်။
အလားတူ မင်းတပ်မြို့သိမ်းတိုက်ပွဲတွင်ပါဝင်ခဲ့သည့် PDF မုံရွာခရိုင် တပ်ရင်း(၃) ရဲဘော်များ ကြိုဆိုသည့် ရုပ်သံကိုလည်း မုံရွာခရိုင် တပ်ရင်း(၃)က ယနေ့ ဇန်နဝါရီ ၃ရက်တွင် ဖော်ပြခဲ့သည်။
အောင်ပွဲရ ရဲဘော်များအား တော်လှန် မိဘပြည်သူများက အောင်သပြေနှင့် ကြိုဆိုခဲ့ကြောင်း မုံရွာခရိုင် တပ်ရင်း(၃)က ထုတ်ပြန်ခဲ့သည်။
မင်းတပ်မြို့သိမ်းတိုက်ပွဲကို ရက်ပေါင်း ၄၀ကျော်ကြာ ဆင်နွှဲခဲ့ရာ မုံရွာခရိုင် တပ်ရင်း ၃က ရဲဘော် ၇ဦးကျဆုံးခဲ့သည်။ အခြား CDF တပ်နှင့်မဟာမိတ်များမှ ရဲဘော်များလည်း ကျဆုံးထိခိုက်ရှိခဲ့သည်။
စစ်ကောင်စီဘက်ကလည်း သေဆုံးထိခိုက်များခဲ့ပြီး စစ်သုံ့ပမ်းများစွာနှင့်လက်နက်ခဲယမ်းများ သိမ်းရခဲ့သည်။
