ကျော်ဇော/People’s Spring
မကွေးတိုင်း၊ စလင်းမြို့နယ်၊ ဆင်ဖြူကျွန်းမြို့ရှိ ရဲစခန်းနှင့် မြို့နယ်အထွေထွေအုပ်ချုပ်ရေးမှူးရုံးကို ပစ်ခတ်တိုက်ခိုက်ခဲ့ကြောင်း ဆင်ဖြူကျွန်းမြို့ပြပြောက်ကျားတပ်ဖွဲ့မှ တာဝန်ရှိသူတစ်ဦးက ပြောသည်။
ဇန်နဝါရီ ၁ ရက် ညပိုင်းက စစ်ကောင်စီတပ်နှင့် ရဲအင်အား ၅၀ ခန့်ရှိနေသည့် ဆင်ဖြူကျွန်းနယ်မြေရဲစခန်းအဝင်ဂိတ်နေရာအနီးသို့ ဗုံးသီးပစ်ဖြင့် ဖောက်ခွဲတိုက်ခိုက်ခဲ့ခြင်းဟု ၎င်းက ပြောသည်။
“ရဲစခန်း ကင်းဂိတ်ကို ဗုံးနဲ့တိုက်ခိုက်ခဲ့တာပါခင်ဗျ။ စကစ ဘက်က ထိခိုက်မှုအခြေအနေတော့ မသိရှိရသေးပါဘူး”ဟု ဆင်ဖြူကျွန်း မြို့ပြပြောက်ကျားတပ်ဖွဲ့မှ တာဝန်ရှိသူတစ်ဦးက လူထုနွေဦးသို့ ပြောသည်။
Public Service Announcement
အလားတူ ဇန်နဝါရီ ၂ ရက် ညပိုင်းကလည်း ဆင်ဖြူကျွန်းမြို့ရှိ စစ်ကောင်စီ၏ ထွေအုပ်ရုံးကို ဗုံးသီးနှစ်လုံးဖြင့် ပစ်ခတ်တိုက်ခိုက်ခဲ့ကြောင်း ၎င်းက ဆက်ပြောသည်။
အဆိုပါ ထွေအုပ်ရုံး၌ စစ်ကောင်စီတပ်သားအချို့ အထိုင်ချတပ်စွဲထားပြီး တိုက်ခိုက်မှုအတွင်း ထိခိုက်သေဆုံးမှုရှိ၊မရှိ မသိရသေးပေ။
ပြီးခဲ့သည့် ဒီဇင်ဘာအတွင်း ဆင်ဖြူကျွန်းမြို့တွင် စစ်ကောင်စီတပ်မှ ကျေးရွာများသို့ ဝင်ရောက်ပေါ်တာဆွဲဖမ်းဆီးမှုများရှိခဲ့ရာ လူဦးရေဆယ်ဂဏန်း ဖမ်းဆီးခံခဲ့ရကြောင်း ဒေသခံများထံမှ စုံစမ်းသိရသည်။
