ဟန်နွေ/People’s Spring
အခြေခံစစ်သင်တန်း တက်ရောက်ရန် သင်တန်းသားအသစ်ခေါ်ယူကြောင်း ချင်းပြည်နယ်အခြေစိုက် ချင်းအမျိုးသားကာကွယ်ရေးတပ်(CNDF)က ဇန်နဝါရီ ၁၅ရက်တွင် ထုတ်ပြန်သည်။
ချင်းအမျိုးသားကာကွယ်ရေးတပ်ဖွဲ့ (CNDF)မှ ၂၀၂၅အတွက် အခြေခံစစ်သင်တန်းဖွင့်လှစ်မည် ဖြစ်၍ CNDFတွင် တာဝန်ထမ်းဆောင်ရန် သင်တန်းသားအသစ်စတင်ခေါ်ယူနေကြောင်း အသိပေးသည်။
“အားလုံးအတွက်ပါ။ ဘယ်သူမဆို မခွဲခြားဘဲနဲ့ CNDFတပ်ဖွဲ့ ဝင် ပြီး တော်လှန်ရေးမှာ တကယ်စိတ်ဓာတ်ရှိပြီးမှ တကယ်တော်လှန်ရေးလုပ်ချင်တဲ့လူငယ်တွေအကုန်လုံးကို ကျနော်တို့ ဖိတ်ခေါ်ပါတယ်”ဟု CNDF ပြောရေးဆိုခွင့်ရှိသူ ဆလိုင်းတီမီက ပြောသည်။
Public Service Announcement
စစ်အာဏာရှင်အမြစ်ပြတ်ချေမှုန်းရေးနှင့် ဖက်ဒရယ်ပြည်ထောင်စု တည်ဆောက်ရေးအတွက် ပါဝင်လိုသည့် လူငယ်(ကျား၊မ)မရွေး သင်တန်းသားအရည်အချင်းသတ်မှတ်ချက် ပြည့်မီပါက သင်တန်းတက်ရောက်နိုင်သည်ဟု အသိပေးသည်။
သင်တန်းကာလ (၃)လ ကြာမည်ဖြစ်ပြီး အသက် ၁၈ နှစ်မှ ၃၅ နှစ်အတွင်း လူငယ်များ တက်ရောက်နိုင်သည်ဟု ဆိုသည်။
ကိုယ်လက်အင်္ဂါပြည့်စုံသူ၊ ကျန်းမာရေးကောင်းမွန်သူ၊ စစ်စည်းကမ်းလိုက်နာနိုင်သူဖြစ်ရမည်ဖြစ်ပြီး CNDF တွင် အနည်းဆုံး (၁)နှစ် တာဝန်ထမ်းဆောင်နိုင်သူဖြစ်ရမည်ဟုလည်း ထုတ်ပြန်သည်။ ထို့ပြင် နေရာဒေသမရွေး တာဝန်ထမ်းဆောင်နိုင်သူဖြစ်ရမည်ဟုသင်တန်းသား အရည်အချင်းသတ်မှတ်ချက်၌ ဖော်ပြသည်။
CNDFသည် ချင်းညီနောင်အဖွဲ့ဝင် ဒေသကာကွယ်ရေးတပ်ဖြစ်ပြီးလက်ရှိတွင် ချင်းပြည်နယ် ဖလမ်းမြို့သိမ်း စစ်ဆင်ရေးကို ဆင်နွှဲလျက်ရှိရာ မြို့ကို ထိန်းချုပ်ထားပြီး လက်ကျန်စစ်ကောင်စီ ခလရ(၂၆၈)တပ်ရင်းဌာနချုပ်ကို ဆက်လက်ထိုးစစ်ဆင်လျက်ရှိသည်။
