ကဖေး/People’s Spring
ဧရာဝတီတိုင်း၊ သာပေါင်းမြို့နယ်အတွင်း ယနေ့(ဇန်နဝါရီ ၂၈ ရက်နေ့ )ဖြစ်ပွားသောတိုက်ပွဲ၌ သာပေါင်းမြို့မရဲစခန်းမှူး ဒုရဲမှူးဝင်းနိုင်ဦးသည် အာရက္ခတပ်တော်(AA)၏ စနိုက်ဘာကျည်ထိမှန်သေဆုံးသွားကြောင်း သတင်းရရှိသည်။
သာပေါင်းမြို့နယ်၊ ကျားခေါင်းရွာ၌ တိုက်ပွဲဖြစ်ပွားခြင်းဖြစ်ပြီး ဒုရဲမှူးဝင်းနိုင်ဦးသေဆုံးကြောင်း ဧရာဝတီတိုင်ရဲတပ်ဖွဲ့မှူးရုံးနှင့် နီးစပ်သူတဦးက လူထုနွေဦးသို့ အတည်ပြုပြောကြားသည်။
“စနိုက်ဘာ ထိတာတဲ့ဗျ။ သူ့တပည့် နယ်ထိန်းက ထွက်ပြေးလာတယ်” ဟု အဆိုပါသတင်းရင်းမြစ်ကပြောသည်။
Public Service Announcement
ကျားခေါင်းရွာသည် ဇန်နဝါရီလ ၁၆ ရက်နေ့က AAသိမ်းယူခဲ့သည့် ရွှေသောင်ယံမြို့၊ ဘောမိကျေးရွာနှင့် ဆက်စပ်တည်ရှိသည်။ ဘောမိရွာတိုက်ပွဲပြီးသည့်နောက်ပိုင်း သာပေါင်းမြို့နယ်အတွင်း တိုက်ပွဲဆက်ဖြစ်နေခြင်းဖြစ်သည်။
ဒုရဲမှူးဝင်းနိုင်ဦးသည် စစ်ကောင်စီထောက်ခံသည့် သဘောထားတင်းမာသူအဖြစ်လူသိများသည်။ပြီးခဲ့သည့် ဇန်နဝါရီလ ပထမလပတ်ကရွှေသောင်ယံမြို့၊ မကျီးစင်ကျေးရွာမှ ရဲတပ်ဖွဲ့ဝင်ရှစ်ဦး ထွက်ပြေးရာ စစ်ကောင်စီကပြန်လည်ဖမ်းမိပြီးနောက် သာပေါင်းရဲစခန်းသို့ပိုဆောင်ခဲ့သည်။
အဆိုပါရဲ့တပ်ဖွဲ့ဝင်ရှစ်ဦးသည် တော်လှန်ရေးအင်အားစုများထံ ထွက်ပြေးခြင်းဖြစ်ကြောင်း ဒုရဲမှူးဝင်းနိုင်ဦးက စွပ်စွဲကာ ရိုက်နှက်စစ်ဆေးခဲ့သည်ဟု စုံစမ်းသိရသည်။
မကျီးစင်ကျေးရွာကို ဇန်နဝါရီလ၈ရက်နေ့တွင် AAက တိုက်ခိုက်ပြီး သိမ်းယူထားပြီးဖြစ်သည်။
AA သည် စခန်းသိမ်းတိုက်ပွဲများတွင် စနိုက်ဘာကိုလည်း ကောင်းကောင်းအသုံးချနေပြီး အမ်းမြို့ရှိ အနောက်ပိုင်းတိုင်းစစ်ဌာနချုပ် (နပခ) သိမ်းတိုက်ပွဲတွင် စစ်ကောင်စီတပ်ဖွဲ့ဝင်များအား ပစ်ခတ်နေသည့်ရုပ်သံမှတ်တမ်းများကို ထုတ်ဖော်ပြသဖူးသည်။
ဧရာဝတီတိုင်း၊ပဲခူးတိုင်းနှင့် မကွေးတိုင်းနယ်စပ်ဒေသများ တွင် စစ်တပ်စခန်း နှင့် စစ်ကြောင်းများကို တိုက်ခိုက်ပြီး စခန်းများသိမ်းယူနေကြောင်း AAက ဇန်နဝါရီ ၂၇ ရက်ညတွင်သတင်းထုတ်ပြန်ထားသည်။ရခိုင်-ဧရာဝတီနယ်စပ်မှ စစ်ကောင်စီပွိုင့် (၂၆၃) စခန်း ပွိုင့် (၃၆၉) စခန်းကို ဇန်နဝါရီလ (၂၆ ) ရက်နှင့်ဇန်နဝါရီလ (၂၁ ) ရက်၌ သိမ်းယူခဲ့ကြောင်း AA က အသိပေးထားသည်။
