ဆဏ်း/People’s Spring
‘ကမ္ဘာမကြေဘူး’သီချင်းအပါအဝင် အနုပညာဖြင့် အာဏာရှင်ကိုတော်လှန်ခဲ့သည့် တေးရေးနိုင်မြန်မာသည် ယနေ့(ဖေဖော်ဝါရီ ၇ရက်) နံနက်တွင် နှလုံးရောဂါဖြင့် ကွယ်လွန်သွားကြောင်း ၎င်းနှင့်နီးစပ်သည့် အသိုင်းအဝိုင်းက ပြောသည်။
“အပါး ဦး (နိုင်မြန်မာ) ဒီမနက်မှာပဲ ကွယ်လွန်ပါတယ်၊ငြိမ်းချမ်းသွားပါပြီ အပါး၊လွတ်လပ်သွားရပါပြီ အပါးရေ”ဟု အဆိုတော်ဗျူဟာ၏ ဇနီးက ၎င်း၏ဖေ့စ်ဘွတ်ခ်တွင် ရေးသားထားသည်။
နိုင်မြန်မာသည် သန်လျင်မြို့နေအိမ်၌ ကွယ်လွန်ခြင်းဖြစ်ပြီး နာရေးအစီအစဉ်နှင့်ပတ်သက်၍ မသိရသေးပေ။
Public Service Announcement
နိုင်မြန်မာ၏ ကမ္ဘာမကြေဘူးသီချင်းသည် ၈၈ အရေးတော်ပုံကာလတွင် တော်လှန်သီချင်းဖြစ်ခဲ့သလို ၂၀၂၁ အရေးတော်ပုံတွင်လည်း ပြည်သူများအကြားထင်ရှားသည့် သီချင်းဖြစ်သည်။
နိုင်မြန်မာသည် ပြည်တွင်း၌သာနေထိုင်သောကြောင့် ကဗျာများရေးသား၍ ၎င်း၏ ရပ်တည်မှုကို ပြသခဲ့သည့် အနုပညာရှင်တစ်ဦးဖြစ်သည်။
ဝါဆို၊ ချစ်လူမိုက်၊ အခုတော့ပါးစပ်ရာဇဝင်လေး တစ်ခုဖြစ်လို့ကျန်၊ ပလက်ဖောင်းရှိုး စသည့်သီချင်းများအပါအဝင် အဆိုတော်များ၏ နာမည်ကြီးတေးသီချင်းများစွာကို ရေးသားခဲ့သည်။
နိုင်မြန်မာကွယ်လွန်သွားသည့်အပေါ် နှမြောတသဖြစ်ရကြောင်း အနုပညာအသိုင်းအဝိုင်းနှင့် ပရိသတ်များက ရေးသားထားကြသည်။
သားဖြစ်သူ ဗျူဟာသည် စစ်ကောင်စီ၏ လျှပ်စစ်မီးစီမံခန့်ခွဲမှုအပေါ် လူမှုကွန်ရက်မှ ဝေဖန်ခဲ့သောကြောင့် ထောင်ဒဏ် နှစ်(၂၀) ချမှတ်ခံထားရသည်။
