မန္တလေးမြို့မှာ ငလျင်ဒဏ်ကြောင့် ပြိုကျသွားတဲ့ အဆောက်အဦးအပျက်အစီးတွေကြား ပိတ်မိနေသူတွေ အများအပြားရှိနေဆဲလို့ မြို့ခံတွေကပြောပါတယ်။
မြို့အနှံ့ က ဘုရားစေတီတွေ ၊ သာသနာရေးဆိုင်ရာအဆောက်အဦးတွေ ၊ လူ နေအိမ်တွေ ၊ ဟိုတယ်တွေ ပြိုကျ ပျက်စီးခဲ့တာပါ။
အဆောက်အဦး အပျက်အစီးတွေကြား ပိတ်မိတွေသူတွေ ရှိနေပေမယ့် ကယ်ဆယ်ရေးဟာ ဝန်နဲ့အား မမျှဘူးလို့ မြို့ခံတွေဆီကသိရပါတယ်။
Public Service Announcement
” ခုရောက်နေတဲ့ အဆောက်အဦးထဲမှာ လူ ၁၀ယောက်လောက်ပိတ်မိနေတာ ၊ကယ်မထုတ်နိုင်သေးဘူး” လို့ အဆောက်အဦးတစ်ခုလုံးနီးပါးပြိုကျသွားတဲ့ နေရာဆီကိုရောက်နေတဲ့ မြို့ခံတစ်ဦးက ပြောပါတယ်။
လက်ရှိ ညပိုင်းမှာဆိုရင်လည်း မန္တလေးမြို့ခံတွေဟာ ငလျင်ထပ်မံ လှုပ်ခတ်မှာကို စိုးရိမ်နေတဲ့အတွက် နေအိမ်တွေမှာ မအိပ်ရဲတော့ဘဲ လမ်းတွေပေါ် ထွက်နေကြတယ်လို့သိရပါတယ်။
ဒီနေ့ မွန်းလွဲပိုင်း ၁၂ နာရီ ၅၀မိနစ်ဝန်းကျင်က ပြင်းအားရစ်ချ်တာစကေး ၇ ဒဿမ ၇ ရှိတဲ့ ငလျင်ကြီးက မန္တလေးမြို့ တဖက်ကမ်း စစ်ကိုင်းမြို့ ၊ ရေခါးအင်းကိုဗဟိုပြုပြီး မြေအနက် ၆ မိုင်ခန့် က လှုပ်ခတ်သွားတာပါ။
နောက်ဆက်တွဲ ငလျင်ကတော့ ၁၂ မိနစ်သာခြားပြီး မန္တလေးမြို့ ၊တံတားဦးမြို့နယ် ထဲက မန္တလေးလေဆိပ် နားကို ရစ်ချ်တာစကေး ၆ ဒဿမ၄ ပြင်းအား ရှိတဲ့ ငလျင် ကြီး ထပ်မံလှုပ်ခတ်ခဲ့တာဖြစ်ပါတယ်။
ငလျင်ကြောင့် တစ်နိုင်ငံလုံးအတိုင်းအတာနဲ့သေဆုံးသူ ၁၁၄ ဦး ၊ ထိခိုက်ဒဏ်ရာရသူ ၇၃၀ ရှိခဲ့တယ်လို့ အာဏာသိမ်းစစ်ကောင်စီခေါင်းဆောင်က ဒီနေ့ညပိုင်းမှာ ထုတ်ပြောပါတယ်။
စစ်ကောင်စီခေါင်းဆောင်ရဲ့ စာရင်းထဲမှာ မန္တလေးမြို့ ရဲ့ သေဆုံးထိခိုက်ဒဏ်ရာရသူစာရင်းကိုထည့်သွင်း ထားတာမရှိပါဘူး။
မန္တလေးမြို့ခံရဲ့ ပြောပြချက်အရ မန္တလေးမှာ ထိခိုက် ဒဏ်ရာရသူ ၊သေဆုံးသူများပြားတာကြောင့် မန္တလေးဆေးရုံကြီး ရှေ့ အပြင်ဘက် လမ်းပေါ်မှာတင် ဒဏ်ရာရသူတွေ ဆေးကုသမှု ခံယူဖို့ ပြည့်နှက်နေတယ်လို့ သိရပါတယ်။
