မတ် ၂၉၊၂၀၂၅။ ဟန်နွေ/People’s Spring
ငလျင်ဒဏ်ကြောင့် ဒဏ်ရာထိခိုက်ဒဏ်ရာရသူများအား အခမဲ့ကုသမှု ပေးမည်ဖြစ်ကြောင်း ကိုးကန့်တပ်မတော်(MNDAA) သိမ်းပိုက်ထားသည့် လားရှိုးမြို့ မြို့ပြန်လည်ထူထောင်ရေးတာဝန်ရှိသူက အသိပေးသည်။
MNDAA၏ အထူးဒေသ(၁) ငလျင်ဒဏ်ကူညီကယ်ဆယ်ရေးအဖွဲ့က အရေးပေါ် ကြေညာချက် ကို လားရှိုးမြို့ပြန်လည်ထူထောင်ရေး တာဝန်ရှိသူက ဖော်ပြခြင်းဖြစ်သည်။
မတ်လ ၂၈ရက် မွန်းလွဲပိုင်းက လှုပ်ခတ်ခဲ့သည့် အင်အားပြင်းငလျင်ဒဏ်ကြောင့် မန္တလေးမြို့၊စစ်ကိုင်းမြို့နှင့် စပ်ဆက်ဒေသများတွင် ထိခိုက်ဒဏ်ရာရရှိသူများစွာရှိခဲ့ပြီး ယင်းဒေသများ အထူးသဖြင့်မန္တလေး၌ လူနာနှင့် ဆရာဝန် မမျှတဘဲ လိုအပ်ချက်များစွာရှိနေချိန် MNDAA ဘက်က ယခုကဲ့သို့ အသိပေးလာခြင်းဖြစ်သည်။
Public Service Announcement
အထူးဒေသ(၁)လားရှိုးမြို့ကျန်းမာရေးဌာနမှ လူသားချင်းစာနာထောက်ထားမှုပြည့်ဝစွာဖြင့် ငလျင်ဒဏ်ကြောင့် ၎င်းဒေသများမှ ထိခိုက်ဒဏ်ရာရရှိသူများ လာရောက်ဆေးကုသမှုခံယူပါက အခမဲ့ကုသပေးမည်ဖြစ်ကြောင်း အထူးဒေသ(၁)ကျန်းမာရေးဌာနမှ တာဝန်ရှိသူတစ်ဦးက ပြောသည်ဟု အသိပေးထားသည်။
လုံခြုံရေးအခြေအနေများကြောင့် ငလျင်ဒဏ်သင့် ဒေသများရှိလူနာများအား သွားရောက် ခေါ်ယူဆေးကုသမှုမပြုနိုင်သော်လည်း အရေးကြုံလာပါက ကူညီကယ်ဆယ်ရန် အထူးဒေသ(၁)ကျန်းမာရေးဌာနနှင့်အခြားသက်ဆိုင်ရာဌာနများ၊လူမှုကူညီရေးအသင်းအဖွဲ့များမှ အသင့်ပြင်ဆင်ထားကြောင်းလည်း ထုတ်ပြန်သည်။
ထို့အပြင် လူအင်အား၊ဆေးပစ္စည်းများနှင့်သယ်သူပို့ဆောင် ရေးယာဉ်များကိုလည်း အဆင်သင့်ပြင်ဆင်ထားရှိကြောင်း ကြေညာထားသည်။
MNDAAက ထို့သို့ ပြင်ဆင်မှုများ ပြုလုပ်ထားသော်လည်း စစ်ကောင်စီသည် ငလျင်လှုပ်ခတ်အပြီးတွင် နောင်ချို ၊ ချောင်းဦး နှင့်ဖြူးမြို့နယ်ကို လေကြောင်း ဗုံးကြဲတိုက်ခိုက်ခဲ့သည်။
