ဧပြီ ၉၊၂၀၂၅။ရဲခေါင်/People’s Spring
အင်အားပြင်းငလျင်ကြောင့် ပြည်သူများဘေးသင့်နေချိန် စစ်ကောင်စီ၏ လေကြောင်းနှင့် လက်နက် ကြီးတိုက်ခိုက်မှုကြောင့် ကလေးငယ် ခြောက်ဦးအပါအဝင် အရပ်သားပြည်သူ ၇၀ကျော် အသက်ဆုံးရှုံးခဲ့ရကြောင်း အမျိုးသားညီညွတ်ရေးအစိုးရ(NUG) ယနေ့(ဧပြီ ၉ ရက်)တွင် ထုတ်ပြန်သည်။
မတ်လ ၂၈ရက်က စစ်ကိုင်းငလျင်ကြီးလှုပ်ခတ်အပြီး တစ်ပတ်အတွင်း စစ်ကောင်စီသည် လေကြောင်းနှင့် လက်နက်ကြီးဖြင့် တိုက်ခိုက်မှု (၉၂)ကြိမ် ပြုလုပ်ခဲ့ကြောင်း NUGက အသိပေးသည်။
ထိုသို့ တိုက်ခိုက်မှုများကြောင့် (၁၈)နှစ်အောက် ကလေးငယ်ခြောက်ဦး၊ အမျိုးသမီး ၃၀ အပါအဝင် အရပ်သားပြည်သူ (၇၂) ဦး အသက်ဆုံးရှုံးခဲ့ရသည်ဟု ဆိုသည်။
Public Service Announcement
ငလျင်ဘေးဒဏ်ကို အဆိုးဝါးဆုံးခံစားခဲ့ရသည့် စစ်ကိုင်းတိုင်းအတွင်း စစ်ကောင်စီ၏တိုက်ခိုက်မှု ၁၈ကြိမ်နှင့် မန္တလေးတိုင်းအတွင်းလည်း ၁၈ ကြိမ် တိုက်ခိုက်ခဲ့သည်ဟု ဖော်ပြသည်။
အဆိုပါ စာရင်းအချက်အလက်များသည် မတ်လ ၂၈ရက် နေ့လည် ၁ နာရီမှ ဧပြီ ၈ ရက် နေ့လည် ၂ နာရီအထိ NUG လူ့အခွင့်အရေးဆိုင်ရာ၀န်ကြီးဌာနက အတည်ပြုရရှိထားသောအချက်အလက်များ ဟု ဆိုသည်။
“ဒီကောင်တွေကို ဘယ်တုန်းက ယုံကြည်ခဲ့ရလို့လည်း ။အခုလိုကာလမှ မဟုတ်ဘူး။ အရင်တုန်းကတည်းက ယုတ်မာစွာနဲ့ အာဏာသိမ်းခဲ့တာပဲ။ ကျွန်တော်တို့ တော်လှန်လူထုအနေနဲ့ ကလည်း လုပ်စရာရှိတာ လုပ်ရမယ်”ဟု ငလျင်ဘေးသင့်ချိန်တွင် စစ်ကောင်စီ၏ ယာယီအပစ်ရပ်မည်ဆိုသည့်အပေါ် ရေးဘီလူးအဖွဲ့ခေါင်းဆောင်က လူထုနွေဦးသို့ ပြောသည်။
“ညောင်ရွှေမြို့နယ်တောင်ဘက်ခြမ်းကို နေ့စဥ်နဲ့အမျှ ဒရုန်း၊လက်နက်ကြီးနဲ့ စစ်ကောင်စီက ပိုမိုပစ်ခတ်လာတယ်”ဟု ငလျင်လှုပ်ခတ်မှုအပြီး စစ်ကောင်စီ၏ စစ်ရေးလှုပ်ရှားမှုကို အင်းလေး PDFမှ ကိုအင်းသွေးနီက ရှင်းပြသည်။
စစ်ကောင်စီ၏ တိုက်ခိုက်မှုနှင့် သေဆုံးထိခိုက်သည့် ပြည်သူအရေအတွက်မှာ ယခုထက်ပိုမိုများပြားနိုင်ပြီး ထပ်တိုးစာရင်းများ ရှိနိုင်သည်ဟုလည်း ဆိုသည်။
