■လားရှိူးမြို့မှ ထွက်ခွာမည်ဟုသတင်းထွက်နေစဉ် MNDAA က ရာဇဝတ်မှုစီရင်ခြင်းအခမ်းအနားပြုလုပ်ခြင်းဖြစ်
ဧပြီ ၁၀၊၂၀၂၅။ကဖေး/People’s Spring
လာမည့်ရက်ပိုင်းအတွင်း လားရှိုးမြို့မှ ကိုးကန့်တပ်မတော်(MNDAA) ပြန်ဆုတ်ခွာမည်ဟု သတင်းများထွက်ပေါ်နေသော်လည်း လားရှိူးမြို့တွင် ရာဇဝတ်မှု စီရင်ခြင်းအခမ်းအနားကို MNDAA က ယနေ့ (ဧပြီ ၁၀ရက်) နံနက်ပိုင်းတွင် ပြုလုပ်ခဲ့သည်။
ပြည်ထောင်စုမြန်မာနိုင်ငံအထူးဒသ(၁) ရာဇဝတ်မှုစီရင်ခြင်းအခမ်းအနား (လားရှိုးမြို့)ဟု MNDAA သတင်းထုတ်ပြန်ရေးအဖွဲ့ဝင်တစ်ဦးက လူမှုကွန်ရက်တွင် ဖော်ပြထားသည်။
Public Service Announcement
သေဒဏ်ပါဝင်သည့် ရာဇဝတ်မှုစီရင်ခြင်းအခမ်းအနားဖြစ်ပြီး စီရင်မည့်နေရာသို့ တရားခံအချို့ ခေါ်ဆောင်သွားသည်ကိုတွေ့ရသည်ဟု မြို့ခံအချို့က ပြောသည်။ တရားခံများနှင့် ပတ်သက်၍ အသေးစိတ်မသိရှိရသေးဘဲ MNDAA ကလည်း တရားဝင် မထုတ်ပြန်သေးပေ။
အရှေ့မြောက်တိုင်းစစ်ဌာနချုပ်(ရမခ)အပါအဝင် လားရှိုးမြို့ကို MNDAAပူးပေါင်းတပ်က၂၀၂၄ သြဂုတ်တွင် သိမ်းပိုက်ထိန်းချုပ်ခဲ့ပြီး အထူးဒေသ(၁)အဖြစ် ထည့်သွင်းသတ်မှတ်ကာ အုပ်ချုပ်ရေးယန္တရားအသက်သွင်းနေစဉ် တရုတ်အစိုးရ၏ ဖိအားကြောင့် လာမည့်ရက်ပိုင်းအတွင်း MNDAAတပ်များ ပြန်ဆုတ်ခွာမည်ဟု သတင်းများထွက်ပေါ်နေသည်။
MNDAAက ခန့်ထားပြီး မြို့အုပ်ချုပ်ရေးယန္တရားများ ပါဝင်ဆောင်ရွက်ပေးနေသည့် ဝန်ထမ်းများ၊ ဆေးရုံဝန်ထမ်းများသည် မတ်လနှောင်းပိုင်းမှစ၍ လောက်ကိုင်သို့ အသုတ်လိုက်ထွက်ခွာနေကြောင်း ဒေသခံသတင်းရင်းမြစ်က ပြောသည်။
သို့သော် MNDAAသည် ယခုရက်ပိုင်းအတွင်း၌ ၁၀၂၇ စစ်ဆင်ရေးကာလအတွင်း တိုက်ပွဲများကြောင့် ပျက်စီးခဲ့သည့် လားရှိုးမြို့မှ နေအိမ်များအား ငွေသားထောက်ပံ့ခြင်း၊ တိုက်ပွဲအတွင်းကျဆုံးခဲ့သည့် တပ်ဖွဲ့ဝင်များအား သူရဲကောင်းဘွဲ့နှင့်ဂုဏ်ထူးဆောင်တံဆိပ် ချီးမြှင့်ခြင်းများပြုလုပ်ခဲ့သည်။
MNDAA အနေဖြင့် လားရှိုးမြို့လက်ရှိအခြေအနေကို တိတိကျကျ ထုတ်ပြန်ပေးရန် မြို့ခံများက တောင်းဆိုနေသည်။ လက်ရှိသတင်းများ ကျယ်ကျယ်ပြန့်ပြန့်ထွက်နေသော်လည်း MNDAAကမူ နှုတ်ဆိတ်နေဆဲဖြစ်သည်။
MNDAA အုပ်ချုပ်မှုအောက်တွင် လုပ်ငန်းခွင်ဝင်နေသည့် CDMဝန်ထမ်းများသည် စစ်ကောင်စီ၏ အုပ်ချုပ်မှုအောက် ပြန်လည်ရောက်ရှိမည်ကို စိုးရိမ်နေကြသည်။
