ဧပြီ ၂၂၊ ၂၀၂၅။Scorpio/People’s Spring
အမရပူရမှာ ငလျင်လှုပ်ပြီးနောက်ပိုင်း မြေလွှာတုန်ခါစေတဲ့ စက်ရက်ကန်းစင်တွေ ပြန်မလုပ်ဖို့ ယာယီ တားမြစ်ထားတယ်လို့ ဒေသခံတွေက ပြောပါတယ်။
အမရပူရမြို့ပေါ်မှာ ငလျင်ကြောင့် ပြိုလုလုအဆောက်အဦးတွေ အများကြီး ကျန်နေသေးကြောင်း၊ စက်ရက္ကန်းပြန်ခတ်ရင် မြေလွှာတုန်ခါမှုဖြစ်ပြီး ပြိုကျလာမှာစိုးရိမ်လို့ ပြိုတာများတဲ့ရပ်ကွက်တွေမှာ စက်ရက်ကန်းစင်တွေ လက်တလော ပြန်မခတ်ဖို့ သက်ဆိုင်ရာက တားမြစ်ထားတယ်လို့ ဒေသခံတချို့က ပြောပါတယ်။
“ တစ်လတားထားတယ်ပြောတယ်။ ခတ်တဲ့ရပ်ကွက်လည်း ခတ်နေကြတာ။ အကြာကြီးနားထားဖို့တော့ အဆင်မပြေဘူး။” လို့ စက်ရက်ကန်းလုပ်ကိုင်သူတဦးက ပြောပါတယ်။
Public Service Announcement
စက်ရက်ကန်းလုပ်ငန်းဟာ အမရပူရမြို့ရဲ့အဓိက လုပ်ငန်းဖြစ်နေတာတာကြောင့် စားဝတ်နေရေး အခက်အခဲတွေ တွေ့နေရတယ်လို့ ဒေသခံတွေက ပြောပါတယ်။
ငလျင်ကြောင့် ပြိုကျတဲ့တိုက်အများစုဟာလည်း ရက်ကန်းလုပ်ငန်းလုပ်ကိုင်တဲ့ရပ်ကွက်တွေမှာ အများစုတည်ရှိနေပြီး အပြိုအပျက်ရှင်းလင်းရေးကိုတောင် ကောင်းကောင်းမလုပ်နိုင်ကြသေးဘူးလို့ မြို့ခံတွေက ပြောပါတယ်။
အမရပူရမြို့မှာ ပြီးခဲ့တဲ့ မတ်လ ၂၈ ရက်က လှုပ်ခတ်ခဲ့တဲ့ငလျင်ကြောင့် မြို့ပေါ်တခုတည်း ၁၂၄ ဦးသေဆုံးကြောင်း၊ ဘုံးအိုးရွာနဲ့ အခြားကျေးရွာတွေက သေဆုံးမှုတွေပေါင်းပါက လူဦးရေ ၃၀၀ ကျော် သေဆုံးခဲ့ကြောင်း ဒေသခံတွေက ပြောပါတယ်။ ဒါ့အပြင် အမရပူရမြို့ပေါ်နဲ့ ကျေးရွာတွေမှာ အဆောက်အအုံရာချီ ပျက်စီးခဲ့ပါတယ်။
