စဉ့်ကူးနဲ့ မတ္တရာကို စစ်တပ် ဗုံးကြဲ၊ အမျိုးသမီးတစ်ဦးသေဆုံး

ဧပြီ ၂၈၊ ၂၀၂၅။ People’s Spring

မန္တလေးတိုင်း၊ စ‌‌ဉ့်ကူးနဲ့ မတ္တရာမြို့နယ်တို့မှာ စစ် ‌‌‌ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာမို့ အမျိုးသမီးတစ်ဦး သေဆုံးပြီးဘုန်းကြီးကျောင်းအပါအဝင် နေအိမ်တွေ ပျက်စီးခဲ့တယ်လို့ ပြင်ဦးလွင်ခရိုင်ပကဖ သတင်းတာဝန်ခံကပြောပါတယ်။

ဧပြီ ၂၆ရက် ည ၉နာရီကျော်မှာ ဂျက်ဖိုက်တာတစ်စီးနဲ့ ရုန်းပင်ကျေးရွာကို စစ်တပ်က လေ ကြောင်းတိုက်ခိုက်ခဲ့တာမို့ အမျိုးသမီးတစ်ဦးထိမှန် သေဆုံးပြီး နေအိမ်တွေ ပျက်စီးခဲ့တယ်လို့ ဆိုပါတယ်။ ရုန်းပင်ကျေးရွာဟာ မတ္တရာမြို့နယ်အရှေ့ခြမ်းမှာရှိပြီး အရှေ့ခြမ်းမှာ ကျောက်တံတားရွာနဲ့ ထန်းပင်ကုန်းရွာတွေမှာ စစ်တပ်နဲ့ တော်လှန်ရေးတပ်တွေ နေ့စဉ်နီးပါးတိုက်ပွဲတွေဖြစ်ပွားနေတာလို့ သိရပါတယ်။

“တိုက်ပွဲဖြစ်နေကျနေရာတွေနဲ့ အခုဗုံးကြဲတဲ့ နေရာက ၅မိုင်လောက်ဝေးပါတယ်။ အရပ်သား တွေကို ပစ်မှတ်ထား တိုက်ခိုက်တဲ့သဘောပေါ့”လို့ ဒေသခံတစ်ဦးက ပြောပါတယ်။

Public Service Announcement

ဒါ့အပြင် ဧပြီ ၂၇ ရက် မနေ့ မနက်၁၀နာရီခွဲမှာလည်း စဉ့်ကူးမြို့ပေါ်က အထက စာသင် ကျောင်းအရှေ့ဘက်နဲ့ မဟာဝေယံဘုံသာဘုန်းကြီး ကျောင်းတို့ကို စစ်တပ်က ပေါင် ၂၅၀ဗုံးတွေနဲ့ ဗုံးကြဲတိုက်ခိုက်ခဲ့တယ်လို့ သိရပါတယ်။

စဉ့်ကူးမြို့ခံပြည်သူတွေက မြို့ထဲမနေသေးတာမို့အထိခိုက်မရှိဘဲ အဆောက်အဦးသုံးလုံးပျက်စီးခဲ့တယ်လို့ ပြင်ဦးလွင်ခရိုင်ပကဖသတင်းတာဝန်ခံက ပြောပါတယ်။

စစ်ကောင်စီက ဒီလအတွင်း မန္တလေးတိုင်းအတွင်းက မြင်းခြံ၊ တောင်သာ၊ နွားထိုးကြီး၊ မတ္တရာ၊ စဉ့်ကူးနဲ့ သပိတ်ကျင်းမြို့နယ်တို့ကို လေ ကြောင်းတိုက်ခိုက်မှုတွေ ဆက်တိုက်ပြုလုပ် နေပြီး ပြည်သူ ၅၀ဦးထက်မနည်းထိမှန် သေဆုံးထားပါတယ်။