မေ ၁၄၊၂၀၂၅။ဇော်ရမ်း/People’s Spring
ရခိုင်ပြည်နယ်၊ ကျောက်တော်မြို့တွင် မေလ ၁၃ ရက်က မိုးသက်လေပြင်းကျနေစဉ် မိုးကြိုးပစ်၍ ကလေးငယ်တစ်ဦးအပါအဝင် လူဦး သေဆုံးခဲ့ရသည်။
ကျောက်တော်မြို့၊ဇင်းခါရှည်ကျေးရွာတွင် မေလ ၁၃ရက် ညနေ ၃နာရီခန့်က မိုးသက်လေပြင်းကျပြီး နေအိမ်တစ်လုံးအား မိုးကြိုးပစ်ခြင်းဟု သတင်းရရှိသည်။
” မိုးရော၊လေပါ ချတာ။ လေပြင်းကြောင့်တော့ ထိခိုက်တာမရှိခဲ့ဘူး။ မိုးကြိုးပစ်တာမှာတော့ လူသေတဲ့အထိဖြစ်တာ”ဟု ဒေသခံများနှင့်အဆက်အသွယ်ရှိသည့် ရခိုင်သတင်းရင်းမြစ်က ပြောသည်။
Public Service Announcement
မိုးကြိုးထိမှန်သည့် နေအိမ်မှ အသက်(၄)နှစ်အရွယ် မိန်းကလေးတစ်ဦးအပါအဝင် အမျိုးသမီးနှစ်ဦး၊ အမျိုးသားတစ်ဦးသေဆုံးခဲ့သည်ဟု ဆိုသည်။ ကျောက်တော်မြို့တွင် ယနေ့(မေလ ၁၄ရက်) ညနေ ၃ နာရီ ၅၁မိနစ်ကလည်း စစ်ကောင်စီက လေကြောင်းမှ ဗုံးကြဲ၍ စစ်ဘေးရှောင်အမျိုးသမီးတစ်ဦးသေဆုံးပြီး လေးဦး ဒဏ်ရာရခဲ့သည်။
ဘင်္ဂလားပင်လယ်အော်တွင် ယခုရက်ပိုင်းအတွင်း လေဖိအားနည်းရပ်ဝန်းဖြစ်နိုင်ပြီး ဒေသအများစုတွင် မွန်းလွဲ၊ ညနေပိုင်း အချိန်များ၌ လေပြင်းတိုက်ခတ်ခြင်း၊ မိုးတိမ်တောင်ကြီးများ ဖြစ်ပေါ်တတ်ခြင်း၊ နေရာကွက်၍ မိုးကြီးခြင်း၊ မိုးသီးများကြွေကျခြင်း၊ လျှပ်စီးလက်ခြင်းနှင့် မိုးကြိုးပစ်ခြင်း စသည့်ဘေးအန္တရာယ်များ ဖြစ်ပေါ်နိုင်ကြောင်း အမျိုးသားညီညွတ်ရေးအစိုးရ၊လူသားချင်းစာနာထောက်ထားရေးနှင့်ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာန (MOHADM)က သတိပေးထားသည်။
နွေကာလဖြစ်သည့် မတ်လမှ မိုးဦးကာလဖြစ်သည့် မေလအထိ လေထုမတည်မငြိမ်ဖြစ်စဥ်ကြောင့် မိုးသက်လေပြင်းနှင့် မိုးကြိုးအန္တရာယ် ကြီးမားသည်။
ငလျင်ဘေးသင့်ဒေသများအပါအဝင် တိုင်းနှင့်ပြည်နယ်အချို့တွင် နေရာကွက်မိုးကြီးခြင်း၊ မိုးသက်လေပြင်းကျခြင်းတို့ ဖြစ်ပေါ်ခဲ့သည်။
ပြီးခဲ့သည့် ဧပြီ၂၈ရက်ကလည်း ရှမ်းပြည်နယ်မြောက်ပိုင်း၊ ကွတ်ခိုင်မြို့နယ်တွင် မိုးသက်လေပြင်းကျပြီး မိုးကြိုးပစ်ရာ အမျိုးသားသုံးဦးသေဆုံးခဲ့ကြောင်း တအာင်းအမျိုးသားလွတ်မြောက်ရေးတပ်မတော်(TNLA)က ထုတ်ပြန်ထားသည်။
