မြဝတီမြို့ တောင်ဘက်ရှိ ထိုင်းနယ်စပ်က စခန်းတွေကို KNU စတင်တိုက်ခိုက်

မေ – ၂၂ ၊၂၀၂၅ ၊ နိုင်ပကောင်း/People’s Spring

ကရင်ပြည်နယ်၊ မြဝတီမြို့တောက်ဘက် ၊ ဒေါနတောင်တန်းအရှေ့ခြမ်းမှာ တပ်စွဲထားတဲ့ စစ်ကောင်စီတပ်ရဲ့ ကနဲလေး စခန်းအပါအဝင် တပ်စခန်း ၄ ခုကို KNU တပ်မဟာ (၆) ဦးစီးတဲ့ ပူးပေါင်းတပ်က တိုက်ခိုက်နေပြီလို့ ကရင်စစ်ရေးသတင်းရင်းမြစ်ထံကသိရပါတယ်။

ဝေါ်လေ ၊ ကနဲလေး၊ ဘလက်ဒို ၊မော်ခီး နဲ့ သေဘောဘိုး ရွာတွေအနီး အခြေစိုက်တပ်စွဲထားတဲ့ တပ်စခန်း ၄ ကို ဒရုန်းစတင်တိုက်ခိုက်နေတာဖြစ်ပြီး တိုက်ပွဲပြင်းထန်နေတယ်လို့သိရပါတယ်။

အဲဒီ တပ်စခန်းတွေဟာ KNU တပ်မဟာ (၆) စစ်ရေးလှုပ်ရှားရာနယ်မြေထဲရှိပြီး မေလ ၂၀ ရက်မှာ မော်ခီစခန်း ကို စတိုက်ပြီး မနေ့ (မေလ ၂၁ ) ရက်မှာတော့ ကနဲလေးစခန်း၊ သေဘောဘိုစခန်း နဲ့ ဘလက်ဒိုစခန်းတို့ ဆက်လက်တိုက်ခိုက်ခံရတာပါ။

Public Service Announcement

ထိုင်းနယ်စပ်ရင်းမြစ်တွေကတော့ မြန်မာဘက်ခြမ်းက တိုက်ပွဲတွေကြောင့် နယ်စပ်တလျှောက်ကို ထိုင်းစစ်တပ်က အနီးကပ် စောင့်ကြည့်နေတယ်လို့ ဖော်ပြကြပါတယ်။

လက်ရှိတိုက်ခိုက်နေတဲ့ ဝေါ်လေမြို့က သေဘောဘိုး စခန်းနဲ့ မော်ခီး စခန်းတွေကို ပြီးခဲ့တဲ့ ၂၀၂၂ ခုနှစ်အတွင်း KNU က သိမ်းယူခဲ့ဖူးပါတယ်။ ဒါပေမယ့် စစ်ကောင်စီတပ်က တန်ပြန်ထိုးစစ်ဆင်ရာမှာတော့ အဲဒီစခန်းနှစ်ခုကို KNU ပြန်လည်လက်လွှတ်ခဲ့ရတာပါ။

KNU ဟာ ထိုင်း – မြန်မာ နယ်စပ်တလျှာက်မှာရှိတဲ့ တပ်မဟာ (၇) စစ်ရေးလှုပ်ရှားရာ နယ်မြေထဲက စစ်ကောင်စီတပ်စခန်းအားလုံးနီးပါးကိုတိုက်ခိုက်သိမ်းယူပြီးနောက် အခုအခါမှာတော့ တပ်မဟာ ( ၆) ဘက်က နယ်စပ်စခန်းတွေကို ဆက်လက်တိုက်ခိုက်လာတာတွေ့ရပါတယ်။