မေ ၂၉၊ ၂၀၂၅။မေရီ/People’s Spring
စစ်ကိုင်းတံတားသစ်(ရတနာပုံ)တံတားကိုပိတ်ထားခြင်းမရှိဘဲ ပုံမှန်အတိုင်း ဖြတ်သန်းခွင့်ပြုထားတယ်လို့ ဒေသခံတွေက ပြောပါတယ်။
စစ်ကိုင်းငလျင်ကြီးကြောင့် ပျက်စီးမှုတချို့ရှိခဲ့တဲ့ ရတနာပုံတံတားကို ဒီကနေ့ မေလ (၂၉)ရက်ကစပြီး သွားလာမှုပိတ်တော့မယ်လို့ သတင်းတွေ ထွက်ပေါ်ခဲ့ပါတယ်။ ဒါပေမဲ့ ဒီကနေ့မှာ ပိတ်ထားတာမျိုးမရှိဘဲ ပုံမှန်အတိုင်း သွားလာလို့ရတယ်လို့ စစ်ကိုင်းမြို့ခံတွေက ပြောပါတယ်။
“သတင်းအမှားပါ။ ပိတ်တာပြုတာမရှိပါဘူး။”လို့ စစ်ကိုင်းက မြို့နယ်အုပ်ချုပ်သူတွေနဲ့ နီးစပ်သူတစ်ဦးက ပြောပါတယ်။
Public Service Announcement
ဒါပေမဲ့ စစ်ကိုင်းမြို့အဝင် စစ်ကောင်စီစစ်ဆေးရေးဂိတ်မှာတော့ ပုံမှန်ထက်ပိုပြီး စစ်ဆေးတင်းကြပ်တာတွေရှိနေတယ်လို့ ဖြတ်သန်းသွားလာခဲ့သူတွေက ဆိုပါတယ်။
ရတနာပုံတံတားဟာ စစ်ကိုင်းငလျင်ကြီးမှာ ပျက်စီးမှုတချို့ ရှိခဲ့ပြီး ယနေ့အချိန်ထိ ကုန်တင်ကားကြီးတွေကို ဖြတ်သန်းမှုပိတ်ပင်ထားပါတယ်။ တကယ်လို့ တံတားကြီးကို ပြန်လည်စစ်ဆေးပြီး ပြုပြင်တာတွေလုပ်မယ်ဆိုရင် အချိန်အတန်ကြာ ပိတ်ထားရမယ့်အခြေအနေရှိကြောင်း နီးစပ်သူအင်ဂျင်နီယာတချို့က ပြောပါတယ်။
ရတနာပုံတံတားပေါ် ကုန်တင်ယာဥ်ကြီးတွေ ဖြတ်သန်းခွင့်ပိတ်ထားလို့ အဲဒီယာဥ်တွေဟာ သင်္ဘောတွေနဲ့ ဧရာဝတီမြစ်ကို ဖြတ်ကူးနေရတာကြောင့် သယ်ယူစရိတ်တွေ ပိုမိုများပြားနေကြောင်း သိရပါတယ်။
