ဇွန်-၁၉၊၂၀၂၀။ထားမြတ်/People’s Spring
ကချင်ပြည်နယ် ဖားကန့်မြို့နယ်တွင် စစ်ကောင်စီတပ်နှင့် ကချင်လွတ်လပ်ရေးတပ်မတော်(KIA) ပူးပေါင်းတပ်အကြား တိုက်ပွဲများ ဆက်တိုက်ဖြစ်ပွားလျက်ရှိရာ မှော်စီစာရွာအနီးဇွန်လ ၁၆ရက်နှင့် ၁၇ရက် တိုက်ပွဲများ၌ စစ်ကောင်စီတပ် သေဆုံးထိခိုက်မှုများခဲ့ပြီး သေဆုံးသူများထဲတွင် တပ်မ(၃၃) မှ စစ်ဦးစီးမှူး (ဒုတိယတန်း)-ဂျီတူး ဗိုလ်မှူးဖြိုးသက်ဇော်လည်း ပါဝင်ခဲ့ဟု စစ်ရေး သတင်းရင်းမြစ်အချို့က ပြောသည်။
ဇွန်လ ၁၈ ရက်က တိုက်ပွဲဖြစ်ခဲ့သည့် ဖားကန့်ဒေသ မှော်ဝမ်းကြီး/မှော်ဝမ်းလေး အနီး ဇွန်လ ၁၉ရက် မနက် ၈နာရီခန့်မှစ၍ တိုက်ပွဲ ပြန်ဖြစ်နေကြောင်း သတင်းရင်းမြစ်က ပြောသည်။ ပြည်သူများလည်း စစ်ရှောင်နေကြရဟု ၎င်းကဆက်ပြောသည်။
ဇွန်လ ၁၆ရက် နှင့် ၁၇ရက် ၂ ရက်တာတိုက်ပွဲ အတွင်း ဖားကန့်တပ်မကုန်း၌ အလောင်း ၃၁ လောင်း အား သဂြိုလ်ခဲ့ရကြောင်း ကချင်စစ်ရေးသတင်းရင်းမြစ်တဦးကဇွန်လ၁၉ရက်တွင်အသိပေးသည်။
Public Service Announcement
အခြား သတင်းရင်းမြစ်တဦးက “ ၃၃လောင်း။ ဗိုလ်မှူးပါတယ်။ ဗမ ကို မှော်ဝမ်းနားမှာပဲ မြှုပ်ပစ်ခဲ့ကြတယ်လို့ သိရ။ မှော်ဝမ်းနဲ့ တပ်မကုန်းကနီးတယ်။ ဗမက မှော်စီစာ ဘုရားကုန်းမှာ ကျတာ ဟုတ်တယ်”ဟုပြောသည်။
သေဆုံးခဲ့သည့် ဗိုလ်မှူးသည် ဖားကန့် ၌ ပြည်သူလူထုများထံ မတရားငွေကြေးရယူခြင်းအပြင် ၎င်းကြောင့် သေဆုံးထိခိုက်သူများ၊ နေအိမ်မီးလောင်ပျက်စီးခဲ့သူများစွာရှိခဲ့ဟု သတင်းရင်းမြစ်က ပြောသည်။
ထို့အပြင်ယနေ့တွင်လည်းမှော်စီစာ ဘုရားကုန်းအနီး စစ်ကောင်စီတပ် ပစ်ခတ်၍ ပြည်သူ ၁ဦးသေဆုံးခဲ့သည်ဟု သတင်းရင်းမြစ်က ပြောသည်။
“မှော်စီစာဘုရားကုန်းရှေ့သွားတဲ့ ရက္ခိုင်တယောက် ပစ်သတ်ခံလိုက်ရတယ်။ စစ်တပ်က ပစ်သတ်တာ။ ဒီမနက် ၁၀နာရီ ဝန်းကျင်က” ဟု ၎င်းက ပြောသည်။
ထိုအပြင် KIA နှင့်ပူးပေါင်းတပ်ကခြောက်လကျော်ကြာ ဆင်နွှဲနေသည့် ဗန်းမော်မြို့သိမ်း တိုက်ပွဲနှင့်ပတ်သက်ပြီး ကချင်သတင်းရင်းမြစ်တဦးအားမေးမြန်းရာ “နေ့တိုင်း နည်းနည်းပါးပါး ဖြစ်တာရှိတယ်” ဟု ဗန်းမော် စစ်ရေး အခြေအနေကို ပြောပြသည်။
KIA အနေဖြင့် ဗန်းမော်တိုက်ပွဲ၌ စစ်ကောင်စီတပ်စခန်းများ တပ်ရင်းဌာနချုပ်များစွာ သိမ်းပိုက်ရရှိထားသော်လည်း အမှတ် (၂၁) စစ်ကောင်စီ ကွပ်ကဲမှုဌာနချုပ်(စကခ ၂၁) နှင့် တပ်ရင်းအချို့ကို အပြီးသတ် မသိမ်းပိုက်နိုင်သေးပေ။ စစ်ကောင်စီကလည်း ကချင်ပြည်နယ်၏ ဒုတိယမြို့တော် မကျရေး လေကြောင်းနှင့် ဒရုန်း ပစ်ကူ များစွာ အသုံးပြု ခုခံနေသည်။
