ဇူလိုင်-၇၊ ၂၀၂၅။ ကျော်ဇော/People’s Spring
ပဲခူးတိုင်း၊ သဲကုန်းမြို့အဝင် တယ်သီးပင်ရွာရှိ စစ်ကောင်စီတပ် စစ်ဆေးရေးဂိတ်ကို စနိုက်ဘာဖြင့် ပစ်ခတ်တိုက်ခိုက်ခဲ့ကြောင်း ပြည်ခရိုင်တပ်ရင်း ၃၆၀၁ မှ ပြန်ကြားရေးတာဝန်ခံ ရဲဘော်ရှဲဒိုးက ပြောသည်။
ဇူလိုင် ၄ ရက် နေ့လယ် ၃ နာရီ ၄၅ မိနစ်ခန့်က တယ်သီးပင်စစ်ဆေးရေးဂိတ်အား တပ်ရင်း ၃၆၀၁၊ Sniper အဖွဲ့က ပစ်ခတ်တိုက်ခိုက်ခဲ့ခြင်းဖြစ်ပြီး စစ်ကောင်စီတပ်ဘက်မှ တစ်ဦး နေရာမှာတင်သေဆုံးပြီး တစ်ဦးထိခိုက်ဒဏ်ရာရသွားကြောင်း ၎င်းက ဆက်ပြောသည်။
“ကျနော်တို့ သွားရောက်ပစ်ခတ်တိုက်ခိုက်တဲ့အချိန်မှာ အင်အား ၆ ယောက်ပဲရှိတယ်။ အခုတော့ အင်အားထပ်တိုးထားတယ်။ ဘေးပတ်ဝန်းကျင်မှာလည်း ကင်းပုန်းတွေချထားတယ်”ဟု တပ်ရင်း ၃၆၀၁ မှ ပြန်ကြားရေးတာဝန်ခံ ရဲဘော်ရှဲဒိုးက လူထုနွေဦးသို့ ပြောသည်။
Public Service Announcement
တိုက်ခိုက်မှုအတွင်း စစ်ကောင်စီတပ်ဖွဲ့ဝင်များဘက်မှ လက်နက်ငယ်များဖြင့် ပြန်လည်ပစ်ခတ်သော်လည်း ပြည်သူ့ကာကွယ်ရေးတပ်မတော်PDF အဖွဲ့မှ ရဲဘော်များ အထိအခိုက်အန္တရာယ်မရှိ ဆုတ်ခွာနိုင်ခဲ့ကြောင်း အသိပေးသည်။
၎င်းစစ်ဆေးရေးဂိတ်မှ ဂိတ်စောင့်စစ်ကောင်စီတပ်သားများသည် သဲကုန်းမြို့သို့လာရောက်သည့် စျေးသွားစျေးလာပြည်သူများအပေါ် စျေးကုန်များကို သိမ်းဆည်းခြင်း၊ ငွေတောင်းခံခြင်း၊ ဆဲဆိုကြိမ်းမောင်းခြင်း၊ လူငယ်လူရွယ်များနှင့် ကျောင်းသားများပါမချန် ဖမ်းဆီးပေါ်တာဆွဲခြင်းများ လုပ်ဆောင်လျှက်ရှိကြောင်း သိရသည်။
စစ်ကောင်စီသည် ပြည်ခရိုင်အတွင်း စစ်ဆေးရေးဂိတ်များချ၍ ပြည်သူလူထုအား ဖမ်းဆီးငွေညှစ်ခြင်းများ လုပ်ဆောင်နေသည့်အပြင် ဇွန်လနှောင်းပိုင်းနှင့် ဇူလိုင်လဆန်းများတွင် ပဲခူးရိုးမဖြတ်လမ်းအချို့ကို ဘူဒိုဇာများဖြင့်ထိုးကာ လမ်းပိုင်းဖြတ်တောက်ခြင်းများလုပ်ခဲ့သေးသည်။
