ဇူလိုင်-၁၀၊၂၀၂၅။ဇော်ရမ်း/People’s Spring
နောင်ချိုတွင်တိုက်ပွဲပြင်းထန်နေစဉ်ကျောက်မဲ-နောင်ချို ပြည် ထောင်စုလမ်းပိုင်းကို ယနေ့နံနက်ပိုင်းမှစ၍ တအာင်းအမျိုးသားလွတ်မြောက်ရေးတပ်မတော်(TNLA)က ဖြတ်သန်းခွင့်ပိတ်လိုက်သည်။
ကျောက်မဲ-နောင်ချိုလမ်းပိုင်းသည် မန္တလေး- မူဆယ်ပြည်ထောင်စုလမ်းမကြီး၌ ပါဝင်ပြီး မူလက သွားလာ၍ရသော်လည်း လက်ရှိတွင် TNLAက ခရီးသွားများ၏လုံခြုံရေးအခြေအနေအရ အရေးပေါ်ပိတ်ပင်လိုက်ခြင်းဟု ဒေသခံတစ်ဦးကပြောသည်။
“အရင်ကတော့ အဆင်ပြေသလိုသွားလာနေကြပြီး လမ်းလည်းပေါက်ပါတယ်။ဒီမနက်ကနေစပြီးပိတ်လိုက်တယ်။နောင်ချိုတိုက်ပွဲကတော်တော်လေးပြင်းထန်နေတယ်” ဟုကျောက်မဲမြို့ခံတစ်ဦးကပြောသည်။
Public Service Announcement
လက်ရှိတွင် မန္တလေးမြို့မှ ကျောက်မဲမြို့သို့ သွားလိုသူများအနေဖြင့် မန္တလေး- ကျောက်ဆည် – ရွာငံလမ်းမှတစ်ဆင့် သွားလာ၍ရနေသည်။ကျောက်မဲ-နောင်ချိုလမ်းပိုင်းအား အသုံးပြုခွင့်တားမြစ်လိုက်ခြင်းနှင့်ပတ်သက်၍ TNLAက သတင်းထုတ်ပြန်ထားခြင်းမရှိပေ။ သို့သော် စစ်ရေးအခြေအနေသတိပြုကြရန်၊ လေကြောင်းအန္တရာယ်သတိထားကြရန် မကြာခဏသတိပေးထားသည်။
လက်ရှိတွင် နောင်ချိုမြို့၌ တိုက်ပွဲအလွန်ပြင်းထန်နေပြီး စစ်ကောင်စီစစ်ကြောင်းများသည် မြို့အနီးသို့ရောက်ရှိနေပြီဟု သတင်းရရှိသည်။ နောင်ချိုမြို့ကိုထိုးစစ်စင်တိုက်ခိုက်နေစဉ် စစ်ကောင်စီက ကျောက်မဲ၊သီပေါနှင့် မိုးကုတ်မြို့နယ်တို့ကို လေကြောင်းမှ ဗုံးကြဲနေသည်။
စစ်ကောင်စီသည် ကျောက်မဲမြို့ကိုဇွန်လ ၂၄ရက်၊ ၂၇ရက်၊၂၉ရက်၊ ဇူလိုင်လ ၆ရက်နှင့် ဇူလိုင်လ ၈ရက်က ဗုံးကြဲတိုက်ခိုက်ရာအရပ်သား ခြောက်ဦးသေဆုံးပြီး ၂၀ဦးထက်မနည်း ဒဏ်ရာရရှိခဲ့သည်။ မိုးကုတ်မြို့ကိုလည်းဇူလိုင် ၈ ရက်နှင့် ဇူလိုင်လ၉ရက်က လေကြောင်းမှာဗုံးကြဲရာ ကလေးငယ်အချို့အပါအဝင်အရပ်သားရှစ်ဦးသေဆုံးပြီး ဒဏ်ရာရသူများလည်းရှိခဲ့သည်။ သီပေါမြို့ကိုလည်း ဇူလိုင် ၅ရက်နေ့တွင်စစ်ကောင်စီကဗုံးကြဲခဲ့သည်။
မတ်လ ၂၈ရက်က ငလျင်ကြောင့် ညီနောင်မဟာမိတ်သုံးဖွဲ့က တစ်ဖက်သတ်အပစ်ရပ်စဲထားသော်လည်း စစ်ကောင်စီက လေကြောင်းမှ မကြာခဏတိုက်ခိုက်နေ၍ အပစ်ရပ်မှု ရုတ်သိမ်းလိုက်ပြီဟု TNLAက ဇူလိုင်လ ၅ရက်၌ ထုတ်ပြန်ခဲ့သည်။ ထို့နောက်ပိုင်းတွင်စစ်ကောင်စီကလေကြောင်းတိုက်ခိုက်မှုများပိုမိုပြုလုပ်နေသည်။
