ဇူလိုင် – ၁၁၊ ၂၀၂၅။ဇေအောင်/People’s Spring
တစ်ရက်တည်း ဆုံးပါးသွားကြတဲ့ ရွှေညဝါဆရာတော် အရှင်ပညာသီဟရဲ့ ဈာပနနဲ့ စာရေးဆရာ မောင်သာချိုရဲ့နာရေးကို ဇူလိုင် ၁၂ရက်နဲ့ ၁၆ ရက်တွေမှာ ပြုလုပ်သွားမယ်လို့ သိရပါတယ်။
ရွှေညဝါဆရာတော်ရဲ့ အန္တိမအဂ္ဂိစျာပနအခမ်းအနားကို လာမယ့် ဇူလိုင် ၁၆ ရက်မှာ ရန်ကုန်တိုင်း၊ မှော်ဘီမြို့နယ်၊ ဘန့်ဘွေးကုန်းကျေးရွာအုပ်စု၊ ဘုရားလမ်းကျေးရွာရှိ ရွှေညဝါတောရ သာသနာပြုကျောင်းတိုက်ကနေ မှော်ဘီမြို့မသုဿန်သို့ ပို့ဆောင်ပြီး စျာပနအခမ်းအနားကျင်းပသွားမယ်လို့ စျာပနကျင်းပရေးကော်မတီက အသိပေးပါတယ်။
ကြားရက်တွေမှာလည်း ဆရာတော်ကြီးတွေရဲ့ တရားပွဲတွေနဲ့အတူ စျာပနပူဇော်ပွဲကို ၆ရက်ကြာကျင်းပသွားမယ်လို့ သိရပါတယ်။
Public Service Announcement
ဆရာမောင်သာချိုရဲ့ နာရေးကိုတော့ ဇူလိုင် ၁၂ရက် ညနေ ၄ နာရီ ရေဝေးသုဿန်မှာ ပြုလုပ်မယ်လို့ သိရပါတယ်။
ရွှေညဝါဆရာတော်နဲ့ ဆရာမောင်သာချိုတို့ဟာ စစ်တပ်အာဏာသိမ်းတဲ့ ၂၀၂၁ ဖေဖော်ဝါရီ ၁ရက်နေ့မှာ မတရားဖမ်းဆီးခံရပါတယ်။ အဲဒီနောက် နှစ်နှစ်နီးပါးအကြာ ၂၀၂၂ နိုဝင်ဘာ ၁၇ ရက်မှာလည်း တစ်ရက်တည်း နှစ်ဦးအတူတူ ပြန်လည်လွတ်မြောက်လာခဲ့ကြပါတယ်။
နှစ်ဦးလုံးဟာ ထောင်ထဲကရလာတဲ့ ရောဂါတွေကို ကုသရင်း ကွယ်လွန်ခဲ့ကြတာဖြစ်ကြောင်း နီးစပ်သူတွေက ပြောပါတယ်။
ရွှေညဝါဆရာတော်ဟာ ပျံလွန်တော်မူချိန် သက်တော်(၆၁)၊ဝါတော်(၄၀)ရှိပြီး ဆရာမောင်သာချိုကတော့ အသက်(၆၈)နှစ်ရှိပြီ ဖြစ်ပါတယ်။
