ဝမ်းတွင်းမှာ ဘုန်းကြီးတစ်ပါးကို ရဲဖမ်းသွားလို့ ပြန်လွှတ်ပေးဖို့ ရဲစခန်းရှေ့ ရွာသားတွေတောင်းဆို

ဇူလိုင် ၁၁၊ ၂၀၂၅။ဇေအောင်/People’s Spring

မန္တလေးတိုင်း၊ ဝမ်းတွင်းမြို့မှာ ဘုန်းကြီးတစ်ပါးကို စစ်ကောင်စီလက်အောက်ခံ ရဲက ဖမ်းဆီးသွားလို့ ရွာသားတွေက ရဲစခန်းရှေ့သွားပြီး ပြန်လွှတ်ပေးဖို့ တောင်းဆိုနေကြောင်း မြို့ခံတွေက ပြောပါတယ်။

ဒီကနေ့ (ဇူလိုင် ၁၁ရက်) မနက်ပိုင်းက ဝမ်းတွင်းမြို့နယ်၊ နဘဲကန်ကျေးရွာ နဘဲကန်တောကျောင်းက ဘုန်းကြီးကို ရဲတွေက လာရောက်ဖမ်းဆီးသွားကြောင်း၊ နေ့လယ်ပိုင်းမှာတော့ နဘဲကန်ရွာသားတွေက သာသနာ့အလံတွေကိုင်ပြီး ရဲစခန်းရှေ့သွားလာပြီး ဘုန်းကြီးကို ပြန်လွှတ်ပေးဖို့ တောင်းဆိုနေကြကြောင်း Voice Of Wundwin အဖွဲ့က ပြောပါတယ်။

“အဲ့ရွာထဲက အမျိုးသမီးတစ်ဦးက လုပ်ကြံဖမ်းခိုင်းတာကြားတယ်ဗျ။ သာသနာ့အလံတွေကိုင်ပြီး မြို့ပေါ်တက်လာကြတယ်ကြားတယ်။”လို့ Voice Of Wundwin အဖွဲ့ဝင်တစ်ဦးက ပြောပါတယ်။

Public Service Announcement

စခန်းထဲက ရဲတွေကလည်း သေနတ်နဲ့ ပစ်ခတ်မယ်လို့ ခြိမ်းခြောက်တာတွေရှိနေတယ်လို့ မြို့ခံအချို့က ပြောပါတယ်။ ဘုန်းကြီးကိုဖမ်း​ဆီးရတဲ့အကြောင်းရင်း အတိအကျကိုတော့ မသိရသေးပါဘူး။

ဝမ်းတွင်းမြို့နယ်မှာ စစ်အုပ်စုက စစ်မှုထမ်းဖို့ လူငယ်တွေအများအပြား လိုက်လံဖမ်းဆီးနေပြီး လူငယ်ဆယ်နဲ့ချီ ဖမ်းဆီးခံထားရတယ်လို့ မြို့ခံတွေက ပြောပါတယ်။