ဇူလိုင်-၂၁၊ ၂၀၂၅။ ထားမြတ်/People’s Spring
ချင်းလက်နက်ကိုင်အချင်းချင်းအကြားလက်နက်ကိုင်လမ်းစဉ်ဖြင့်အပြန် အလှန် တိုက်ခိုက်ခြင်းသည်ဘုံရန်သူဖြစ်သည့် စစ်ကောင်စီဖြစ်စေချင်သည့်အတိုင်း လုပ်ဆောင်ပေးခြင်း၊ တော်လှန်ရေးကိုနှောင့်နှေးစေခြင်း၊ ပြည်သူများကိုစိတ်ဝမ်းကွဲမှုကိုဖြစ်ပေါ်စေခြင်းစသည်တို့ကို ဦးတည်စေသည့်လုပ်ရပ်ဖြစ်ကြောင်း ချင်းဒေသကာကွယ်ရေးတပ်ဖွဲ့ ၅ဖွဲ့က ဇူလိုင် ၂၀ရက်တွင် ပူးတွဲထုတ်ပြန်သည်။
ZZLMSဟုခေါ်သည့် CDF-Zotung၊CDF-Zophei၊CDF-Lautu၊ CDF-Mara နှင့် Senthang Revolution Forceစသည့် ချင်းဒေသကာကွယ်ရေးတပ်များက လတ်တလော ချင်းပြည်(Chinland) အတွင်းဖြစ်ပွားလျက်ရှိသည့်တချိုသောအမြင်မတူမှု၊ သဘောထား ကွဲလွဲမှု၊ ပဋိပက္ခတို့နှင့်ပတ် သက်၍ ထုတ်ပြန်ခဲ့ခြင်းဖြစ်သည်။
ချင်းတော်လှန်ရေးအင်အားစုများအကြား လက်နက်ကိုင်လမ်းစဉ်ဖြင့် ဖြေရှင်းနေ၍ အဖိုးတန်လှသည့် ချင်းတော်လှန်ရေးရဲဘော်များဆုံးရှုံးမှုရှိသည့်အပြင် စစ်ဘေးဒဏ်ကြောင့် ပြည်သူများသည်လည်း ဘေးလွတ်ရာသိုထွက်ပြေးတိမ်းရှောင်ကြသည်ကို စိတ်မကောင်းစွာတွေ့ရှိရဟု ZZLMSက ထုတ်ပြန်သည်။
Public Service Announcement
” ကျနော်တို့ ချင်းလက်နက်ကိုင် အချင်းချင်းအကြား စစ်ကြောင်းထိုးပြီးမှ အချင်းချင်းအကြား တိုက်ခိုက်ဖို့ အချိန်မဟုတ်ဘူး။ ဘုံရန်သူသည် စကစ စစ်ကောင်စီပဲ။ကျနော်တို့ အတူတကွ တိုက်ထုတ်ဖို့အချိန်ဖြစ်ပါတယ်” ဟု ချင်းသတင်းရင်းမြစ်တစ်ဦးက ပြောသည်။
အချင်းချင်းကြားတိုက်ခိုက်မှုကြောင့်ပြည်သူများဒုက္ခရောက်ပြီး စစ်ရှောင်များပိုများလာသည့်အတွက် အချင်းချင်းအကြား တိုက်ခိုက် စစ်ကြောင်း ထိုးခြင်းများ ရပ်တန့်သင့်ဟု ၎င်းကဆိုသည်။
ချင်းပြည်ကောင်စီဖြစ်စေ၊ ချင်းညီနောင်ဖြစ်စေတဖက်နှင့်တဖက်ထိန်း ချုပ်နယ်မြေများနှင့်ပတ်သက်ပြီး အချင်းချင်းကြား လုယူတိုက်ခိုက်ရန် မလိုကြောင်း၊ အချင်းချင်း အသိအမှတ်ပြုပြီး တော်လှန်ရေးကာလ တွင် သိမ်းပိုက်ထိန်းချုပ်နယ်မြေ၌ နေထိုင်ကာ စစ်ကောင်စီ ဘုံရန်သူကို အတူတိုက်ထုတ်ရန်၊ တပြိုင်တည်းတွင် ညှိနှိုင်းဆွေးနွေးရန်လိုအပ်ကြောင်း ချင်းသတင်းရင်းမြစ်က ပြောပြသည်။
လက်နက်ကိုင်ရခြင်း၏ အဓိကရည်ရွယ်ချက်သည်ဘုံရန်သူဖြစ်သည့်စစ်ကောင်စီနှင့်အာဏာရှင် စနစ် အမြစ်ပြတ်ချေမှုန်းရေးတို့ ဖြစ်သည်ဟု ခံယူထားဟု ZZLMSက ဆိုသည်။
ထို့ကြောင့် ချင်းတော်လှန်ရေးအင်အားစုများအကြားဖြစ်ပွားလျက်ရှိသည့်အမြင်မတူမှု၊သဘောထား ကွဲလွဲမှု၊ ပဋိပက္ခတိုနှင့်ပတ်သက်ပြီးအချင်း ချင်းအကြား လက်နက်ကိုင်လမ်းစဉ်ဖြင့် အပြန်အလှန်တိုက်ခိုက်ခြင်းအားဖြင့် မဟုတ်ဘဲချင်းဟူသည့် အမည်နာမအောက်တွင် ညီအစ်ကိုဖြစ်ခြင်းကိုအခြေခံကာ နိုင်ငံရေးနည်းလမ်းဖြင့် စားပွဲပေါ်တွင်အဖြေရှာကြရန်လည်းတိုက်တွန်းထားသည်။
ချင်းပြည်ကောင်စီအဖွဲ့ဝင် ချင်းအမျိုးသားတပ်မတော်(CNA)၊ CDF ဟွာလ်ငိုးရမ်းနှင့် ချင်းညီနောင်အဖွဲ့ဝင် ချင်းအမျိုးသားကာကွယ်ရေးတပ် (CNDF)တို့သည်ဇူလိုင်လဆန်းမှစ၍နယ်မြေဆိုင်ရာအငြင်းပွားမှုနှင့်ပတ်သက်၍ တိုက်ပွဲများ ဖြစ်ပွားခဲ့သည့်အပေါ် အချင်းချင်း ဆွေးနွေးဖြေရှင်းရန် တော်လှန်ရေးအင်အားစုများက တိုက်တွန်းထားသည်။
