စက်တင်ဘာ−၁၃၊ ၂၀၂၅။ ဟန်နွေ/People’s Spring
ကရင်အမျိုးသားအစည်းအရုံး(KNU) မြိတ်-ထားဝယ်ခရိုင် တနင်္သာရီမြို့နယ် ထိုင်း-မြန်မာ မောတောင်နယ်စပ်ကုန်သွယ်ရေးလမ်းပိုင်းရှိ သိန်းခွန်းကျေးရွာအနီးတွင် တိုက်ပွဲဆက်ဖြစ်ပွားခဲ့ရာ စစ်ကောင်စီတပ် သေဆုံးထိခိုက်မှုရှိခဲ့ပြီး လက်နက်အချို့သိမ်းရသည်ဟု KNU မြိတ်-ထားဝယ်ခရိုင်က ထုတ်ပြန်သည်။
စက်တင်ဘာ ၁၁ရက်က စစ်ကြောင်းထိုးလာသည့် စစ်ကောင်စီတပ်ကို ကရင်အမျိုးသားလွတ်မြောက်ရေးတပ်မတော်(KNLA)၊ တပ်မဟာ(၄) လက်အောက်ခံ၊ တပ်ရင်း(၁၁)နှင့် တော်လှန်ရေးပူးပေါင်းတပ်ဖွဲများက တိုက်ခိုက်ခဲ့ရာ စစ်ကောင်စီတပ် ၁၀ဦးထက်မနည်း သေဆုံးထိခိုက်ခဲ့သည်ဟု အသိပေးပြီး သိမ်းရသည့်လက်နက်ငယ် ၃လက်နှင့် ကျည်များ၏ မှတ်တမ်းဓာတ်ပုံဖော်ပြသည်။
” တိုက်ပွဲဖြစ်တာတော့ ၉ရက်ကတည်းက ၊ ၉ရက်၊ ၁၀ရက်၊ ၁၁ရက်၊ ၁၂ရက်နဲ့ အခုထိဆိုတော့ ၅ရက်မြောက်ပေါ့။ ၁၁ရက်နေ့မှာ နယ်မြေရှင်းလင်းတဲ့အချိန်မှာ လက်နက် ၃လက်နဲ့ ခဲယမ်း ပစ္စည်းအချို့ရရှိတယ်။ သေဆုံးတာကတော့ စကစတော့ အလောင်းတွေကို သုံးလေးယောက် တတွဲ အဲဒီလိုမျိုးမြေမြှုပ်တာရှိတယ်။ ခန့်မှန်းခြေ ၁၀ဦးအထက်သေဆုံးတယ်အချို့က ဒဏ်ရာရတယ် အဲဒီလိုမျိုးပေါ့” ဟု KNLA တပ်မဟာ(၄) သတင်းရင်းမြစ်က ပြောသည်။
Public Service Announcement
လက်ရှိတွင် တိုက်ပွဲပြင်းထန်နေကြောင်း၊ စစ်ကောင်စီတပ်က စစ်ကြောင်းထိုးနေပြီး တော်လှန်ရေး ပူးပေါင်းတပ်ကလည်း ဇွဲရှိရှိဖြင့်ခုခံနေကြောင်း ၎င်းက ပြောသည်။
အဆိုပါတိုက်ပွဲဖြစ်ပွားရာ မောတောင်လမ်းပိုင်း သိန်ခွန်းကျေးရွာအနီး ဝန်းကျင်ကို စစ်ကောင်စီက စက်တင်ဘာ ၁၂ရက်တွင် လေကြောင်း ဗုံးကြဲတိုက်ခိုက်ခဲ့ရာ အဆိုပါ ဗုံးကြဲလာသည့် လေယာဉ်ကို KNLA ပူးပေါင်းတပ်က ပစ်ခတ်ခဲ့ရာ ထိခိုက်မှုရှိခဲ့ဟု သတင်းထုတ်ပြန်ထားသည်။
“ ဒါက ပထမဆုံးပစ်ခတ်မှု။ ဂျက်ဖိုက်တာ ကျနော်တို့ ခန့်မှန်းသုံးသပ်တာကတော့ ၁စီးထိတာပေါ့။ ဒါပေမဲ့မပျက်ကျဘူး” ဟု KNU မြိတ်-ထားဝယ်ခရိုင် အတွင်းရေးမှူး ပဒိုစောအယ်နားက လေယာဉ်ကို ထိမှန်အောင် ပစ်ခတ်နိုင်ခဲ့ကြောင်း ပြောသည်။
စစ်ကောင်စီတပ်သည် မောတောင် ကုန်သွယ်ရေးလမ်းပိုင်း ပြန်လည်ထိန်းချုပ်နိုင်ရန် ၂၀၂၄ ဒီဇင်ဘာကတည်းက ထိုးစစ်ဆင်နေခြင်းဖြစ်ရာ ၉လခန့်ကြာသည်အထိ KNLA ပူးပေါင်းတပ်၏ ခုခံမှုကို မထိုးဖောက်နိုင်သေးဘဲ သိန်ခွန်းကျေးရွာအနီးဝန်းကျင်၌ တိုက်ပွဲများ မကြာခဏ ဖြစ်ပွားလျက်ရှိသည်။
