စက်တင်ဘာ-၁၈၊၂၀၂၅။ထားမြတ်/People’s Spring
မင်းအောင်လှိုင်ဦးဆောင်သောစစ်အုပ်စုက စစ်ကောင်စီမှ စစ်ကော်မရှင်ဟုအမည်ပြောင်းသော်လည်း အကြမ်းဖက်အုပ်စု၊ နိုင်ငံတော်နှင့် ပြည်သူ့ ရန်သူပင်ဖြစ်ကြောင်း ပြည်ထောင်စုလွှတ်တော်ကိုယ်စားပြုကော်မတီ(CRPH)၊ အမျိုးသားညီညွတ်ရေးအတိုင်ပင်ခံကောင်စီ(NUCC)၊ အမျိုးသားညီညွတ်ရေးအစိုးရ(NUG)တို့က ယနေ့ ပူးတွဲကြေညာချက် ထုတ်ပြန်ခဲ့သည်။
စစ်အုပ်စုက ယခင်ဖွဲ့စည်းထားသည့်နိုင်ငံတော်စီမံအုပ်ချုပ်ရေးကောင်စီဟု ခေါ်ဆိုသော စစ်ကောင်စီကို ပြည်ထောင်စုလွှတ်တော်ကိုယ်စားပြုကော်မတီ (CRPH)က ၂၀၂၁ ခုနှစ်၊ မတ်လ (၁) ရက်နေ့တွင် အကြမ်းဖက် အုပ်စုအဖြစ် ကြေညာခဲ့သည်။ထိုအပြင် ၂၀၂၄ စက်တင်ဘာ ၅ရက်တွင်စစ်ကောင်စီကို “ပြည်ထောင်စုသမ္မတ မြန်မာနိုင်ငံတော် နှင့် ပြည်သူလူထု၏ ရန်သူ – Enemy of the State” အဖြစ် အမျိုးသားညီညွတ်ရေးအစိုးရက သတ်မှတ်ခဲ့သည်။
စစ်ကောင်စီသည် ရွေးကောက်ပွဲ ကျင်းပမည်ဟု ကြွေးကြော်ကာယခုနှစ်ဇူလိုင်လကုန်ပိုင်းတွင်စစ်ကောင်စီကို “နိုင်ငံတော် လုံခြုံရေးနှင့်အေးချမ်းသာယာရေးကော်မရှင်” ဟု အမည်ပေးထားသည့် စစ်ကော်မရှင်အဖြစ် အသွင်ပြောင်းခဲ့သည်။
Public Service Announcement
“အခု စစ်ကော်မရှင်ဟာဆိုရင်လည်း အကြမ်းဖက်စစ်ကောင်စီကနေအသွင်ပြောင်းထားတဲ့အဖွဲ့အစည်း ဖြစ်တဲ့ အတွက်ကြောင့်မို့လို့ ရှေ့က ထုတ်ပြန်ထားတဲ့ ထုတ်ပြန်ကြေညာချက်တွေထဲမှာ အကျုံးဝင်တယ်။ အဲဒါကြောင့်မို့လို့ စစ်ကော်မရှင်သည်လည်းပဲ အကြမ်းဖက်အဖွဲ့ ၊ နိုင်ငံတော်နဲ့ ပြည်သူလူထုရဲ့ ရန်သူ Enemy of the State ဖြစ်တယ်ဆိုတာ ကျနော်တို့ ထပ်ဆင့်ကြေညာတာဖြစ်တယ်” ဟု ပူးတွဲကြေညာချက် ပြောရေးဆိုခွင့် ရှိသူ အမျိုးသားညီညွတ်ရေးအစိုးရ ပြည်ထောင်စုဝန်ကြီးချုပ်ရုံးပြောရေးဆိုခွင့်ရှိသူ ဦးနေဘုန်းလတ်ကပြောသည်။
ထိုကြောင့်စစ်ကော်မရှင်လက်အောက်ခံအဖွဲအစည်းများ သည်လည်း အကြမ်းဖက်အုပ်စုဝင် အဖွဲအစည်းများ ဖြစ်ကြောင်း ပူးတွဲကြေညာချက်များ၌ ဖော်ပြသည်။
ထို့ကြောင့် စစ်ကော်မရှင်နှင့် ၎င်း၏ လက်အောက်ခံ အဖွဲ့အားလုံး၏ လုပ်ဆောင်ချက်မှန်သမျှသည်လည်း တရားဝင်မှုမရှိကြောင်း နှင့် ၎င်းတိုအား အမျိုးသားညီညွတ်ရေးအစိုးရအနေဖြင့် အကြမ်းဖက်မှုတိုက်ဖျက်ရေး ဥပဒေနှင့်အညီ အရေးယူဆောင်ရွက်သွားမည်ဖြစ်ကြောင်း ထုတ်ပြန်ကြေညာခဲ့သည်။
ထိုအပြင်တိုင်းရင်းသားတော်လှန်ရေးအဖွဲများအပါအဝင် တော်လှန်ရေးအင်အားစုများအား စစ်အုပ်စုဘက်က အကြမ်းဖက်အဖွဲအဖြစ်ကြေညာခြင်းများသည် တရားမဝင်ပျက်ပြယ်ပြီး ဖြစ်သည်ဟုလည်း ထုတ်ပြန်ခဲ့သည်။
