စက်တင်ဘာ−၁၉၊ ၂၀၂၅။ထားမြတ်/People’s Spring
ကချင်ပြည်နယ်၊ရွှေကူမြို့နယ်အတွင်းကချင်လွတ်လပ်ရေးတပ်မတော် (KIA) ထိန်းချုပ်ထားသည့် နယ်မြေရှိ စစ်သင်တန်းကျောင်းနေရာကို အာဏာသိမ်းစစ်တပ်က လေကြောင်းမှ ဗုံးကြဲတိုက်ခိုက်ရာ သေဆုံးထိခိုက်များပြားခဲ့ကြောင်း ကချင်စစ်ရေး သတင်းရင်းမြစ်အချို့က ပြောသည်။
KIA တပ်မဟာ(၁၁)၊တပ်ရင်း(၁၂)နယ်မြေကိုစစ်ကောင်စီက စက်တင်ဘာ ၁၇ရက် ညသန်းခေါင်(စက်တင်ဘာ ၁၈ရက် မနက်အစော)၌ လေကြောင်း တိုက်ခိုက်ခဲ့ခြင်းဖြစ်သည်ဟု ဆိုသည်။
“ဒါက ကွင်းသစ် နေရာသစ်၊ လေ့ကျင့်ရေးစခန်း အသစ်လုပ်တဲ့နေရာ။ ကွင်းတောင် ကောင်းကောင်း မဖောက်ရသေးဘူး။ အဲဒါကို အတိအကျ ဗုံးလာချသွားတာဆိုတော့ သင်တန်းသားတွေထဲမှာ ဒလန်ပါလာလို့ သတင်းပေါက်သွားလို့ အဲဒီ နှစ်ခုထဲက တခုပဲ” ဟု ကချင်သတင်းရင်းမြစ်က ပြောသည်။
Public Service Announcement
စစ်ကောင်စီ၏ လေကြောင်း တိုက်ခိုက်မှုကြောင့် သေဆုံးသူ ၁၇ဦးထက်မနည်းရှိပြီး ဒဏ်ရာရသူ ၂၀ခန့်ရှိဟု ၎င်းက ဆိုသည်။ ဒဏ်ရာရသူများတွင် ပြင်းထန်သူများပါဝင်သည်ဟု ပြောသည်။
KIA သတင်းရင်းမြစ်တဦးကလည်း “ပျံ့နှံ့နေတဲ့ အဲဒီ သတင်းဖြစ်စဉ် မှန်ပါတယ်” ဟု အတည်ပြုသည်။
အဆိုပါလေကြောင်းတိုက်ခိုက်ခံရမှုနှင့်ပတ်သက်၍ KIAသတင်းပြန်ကြား ရေးဌာနတာဝန်ခံ ဗိုလ်မှူးကြီးနော်ဘူထံ ဆက်သွယ်မေးမြန်းထားဆဲဖြစ်သည်။
ယခုနှစ်မတ်လကုန်ပိုင်းကလည်းစစ်ကောင်စီတပ်သည် ကချင်ပြည်နယ်၊ မိုးညှင်းခရိုင်အတွင်း KIA တပ်မဟာ(၈)၊ တပ်ရင်း(၅)နယ်မြေရရှိ စစ်သင် တန်းကျောင်းကို လေကြောင်း ဗုံးကြဲတိုက်ခိုက်ခဲ့ရာ လူငယ် ၃၀ ဦးကျော်သေဆုံးကာ အများအပြား ဒဏ်ရာရခဲ့သည်။
