စက်တင်ဘာ – ၃၀ ၊၂၀၂၅ ၊ဆိုင်းမင်း/People’s Spring
မန္တလေးတိုင်း၊ ပြင်ဦးလွင်မြို့နယ်ထဲက ၈ ထပ်ရေတံခွန်မှာ ပြုတ်ကျပြီးပျောက်ဆုံးနေတဲ့ အမျိုးသမီးနှစ်ဦး ကို ဒီနေ့ စက်တင်ဘာ ၃၀ ရက်မနက်ပိုင်းမှာ ဆက်လက်ရှာဖွေနေတယ်လို့ ကူညီကယ်ဆယ်ရေးမှာပါဝင်သူတွေကပြောပါတယ်။
၈ ထပ် ရေတံခွန်မှာ မနေ့ (စက်တင်ဘာလ ၂၉ ရက်) နေ့ခင်းပိုင်း ၃ နာရီအချိန်က တောင်ကျရေတရှိန်ထိုး ထိုးဆင်းကျလာတာကြောင့် ရေကစားနေသူတွေ ရေစီးနဲ့ မျောပါ ပြီးပြုတ်ကျခဲ့တာပါ။
ပြုတ်ကျသွားသူငါး ဦးအနက် တစ်ဦးကို အသက်ရှင်လျက် ကယ်ဆယ်နိုင်ခဲ့ပေမယ့် နှစ်ဦး သေဆုံးပြီး နှစ်ဦး ပျောက်ဆုံးနေတယ်လို့ ကယ်ဆယ်ရေးအဖွဲ့တွေက ထုတ်ပြန်ထားပါတယ်။
Public Service Announcement
ရေတံခွန်ကနေပြုတ်ကျသွားသူတွေဟာအမျိုးသမီးလေးဦးနဲ့အမျိုးသားတစ်ဦးဖြစ်တယ်လို့သိရပါတယ်။
အမျိုးသမီး နှစ်ဦးကိုရေတံခွန်ရဲ့သုံးထပ်အဆင့်မှာတွေ့ရှိခဲ့တာလို့ စေတနာမွန်လူမှုကူညီရေးအသင်း( အုန်းချော) ကထုတ်ပြန်ထားပါတယ်။
အသက်ရှင်လျက်ကယ်ဆယ်နိုင်ခဲ့တဲ့အမျိုးသားကတော့ ရေတံခွန်အပေါ်ဆုံးအဆင့်မှာ ခြေထောက်ကျိုးသွားတာကြောင့် မြေပြင်ကို ရောက်ဖို့ခက်ခက်ခဲခဲသယ်ထုတ်ရတယ်ဆိုတာကို အဲဒီသတင်းက အသိပေးထားပါတယ်။ အဲဒီအမျိုးသားဟာ ရုရှားနိုင်ငံသားလို့လည်း သိရပါတယ်။
လက်ရှိအချိန်ထိ ပျောက်ဆုံးနေသူအမျိုးသမီး နှစ်ဦးဟာ အသက် ၂၀ ကျော်အရွယ်တွေ ဖြစ်ပြီး နိုင်ငံခြားသူတစ်ဦးပါဝင်တယ်လို့ ရှာဖွေကယ်ဆယ်ရေးမှာပါဝင်နေသူတစ်ဦးက ပြောပါတယ်။
နိုင်ငံခြားသူ ပါဝင်တာ ဟုတ် ၊မဟုတ်ကိုတော့ သီးခြားအတည်ပြုနေဆဲဖြစ်ပါတယ်။
“ ရေတံခွန်ရဲ့ သုံးထပ်နားလောက််မှာရှိဖို့များတယ်၊ အခုမနက်အစောကစပြီး အဖွဲ့စုံနဲ့ရှာနေပါတယ်”လို့ အဲဒီ ရှာဖွေကယ်ဆယ်ရေးသမားက ဆိုပါတယ်။
၈ ထပ်ရေတံခွန်က မန္တလေးတိုင်း ပုသိမ်ကြီးမြို့နယ် နဲ့ ပြင်ဦးလွင်မြို့နယ်အစပ်မှာရှိပြီး မန္တလေးကဒေသခံအများစုသွားရောက်လည်ပတ်လေ့ရှိတဲ့နေရာတစ်ခုလည်းဖြစ်ပါတယ်။
