ချီဖွေဒေသမှာ ပြည်သူတွေကန့်ကွက်တဲ့နေရာတွေမှာ ရွှေမတူးဖို့ KIOတားမြစ်

အောက်တိုဘာ-၉၊ ၂၀၂၅။ ထားမြတ်/People’s Spring

ကချင်ပြည်နယ် ချီဖွေဒေသမှာ ကန့်သတ်ထားတဲ့နေရာတွေမှာ ရွှေမတူးဖော်ဖို့ ကချင်လွတ်လပ်ရေးအဖွဲ့(KIO)က တားမြစ်လိုက်ကြောင်း KIO/KIA သတင်းပြန်ကြားရေးဌာန က အောက်တိုဘာ ၈ရက်ညပိုင်းမှာ သတင်းဖော်ပြပါတယ်။

ပြည်သူတွေကန့်ကွက်တဲ့နေရာတွေမှာ ရွှေတူးဖော်မှု မလုပ်ကြဖို့၊ ရွှေတူးဖော်မှုကြောင့် ရေကြောင်းလမ်းနဲ့ ကားလမ်းတွေထိခိုက်ပျက်စီးမှုတာ ကာကွယ်ဖို့ ရည်ရွယ်ပြီးအခုလို ကန့်သတ်တားဖြစ်လိုက်တာလို့ အသိပေးထားပါတယ်။

အခု ကန့်သတ်လိုက်တဲ့ ဧရိယာဟာ ချီဖွေဒေသနဲ့ နီးစပ်သော မေခမြစ်ကြောတကြောရှိရွှေတူးသူအားလုံး ပါဝင်တယ်လို့လည်း သတင်းဖော်ပြပါတယ်။

Public Service Announcement

ချီဖွေမြို့ကို စစ်ကောင်စီထိန်းချုပ်ထားတဲ့ ကာလမှာ စစ်အုပ်စုနဲ့ နီးစပ်သူတွေက စက်ယန္တရားတွေသုံး ရွှေတူးဖော်တာတွေ ကို ဒေသခံတွေက ကန့်ကွက်ခဲ့ကြတာရှိပါတယ်။

အရင်က မြန်မာ-တရုတ်နယ်စပ်မြို့ဖြစ်တဲ့ချီဖွေကို စစ်ကောင်စီနဲ့လက်အောက်ခံ ဦးဇခုန်တိန့်ယိမ်း ဦးဆောင်တဲ့ နယ်ခြားစောင့်တပ်ဖွဲ့ က ထိန်းချုပ်ထားတာဖြစ်ပြီး ၂၀၂၄ နှစ်ကုန်ပိုင်းမှာKIAက သိမ်းပိုက်ခဲ့တာပါ။ ချီဖွေအပါအဝင် ဦးဇခုန်တိန့်ယိမ်းအဖွဲ့ ထိန်းချုပ်ထားတဲ့ ကချင်အထူးဒေသ(၁)နယ်မြေတခုလုံးကို KIAက သိမ်းပိုက်ခဲ့တာဖြစ်ပါတယ်။