အောက်တိုဘာ-၂၄၊ ၂၀၂၅။ ထားမြတ်/People’s Spring
ချင်းဒေသကာကွယ်ရေးတပ်(CDF)-ကန်ပက်လက် စစ်ဦးစီးချုပ် ဆလိုင်းအောင်လိန်းရဲ့မင်္ဂလာပွဲကို အာဏာသိမ်းစစ်တပ်က ဒီကနေ့ မနက်မှာ လေကြောင်းတိုက်ခိုက်ခဲ့လို့ ရဲမေ ၁ဦး အပါအဝင် ၃ဦးထက်မနည်းသေဆုံးကာ ဒဏ်ရာရသူတွေရှိတယ်လို့ ဒေသသတင်းရင်းမြစ်တွေက ပြောပါတယ်။
ချင်းပြည်နယ်၊ ကန်ပက်လက်မြို့ကို စစ်ကောင်စီက ဒီမနက်(အောက်တိုဘာ ၂၄ရက်)မှာ လေကြောင်း တိုက်ခိုက်ခဲ့တာဖြစ်ပါတယ်။
” လောလောဆယ်၃ယောက်သေတယ်။ ရဲမေတယောက်ပါတယ်။ ကြဲတာ ၂နေရာ စစ်ချုပ်ရဲ့ မင်္ဂလာပွဲချိန်တာ”လို့ ဒေသ သတင်းရင်းမြစ်တဦးက ပြောပါတယ်။
Public Service Announcement
လေကြောင်းတိုက်ခိုက်မှုကြောင့် စစ်ဦးစီးချုပ် ဆလိုင်းအောင်လိန်းထိခိုက်မှု ရှိ၊မရှိ အခြေအနကို မသိရသေးဘူးလို့ လည်း အခြားသတင်းရင်းမြစ်တဦးက ပြောပါတယ်။
အာဏာသိမ်းစစ်ကောင်စီတပ်ဟာ မင်္ဂလာပွဲ ဖိတ်စာပါ မင်္ဂလာပွဲကျင်းပမယ့်နေရာကို နေရာ၊ အချိန်အတိအကျ လေကြောင်းတိုက်ခိုက်လာတာလို့ သတင်းရင်းမြစ်က ပြောပါတယ်။
ဖိတ်စာကို ကန်ပက်လက်ဒေသတွင်းသာမကဆက်စပ် နယ်မြေဒေသတွေဆီကိုပါ ဖိတ်ကြားတာ ရှိတယ်လို့ သိရကြောင်း သတင်းရင်းမြစ်က ပြောပြပါတယ်။
CDF ကန်ပက်လက်ကတော့ လေကြောင်းတိုက်ခိုက်ခံရမှု အခြေအနေကို သတင်းထုတ်ပြန်တာ မရှိသေးပါဘူး။
စစ်ကောင်စီဟာ ချင်းပြည်နယ်က မြို့နယ်တွေအပါအဝင် နိုင်ငံတဝန်း အရပ်သား ပြည်သူနေထိုင်ရာတွေ စာသင်ကျောင်း၊ဘုန်းကြီးကျောင်းတွေကို လေကြောင်းတိုက်ခိုက်တာတွေ ဆက်တိုက်လုပ်ဆောင်နေတဲ့ အချိန်မှာ စစ်ရေးတာဝန်ရှိသူတဦးရဲ့ မင်္ဂလာဆောင်ကို အခုလိုမင်္ဂလာပွဲ ကျင်းပမယ့်နေရာ ၊ အချိန်တွေ ပါဝင်တဲ့ ဖိတ်ကြားစာတွေဝေပြီး ကျင်းပတာမျိုးမလုပ် သင့် ဟုဒေသ သတင်းရင်းမြစ်က ပြောပါတယ်။
ဒီလို လုပ်ရပ်ဟာ စစ်တပ်ရဲ့ လေကြောင်းရန်ကို ဖိတ်ခေါ်သလိုဖြစ်တယ်လို့လည်း သူက ပြောပါတယ်။
စစ်ကောင်စီဟာ တအာင်းတပ်မတော်(TNLA) သိမ်းပိုက်ထိန်းချုပ်ထားတဲ့မြို့ရွာတွေကိုလည်း လေကြောင်း စစ်ဆင်ရေးတွေ ဆက်တိုက်ပြုလုပ်လျက်ရှိရာ ဒီကနေ့ မနက် ၉နာရီ နဲ့ ၁၀နာရီ ကြားမှာ နမ္မတူမြို့ကို လေးကြိမ် ဗုံးကြဲတိုက်ခိုက်ခဲ့ပါတယ်။
နမ္မတူကို ဗုံးကြဲတိုက်ခိုက်တဲ့အကြောင်း TNLAက ထုတ်ပြန်ထားပြီးထိခိုက်မှု အခြေအနေကိုဖော်ပြမထားပါဘူး။
အောက်တိုဘာ ၁ရက်ကနေ ၂၃ရက်အထိ နမ္မတူ၊ မန်တုံ၊ ကျောက်မဲ၊ မိုင်းမိတ်၊ သီပေါ၊ မိုင်းလုံ၊ မိုင်းငေါ့၊ နမ့်ဆန် စတဲ့ TNLA ထိန်းချုပ်နယ်မြေတွေကို လေကြောင်း တိုက်ခိုက်မှု ၃၅ကြိမ် ပြုလုပ်ခဲ့ရာ ကလေးငယ် ၁၀ဦး အပါအဝင် ပြည်သူ ၄၇ ဦးသေဆုံးကာ ပြည်သူ ၆၀ ကျော် ဒဏ်ရာရရှိခဲ့ကြောင်း အသိပေးထားပါတယ်။
စစ်ကောင်စီဟာ တော်လှန်ရေးအင်အားစုတွေ သိမ်းပိုက်ထားတဲ့ မြို့ရွာတွေကို ပစ်မှတ်ထား လေကြောင်း တိုက်ခိုက်နေလို့ စစ်ရေးသတိရှိဖို့ လေကြောင်းရန် ကာကွယ်ရေးဆိုင်ရာတွေလိုက်နာဖို့ TNLAက နှိုးဆော်ထားပါတယ်။
