ဒီဇင်ဘာ-၂၀၊၂၀၂၅။ဇော်ဝင်း/People’s Spring
စစ်ကိုင်းတိုင်း၊ကောလင်းမြို့နယ်က စစ်ကောင်စီတပ်ရဲ့ သစ်ဖုလစခန်းကုန်းကို တော်လှန်ရေးတပ်ဖွဲ့တွေ သိမ်းပိုက်ရရှိတယ်လို့ သတင်းရရှိပါတယ်။
စစ်ကောင်စီတပ်ရဲ့ သစ်ဖုလစခန်းကုန်းကို တော်လှန်ရေးတပ်ဖွဲ့တွေက စစ်တပ်ရဲ့ လေကြောင်းဗုံးကြဲမှုနဲ့ လက်နက်ကြီးပစ်ကူတွေပေးနေတဲ့ကြား ၂ရက်ကြာတိုက်ခိုက်မှုအပြီး ဒီကနေ့(ဒီဇင်ဘာ ၂၀ရက်)နေ့လယ်ပိုင်းမှာ သိမ်းပိုက်ခဲ့တာလို့ မြေပြင်က တပ်ဖွဲ့ဝင်နဲ့တာဝန်ရှိသူအချို့က ဆိုပါတယ်။
သစ်ဖုလစခန်းကုန်းဟာ ကောလင်းမြို့နယ် အရှေ့ဘက်ခြမ်း၊ ရွှေဘို-မြစ်ကြီးနားလမ်းပိိုင်းအနီးမှာရှိပါတယ်။
Public Service Announcement
“ စခန်းကုန်းမှာက အင်အား ၃၀ ကျော်ရှိတယ်။လက်နက်မချခဲ့ကြဘူး” လို့ တိုက်ပွဲမှာပါဝင်ခဲ့တဲ့ ရဲဘော်တစ်ဦးက ပြောပါတယ်။
လက်ရှိမှာ စစ်ကောင်စီက လေကြောင်းနဲ့လက်နက်ကြီး ပစ်ခတ်တိုက်ခိုက်မှုတွေ ဆက်တိုက်လုပ်နေတယ်လို့လည်း ဆိုပါတယ်။
“ သစ်ဖုလကို ဒီနေ့ နေ့လယ်သိမ်းနိုင်တာဟုတ်တယ်” လို့ ကောလင်းခရိုင်တပ်ရင်းတစ်ခုရဲ့ တာဝန်ရှိသူက အတည်ပြုပါတယ်။
စခန်းကုန်းသိမ်းပိုက်မှုနဲ့ပတ်သက်လို့ သက်ဆိုင်ရာ စစ်ဒေသက အသေးစိတ်ထုတ်ပြန်လိမ့်မယ်လို့လည်း ဆိုပါတယ်။
၂၀၂၃က ကောလင်းမြို့ကို တော်လှန်ရေးအင်အားစုတွေ သိမ်းပိုက်ခဲ့ဖူးပါတယ်။ဒါပေမယ့်မြို့သိမ်းပြီး သုံးလကျော်အကြာမှာ စစ်တပ်က တန်ပြန်ထိုးစစ်ဆင်တာကြောင့် ပြန်လည်ဆုတ်ခွာခဲ့ရပါတယ်။
