အင်းတော်၊ ကောလင်းနဲ့ မော်လူးမှာ စစ်တပ် စစ်ကြောင်းနဲ့ လေကြောင်းတိုက်ခိုက်မှုကြောင့် အရပ်သား သေဆုံးသူ ၂၀ ထက်မနည်းရှိလာ

နိုဝင်ဘာ-၁၀၊၂၀၂၆။ရွှေပြည်စိုး/People’s Spring

စစ်ကိုင်းတိုင်းအထက်ပိုင်း၊ အင်းတော်၊ ကောလင်း၊ဝန်းသိုနဲ့ မော်လူးမြို့ကို ဝင်ရောက်လာတဲ့ စစ်တပ်စစ်ကြောင်းနဲ့ လေကြောင်း၊လက်နက်ကြီးပစ်ခတ်မှုတွေကြောင့် အရပ်သား သေဆုံးသူ ၂၀ဦးထက်မနည်းရှိနေတယ်လို့ ဒေသခံစစ်ဘေးရှောင်တွေက ပြောပါတယ်။

နယ်မြေချင်းဆက်ဆက်နေတဲ့ အင်းတော်၊ ကောလင်းနဲ့ မော်လူးမြို့တွေမှာ ပြီးခဲ့တဲ့အောက်တိုဘာလကုန်ခန့်ကစပြီး လက်ရှိ နိုဝင်ဘာလ ၁၀ရက်အထိ စစ်တပ် မြေပြင်စစ်ကြောင်းတွေရဲ့ သတ်ဖြတ်မှုနဲ့ လေကြောင်းတိုက်ခိုက်မှု၊ လက်နက်ကြီးပစ်ခတ်မှုတွေကြောင့် အရပ်သားသေဆုံးမှု ဆက်တိုက်ဖြစ်ပေါ်နေတာပါ။

” ကောလင်းမှာ အများဆုံးပဲ။ ညောင်ပင်သာရွာမှာဆိုရင် တရွာထဲမှာတင် ကိုးယောက်လောက်သေဆုံးတယ်။ ငါးယောက်က အသတ်ခံရပြီး သုံးယောက်က လေကြောင်းနဲ့လက်နက်ကြီးထိတာ။ တစ်ယောက်ကတော့နှလုံးရပ်ပြီးဆုံးသွားတယ်။ မော်လူးနဲ့အင်းတော်ဘယ်မှာလဲအရပ်သားတွေသေဆုံးတယ်”လို့ ကောလင်းမြို့ခံစစ်ဘေးရှောင်တစ်ဦးက ပြောပါတယ်။

Public Service Announcement

စစ်တပ်စစ်ကြောင်းတွေဟာ အင်းတော်-ထီးချိုင့်လမ်းကနေတဆင့် ကောလင်းမြို့နယ်ဘက်ကို နိုဝင်ဘာ ၃ရက်မှာ ဝင်ရောက်လာတာပါ။နိုဝင်ဘာ ၄ရက် ညကကလည်း ကောလင်းမြို့နယ်မှာ ဒေသခံပြည်သူတွေ ဆေးကုသပေးနေတဲ့ ဆေးရုံကို စစ်တပ်က ဗုံးကြဲလို့ CDM ဆရာဝန် ဒေါက်တာဇာနည်ထွန်းအပါအဝင် ကျန်းမာရေးဝန်ထမ်း ၅ ဦးသေဆုံးခဲ့ပြီး ဆေးကုသမှုခံယူနေတဲ့ ပြည်သူတွေလည်းဒဏ်ရာရရှိခဲ့ပါတယ်။

ရွှေဘို-မြစ်ကြီးနားဗျူဟာလမ်းမကြီးဖြစ်တဲ့ ကောလင်းမြို့နယ်၊ ဒိုးပင်တောင်ရိုးရှုခင်းသာနေရာမှာလည်း စစ်ဘေးရှောင်အမျိုးသမီး ၁ဦးနဲ့ အမျိုးသား ၂ဦးကို စစ်တပ်က သတ်ဖြတ်သွားတယ်လို့ ဒေသခံတွေကပြောပါတယ်။

အဲဒီမတိုင်ခင်ကလည်း အင်းတော်မြို့နယ်အတွင်း အရပ်သား ၂ဦးကို စစ်တပ်စစ်ကြောင်းက သတ်ဖြတ်ခဲ့တယ်လို့ အမျိုးသားညီညွတ်ရေးအစိုးရက သတင်းထုတ်ပြန်ခဲ့ပါတယ်။

အင်းတော်မြို့နယ် ပုန်းဟုန်ရွာကိုလည်း စစ်တပ်က ဗုံးကြဲတဲ့အတွက် ကလေးငယ် ၁ဦး၊ အမျိုးသမီး ၁ဦးသေဆုံးတယ်လို့ ဒေသတွင်းလုံခြုံရေးနဲ့စစ်ရေးအခြေအနေတွေကိုထုတ်ပြန်ပေးနေတဲ့ Indaw Revolution – IRက သတင်းထုတ်ပြန်ထားပါတယ်။

ဒါ့အပြင် နိုဝင်ဘာ ၅ရက်နဲ့ ၇ရက်အတွင်း တိုက်ပွဲတွေပြင်းထန်ခဲ့ပြီး ကောလင်းမြို့နယ်ထဲကိုဝင်ရောက်လာတဲ့စစ်ကြောင်းကစစ်ဘေးရှောင် ယာဉ်တန်းကို လက်နက်ကြီးနဲ့ပစ်ခတ်လို့ အရပ်သားထိခိုက်သေဆုံးမှုတွေရှိတယ်လို့ သတင်းရရှိပါတယ်။

” အင်းတော်ကနေ ဝင်လာတဲ့စစ်ကြောင်းကြောင့် ကောလင်းက အရပ်သားတွေ အထိနာဆုံးဖြစ်နေတယ်။ သေဆုံးသူတွေရဲ့အမည်စာရင်းကိုပြုစုနေဆဲဖြစ်တယ်။ အတည်ပြုထားတဲ့သူတွေလည်းရှိတယ်။ ရွာတွေလည်း၁၅ရွာထက်မနည်း တိမ်းရှောင်နေကြရတယ်ဗျ”လို့ ကောလင်းမြို့ခံတစ်ဦးကပြောပါတယ်။

စစ်ကောင်စီစစ်ကြောင်းတွေက ကောလင်းမြို့နယ်ထဲကမင်္ဂလာဆောင်တစ်ခုကိုလည်း ဝင်ရောက်စီးနင်းခဲ့ပြီး အရပ်သားအချို့ဖမ်းဆီးခံရတယ်လို့ သတင်းတွေထွက်ပေါ်ခဲ့ပါတယ်။

တိုက်ပွဲတွေအပြင်းထန်ဆုံးဖြစ်နေတဲ့ မော်လူးမြို့အနီးဝန်းကျင်ကိုလည်း စစ်ကောင်စီ ဗုံးကြဲလို့အရပ်သားတွေထိခိုက်သေဆုံးမှုတွေရှိခဲ့ပါတယ်။နိုဝင်ဘာလ ၅ရက်က ဗုံးကြဲတာမှာ ကားတစ်စီးမီးလောင်သလို စာသင်ကျောင်းကို ဒရုန်းဗုံးချလို့ ကလေးငယ်တစ်ဦးသေဆုံးပြီ ‌အမျိုးသမီးတစ်ဦး ဒဏ်ရာရခဲ့တယ်လို့ သိရပါတယ်။

မော်လူးမြို့နယ်အတွင်း စစ်တပ်က လေကြောင်းနဲ့ လက်နက်ကြီးတွေ အသုံးပြုပြီးအပြင်းအထန်တိုက်ခိုက်နေတဲ့အတွက် မြို့အနီး ပိတ်မိနေတဲ့ ခရီးသွားပြည်သူတွေ၊ ခရီးသည်နဲ့ ကုန်တင်ကားတွေ အမြန်ဆုံးရွှေ့ပြောင်းကြဖို့အင်းတော်မြို့နယ်မြို့နယ်ပြည်သူ့အုပ်ချုပ်ရေးအဖွဲ့က အရေးပေါ် သတိပေးချက် ထုတ်ပြန်ခဲ့ရပါတယ်။ ဒေသတွင်းက ကသာ – ထီးချိုင့် အမှတ် (၃) ကားလမ်း၊ ကသာ – မော်လူးကားလမ်းမှာ စစ်တပ်ယာဉ်တန်းကို တိုက်ခိုက်ချေမှုန်းမှာဖြစ်လို့ နိုဝင်ဘာ ၅ရက်ကစပြီး ခရီးသွားပြည်သူတွေ ဖြတ်သန်းသွားလာခြင်းမပြုကြဖို့ ကသာခရိုင် အမှတ်(၁)တပ်ရင်းက သတိပေးထားပါတယ်။ ကောလင်းကနေထွက်လာတဲ့ စစ်တပ်စစ်ကြောင်းက ဝန်းသိုမြို့ကိုဝင်ရောက်ခဲ့ပြီး ဝန်းသိုမြို့က စစ်ကြောင်းနဲ့ အချိန်းအပြောင်းပြုလုပ်ထားတာမို့ ဒေသခံတွေ လုံခြုံရေးဆက်လက်သတိပြုကြဖို့ ပြည်သူ့ကာကွယ်ရေးတပ်ဖွဲ့တွေက သတိပေးထားပါတယ်။