ဒီဇင်ဘာ-၂၇၊ ၂၀၂၅။ဇေအောင်/People’s Spring
စစ်ကိုင်းတိုင်း၊ မုံရွာမြို့နယ်က ကံပြားကျေးရွာကို စစ်ကောင်စီရဲ့ အမြောက်တပ်ကနေ လက်နက်ကြီးနဲ့ပစ်ခတ်လို့ သက်ကြီးရွယ်အိုတစ်ဦး သေဆုံးခဲ့ပါတယ်။
ပြီးခဲ့တဲ့ ဒီဇင်ဘာ ၂၅ ရက် နေ့လယ်ပိုင်းက မုံရွာမြို့၊ အမှတ်(၅၀၈) အမြောက်တပ် (အမတ-၅၀၈)ကနေ စစ်ရေးလှုပ်ရှားမှုမရှိဘဲနဲ့ ကံပြားကျေးရွာ အတွင်းသို့ လက်နက်ကြီး ၂လုံး ပစ်ခတ်တိုက်ခိုက်ခဲ့လို့ (၇၀)၀န်းကျင် အမျိုးသမီးတစ်ဦး သေဆုံးကြောင်း မုံရွာမြို့နယ် သတင်းမှန်ပြန်ကြားရေးအဖွဲ့က ပြောပါတယ်။
“အသက် ၆၀ ၀န်းကျင် အမျိူးသမီးတစ်ဦး နဖူးရှပ်ထိတယ်။ အသက် ၁၇ ၀န်းကျင် အမျိူးသားတစ်ဦး ၀မ်းဗိုက်ရှပ်ထိတယ်။ အသက် ၃၀၀န်းကျင် အမျိုးသားတစ်ဦး ခြေထောက် ထိမှန် ဒဏ်ရာရရှိခဲ့ပါတယ်”လို့ အထက်ပါအဖွဲ့ရဲ့ တာဝန်ရှိသူက ပြောပါတယ်။
Public Service Announcement
လက်နက်ကြီးထိမှန်လို့ ထိခိုက်ဒဏ်ရာရသူတွေဟာ ဒီကနေ့အထိ ဆေးကုသမှုခံယူနေရဆဲဖြစ်ကြောင်း ဒေသခံအချို့က ပြောပါတယ်။
ဒါ့အပြင် အဲဒီနေ့ ညနေပိုင်းမှာပဲ မုံရွာမြို့နယ်၊ မအူရွာစစ်ဆေးရေးဂိတ်က စစ်ကောင်စီတပ်က လက်နက်ကြီး ၂ လုံး ရမ်းသမ်းပစ်ခတ်လို့ သက္ကယ်ကျင်းရွာထဲ ကျရောက်ပေါက်ကွဲခဲ့ကြောင်း ဒေသခံများက ပြောပါတယ်။
မုံရွာမြို့နယ်က စစ်ကောင်စီစခန်းတွေဟာ လက်နက်ကြီးတွေနဲ့ မကြာခဏ ရမ်းသမ်းပစ်ခတ်လေ့ရှိတာကြောင့် မုံရွာ-အမြင့်လမ်းဘက်ကကျေးရွာတွေမှာ ပြည်သူထိခိုက်သေဆုံးမှုတွေ ရှိနေကြောင်း ဒေသခံတွေဆီက စုံစမ်းသိရှိရပါတယ်။
